Jyl saıyn dástúrli túrde uıymdastyrylatyn shaıbaly hokkeıden Prezıdent kýbogy týrnıri bıyl 7 tamyzda bastalady.
11-márte jalaýy jelbireıtin baıraqty básekege qatysýǵa 4 komanda ótinish bergen. Qurlyqtyq hokkeı lıgasyna daıyndyq ispetti týrnırde «Barys» (Nur-Sultan), «Lokomotıv» (Iаroslavl), «Dınamo» (Mınsk) jáne Ońtústik Koreıa quramasy bas júldeni sarapqa salady. QHL-diń ótken maýsymynda «Lokomotıv» Gagarın kýbogynyń pleı-off satysyna deıin jetken bolsa, Mınskiniń «Dınamo» klýby 24-oryndy ıelengen bolatyn. Ońtústik Koreıa quramasy da Qazaq jankúıerlerine tańsyq emes. Byltyr eki eldiń ulttyq quramalary joldastyq match ótkizip, jerlesterimiz iri eseppen basym túsken-di.
2010 jyldan beri ótkizilip kele jatqan Prezıdent kýbogy básekesinde elordanyń «Barys» komandasy bes márte top jarǵan. Al Sankt-Peterbýrgtiń SKA, Ombynyń «Avangard», Novokýzneskiniń «Metallýrg», Nıjnekamskiniń «Neftehımık» jáne Habarovskiniń «Amýr» klýbtary bir retten jarys jeńimpazy atanǵan. Byltyrǵy týrnırde «Barys» komandasy jeńiske jetken edi.