Bıyl Uly Jeńiske 75 jyl. Osy oraıda, Jambyl oblysynda aıtýly merekege oraı ardagerlerdi quttyqtaý sáti bastalyp ketti. О́ńirde Uly Otan soǵysynyń ardagerlerin quttyqtaý sharalaryn uıymdastyrý jumystary týraly aldyn-ala jospar jasalǵan.
Tarazda soǵys ardagerlerin quttyqtaý jyldaǵydan erekshe jaǵdaıda ótti. Oblys eriktileri «Jeńis» ániniń súıemeldeýimen avtokran arqyly 98 jastaǵy Musahan Berdibaev pen 94 jastaǵy Mútálip Erejepbaevtyń balkondaryna deıin kóterilip, olarǵa gúl shoqtaryn syılady. Jastar soǵys ardagerlerine búgingi beıbit kún úshin alǵystaryn bildirse, qart maıdangerler óz kezeginde olarǵa aq batasyn berdi. Alaıda, Jambyl oblysy ákimdiginiń málimetinshe, ardagerlerge qurmet pen rızashylyq bildirý munymen tolastamaıdy eken.
Bir aıta keterligi, Uly Jeńis kúnine oraı oblystaǵy 57 ardagerge 1 mıllıon teńgeden áleýmettik kómek kórsetilip otyr. Tyl eńbekkerleri de nazardan tys qalǵan joq. Soǵys jyldarynda tylda 6 aıdan astam jumys istegen 4247 adam 50 myń teńgeden alsa, ekinshi dúnıejúzilik soǵysqa qatysýshylardyń 350 jesiri men múgedekteriniń áıelderi de osyndaı kólemde áleýmettik kómekke qol jetkizdi. Al, Lenıngrad blokadasynda bolǵandar men konslagerlerdiń burynǵy tutqyndaryna 60 myń teńgeden tólendi.
Sonymen qatar Uly Otan soǵysynyń qatysýshylary men múgedekterine teńestirilgen adamdar 100 myń teńge kóleminde birjolǵy áleýmettik kómekti ıelendi. Barlyǵy 6650 adamǵa bir rettik áleýmettik kómek kórsetý úshin 500 mıllıon teńgeden astam qarajat qarastyrylǵan. Mereke kúnderi oblys basshylyǵy Uly Otan soǵysynyń ardagerlerin arnaıy quttyqtaıtyn bolady.
Jambyl oblysy