О́kpesi qabynǵan naýqas sany ósti

Jalpy, oblysta 5581 adam medısına qyzmetkerleriniń baqy­la­ýyna alynǵan. Onyń ishinde sta­sıo­narlyq emdeýde 2583 naýqas bolsa, 895 sımp­tomsyz naýqas úı jaǵ­da­ıynda em­de­lip jatyr. Al úıde oqshaý­lan­ǵan­dar sany 2103 adam eken.

– Infeksııalyq aýrýhanalardaǵy reanımasııa bólimderinde aýyr jáne óte aýyr jaǵdaıdaǵy 41 pasıent bar. Olardyń 39-y eresek adam, 2-eýi bala. 15 naýqas ókpeni jasandy jolmen jeldetý apparatyna qosylǵan. Jalpy, sońǵy aptada ınfeksııanyń ósý qar­qy­ny 4 paıyzdy qurady. Oblysta epı­demııaǵa qarsy jáne zararsyzdandyrý sharalary jalǵasýda, – deıdi Al­maty oblysyndaǵy indetpen kúres ju­mysynyń barysymen tanystyrǵan oblys ákiminiń orynbasary Batyrjan Baıjumanov.

О́kinishke qaraı ótken jylmen salystyrǵanda oblysta ókpe­si qabynǵandardyń úlesi 2,5 esege ósip otyr. Naýqastar arasyndaǵy ólim-jitim kóbeıip ketken. Byltyr osy merzimde pnevmonııadan 90 adam qaıtys bolsa, qazir 190 adam dertten kóz jumǵan.

– Oblysta sońǵy aptada provızor bóliminen 618 adam emdelip shyqty. Jalpy, kún saıyn ókpesi qabynǵan 150-den astam naýqas emdelip shyqsa, osy dıagnozben emhanaǵa túsetinder sany 200-ge deıin jetip otyr. Aýrýy asqynǵan pasıentter sanynyń ósýine baılanysty ınfeksııalyq stasıonarda sońǵy eki aptada oryndar sany 3 ese, ıaǵnı 17 stasıonarlyq mekemede 150-den 500-ge deıin artty. Pnevmonııamen aýyratyn naýqastardy emdeý úshin 31 stasıonarda tósek sany 1 myńnan 3 myńǵa deıin kóbeıtildi. Máselen, Taldyqorǵan qalasyndaǵy 300 oryndyq ınfeksııalyq stasıo­nar oblystyq aýrýhana bazasyna kóshirildi. Teri-venerologııalyq dıspanser bazasynda 85 provızorly tósektik oryn ashyldy. Sonymen qatar búginnen bastap oblystyq ftızıo-pýl­m­onologııa ortalyǵynda 120 tósek­tik provızorǵa naýqastardy qa­byl­­daý bastaldy. Taldyqorǵan qalasy boıynsha 532 provızorlyq qa­byl­daý orny 532 tósekke deıin jetti, – deıdi B.Baıjumanov.

Al  oblys aýmaǵynda dári-dármek tapshylyǵyn boldyrmaý jáne onyń baǵasyn ósirýge jol bermeý maq­sa­tynda birneshe monıtorıng toby qu­ry­lyp, jumys isteýde. Qazir aımaqta Memleket basshysynyń tapsyrmasyna sáıkes dári-dármektiń qoljetimdi bolýy men baǵasyn ósirýge jol ber­meý maqsatynda oblystyq bas mem­le­ket­tik sanıtarlyq dárigeriniń qaý­ly­symen monıtorıng toby qurylǵan. Sol sııaqty Nur Otan partııasynyń aýdandyq, qalalyq fılıaldary da bul máseleni baqylaýda ustaıdy. Dári-dármektiń kóterme jáne bólshek saýdasy máselesi boıynsha ózara yntymaqtastyq týraly úshjaqty memorandýmǵa qol qoıylǵan. Búginge deıin Almaty oblysyndaǵy farmasevtıkalyq qyzmetpen aınalysatyn 70 nysanǵa monıtorıng jasalǵan. Alypsatarlyqqa jol bermeý úshin medıkamentterdiń bir qolǵa satylatyn kólemi jóninde keńinen túsindirý jumystary júrgizilýde.

Almaty oblysy