Sıfrlyq damý mınıstri Asqar Jumaǵalıevtiń tóraǵalyǵymen ótken Memlekettik qyzmetterdi ońtaılandyrý jáne avtomattandyrý jónindegi vedomstvoaralyq komıssııanyń (VAK) otyrysynda osyndaı usynys aıtyldy. Bul týraly Sıfrlyq damý mınıstrliginiń baspasóz qyzmeti habarlady.
«UAT» AQ Basqarma tóraǵasy Áset Turysov memlekettik organ ókilderine azamattardyń mobıldik qosymshaǵa engizilgen qujattarynyń tizimin keńeıtýdi usyndy.
«Búgingi kúni azamattar eGov mobıldik qosymshasynan óziniń jeke kýáligin kóre alady. Eger ózimen birge jeke kýáliktiń túpnusqasy bolmaǵan jaǵdaıda, mobıldik qosymshadaǵy qujatty paıdalana alar edi. Dál osyndaı prınsıppen dıplom, júrgizýshi kýáligi, tehnıkalyq tólqujat jáne basqa da qujattardy ornalastyrýǵa bolady», - dedi Áset Turysov.
Vedomstvoaralyq komıssııanyń tóraǵasy, Sıfrlyq damý mınıstri Asqar Jumaǵalıev bul ıdeıany júzege asyrýda memlekettik organdarǵa qoldaý kórsetýge daıyn ekenin bildirdi.
«Biz óz tarapymyzdan memlekettik organdarǵa barynsha qoldaý kórsetýge daıynbyz. Azamattyń barlyq qujattarynyń bir qosymshada ornalasýy óte yńǵaıly bolar edi. Osyǵan oraı, memlekettik uıymdardyń sıfrlyq qujattardy túpnusqamen teń dárejede qabyldaý máselesin sheshý qajet», - dedi mınıstr.
«Azamattarǵa arnalǵan úkimet» KEAQ Basqarma tóraǵasy Ásemgúl Baltasheva óz kezeginde, HQKO-da azamattar jeke kýáliginiń túpnusqasyn usynbaı-aq, ony eGov qosymshasy arqyly kórsete alatynyn aıtty.
Komıssııa otyrysynda sondaı-aq aldaǵy jumys josparlary talqylanyp, memlekettik qoldaý jáne memlekettik qyzmetterdi avtomattandyrý sharalaryn merziminen keshiktirmeý, memlekettik organdardyń aqparattyq júıelerin ýaqytyly ıntegrasııalaý qajettigi aıtyldy.
Sıfrlyq komıssarlar kótergen máseleler de talqylandy. Atap aıtqanda, Komıssııa jeke kýálikti onlaın aýystyrý qyzmetine basa nazar aýdardy. Qyzmetti onlaın kórsetýden bas tartý kórsetkishiniń 80%-y paıdalanýshylardyń sapasyz foto usynýyna baılanysty. Osy oraıda, Asqar Jumaǵalıev qyzmet kórsetýshige bul máseleni sheshý joldaryn «UAT» AQ-men birlese pysyqtaýdy tapsyrdy.
«Áriptester, eger 100 ótinimniń 80-i fotonyń sapasyz bolýyna baılanysty qabyldanbaıtyn bolsa, onda bul máseleni sheshý qajet, anyqtaý kerek», - dedi Jumaǵalıev.
Bul vedomstvoaralyq komıssııanyń 57-shi otyrysy ekenin aıtyp ótken jón. Komıssııa qabyldaǵan sheshimder men memlekettik organdar júrgizgen jumys nátıjesinde 231 memlekettik qyzmet avtomattandyryldy jáne ońtaılandyryldy. Osynyń esebinen talap etiletin qujattardyń ortasha paketi 30%-ǵa azaıyp, qyzmet kórsetýdiń ortasha merzimi 3 ese (31 kúnnen 10 kúnge deıin) qysqardy.