Qurlyqtyq hokkeı lıgasynyń (QHL) sońǵy týr oıynyn syrt aıdynda ótkizgen elordanyń «Barys» klýby jeńiske jete almady.
Týrnırdi jeńilispen bastaǵan «Barys» sońǵy týrda da jankúıerlerin qýantpady. Habarovskige qonaqqa barǵan jerlesterimiz jergilikti «Amýr» klýbymen kezdesip, 5:0 esebimen aıdyn ıelerine jol berdi. Degenmen oıyn nátıjesi «Barystyń» týrnır kestesindegi ornyna keri áserin tıgizgen joq.
QHL qorytyndysy boıynsha, Andreı Skabelka shákirtteri turaqty birinshiliktiń Shyǵys konferensııasyndaǵy týrnır kestesinde 84 upaımen ekinshi oryndy ıelendi. Kósh basyndaǵy «Ak Bars» (Qazan) klýbynan 9 upaı qalyp qoıdy. Sondaı-aq Chernyshev dıvızıonynda ekinshi jyl qatarynan birinshi oryn ıelengenin aıta keteıik. Al jalpy QHL qorytyndysynda jerlesterimiz tórtinshi orynnan kórindi. Endi «Barys» oıynshylary Gagarın kýbogynyń pleı-off kezeńinde Shyǵys konferensııasynda 7-oryn ıelengen Magnıtogorskiniń «Metallýrg» komandasymen kezdesedi.
Alǵashqy eki oıyn 1 jáne 3 naýryz kúnderi Nur-Sultanda, qarymta match 5 jáne 7 naýryzda Magnıtogorskide ótedi. Pleı-off erejesine sáıkes, kelesi kezeńge 4 ret jeńiske jetken komanda shyǵady.