Elordadaǵy Nazarbaev Ortalyǵynda «Saqtardyń altyn murasy» atty kórme ashyldy.
Elordadaǵy Nazarbaev Ortalyǵynda «Saqtardyń altyn murasy» atty kórme ashyldy.
Kórmeniń eń basty ári baǵaly jádigeri – Esik qorǵanynan tabylǵan «Altyn adam». 1967-1970-jyldary Almaty mańyndaǵy Esik qorǵanynan arheolog-ǵalym Kemal Aqyshevtyń basqarýyndaǵy ekspedısııa jumysynyń nátıjesinde tabylǵan «Altyn adam» skıf-saq dáýiriniń «ań stılindegi» tehnologııasy joǵary buıymdar qataryna jatady. Búginde ol táýelsiz Qazaqstannyń basty sımvoldarynyń biri. Jaýyngerdiń kıiminde jolbarys, bulan, qar barysy, jylqy, búrkit úlgisimen beınelengen tórt myńnan astam altyn qaptama men plastınalar bar. Bul sol dáýirde skıfterdiń metall óńdeýdiń quıma, soǵý, qalyptaý, shekime, bederleý jáne oımalaý ádisterin óte jaqsy meńgergenin, ıaǵnı, zergerlik óneriniń bıik dárejede bolǵanyn tanytady. Saq jaýyngeriniń altyn áshekeıleri b.z.d V-IV ǵasyrlarǵa jatady. «Altyn adamnyń» kıim elementteriniń kóshirmesin Altyn jáne baǵaly buıymdar memlekettik mýzeıi usyndy.
Sondaı-aq, 1993 jyly Novosibir arheologtary Pazyryq qorǵanynan áıel men er adamnyń mýmııalaryn tapqan bolatyn. Oǵan qosa sol mańaıdan birqatar zattar tabylǵan. Jádigerler altaılyq ań stılinde daıyndalǵan. Pazyryq álemi bizdi sol dáýirge tán skıftik, onyń ishinde altaılyq ań stılimen tanystyrady. Osy kúnge deıin aman jetken teńdessiz jádigerler «Saqtardyń altyn murasy» kórmesine qoıyldy.
Kórmege budan ózge «Mádenı mura» memlekettik baǵdarlamasy aıasynda tabylǵan ǵajaıyp artefaktiler qoıyldy. 2004 jyly baǵdarlama júzege asa bastaǵan tustan bastap 40-tan astam arheologııalyq qazba jumystary júrgizilgen bolatyn. Nátıjesinde Qyzyl Ýyq ǵıbadathanasy men Berel qorymynan b.z.d. V-III ǵasyr kezeńine jatatyn, saq zamanynda temirden jasalǵan biregeı artefaktiler tabylǵan. Sol zattar da kelýshilerdiń nazaryna usynylǵan.
Nazarbaev Ortalyǵy dırektorynyń ǵylymı-gýmanıtarlyq jumys jónindegi orynbasary Láıla Mahat pen Altyn jáne baǵaly metaldar memlekettik murajaıynyń dırektory Almaz Nurazhan saltanatty sharanyń jibek jibin kesti. Sharaǵa Mádenıet mınıstrligi Mádenıet komıtetiniń tarıhı-mádenı mura basqarmasynyń bastyǵy Bolat Moldashev, QR Ulttyq murajaıynyń dırektory Darhan Myńbaı jáne Japonııa, Úndistan, Reseı memleketteriniń elshileri men Eýroodaq ókilderi qatysty.
«Egemen-aqparat».