Arheologtyń aıtýynsha, eki qalashyq ornynyń aralyǵy bir-birine jaqyn.
Zaısan aýdany aýmaǵynan orta ǵasyrlyq qala jurtynyń oryndary tabyldy. Eldi eleń etkizerlik jańalyqty estigennen keıin biz qazir Zaısanda júrgen belgili arheolog Ábdesh Tóleýbaevtyń ózine telefon shaldyq.
«Qaı kezeń ekeni áli anyqtalǵan joq. Merzimdeýshi materıaldar shyqsa, qaı kezeńge jatatynyn sonda aıta alamyz. Biraq orta ǵasyrlyq qala jurty ekeni anyq. 5 ǵasyr men 12 ǵasyrǵa deıingi aralyq bolýy múmkin.
Qala jurty Jińishke ózeniniń boıy men Sarjyra aýylynyń mańynan anyqtaldy. Jińishke ózeniniń boıynda jeke-jeke qurylys ǵımarattary kóp. Ústin qum basyp, bıik tóbelerge aınalyp ketken. Olardyń sany birshama. Osy jerden tym alys emes, Sarjyra degen jerden de qala jurty tabylǵan. Bul - kádimgi qorǵandy-bekinisti qala. Onyń mańaıynda ártúrli qurylystar bar. Bul nysandardy jaqsylap zertteý kerek. Erekshe atap óterligi, bul - áıgili Jibek jolynyń kishigirim bir tarmaǵy. Men muny burynnan aıtyp júrmin. Negizgi jol Jońǵar qaqpasyna qaraı ketedi. Iаǵnı, Jetisýdan bastalady. Ekinshi bir tarmaǵy Tarbaǵataıdy bókterlep, Aqsýat, odan ary Zaısan, odan Jemeneı, qara Ertistiń boıymen Qytaıǵa qaraı ótken dep oılaımyn. Osy jolda qala jurttary, qonys oryndary tabylyp jatyr» deıdi arheolog.
Arheologtyń aıtýynsha, eki qalashyq ornynyń aralyǵy bir-birine jaqyn. Shamamen 25-30 shaqyrym. «Eki jerden de qysh qumyralardyń synyqtary tabyldy. Bul – tek jer ústindegi materıaldar. Endi qazba jumystaryn bastaımyz. Barlyǵy sol kezde belgili bolady» deıdi Ábdesh Tóleýbaev.
Shyǵys Qazaqstan oblysy,
Zaısan aýdany