Batys Qazaqstan oblysynyń 18 eldi mekenine joǵary jyldamdyqty ınternet tartý jumystary aıaqtaldy. Tartylǵan jeli jaqyn kúnderi memlekettik mekemelerge ornatylmaq. «Qazaqtelekom» kompanııasynyń habarlaýynsha, búgingi tańda oblys boıynsha josparlanǵan 52 mekemeniń 45-i talshyqty optıkalyq baılanys jelisine qosylǵan. Maýsym aıynyń sońyna deıin qalǵan mekemelerge de ınternet tartylady.
«Qazaqtelekom» kompanııasy «Sıfrly Qazaqstan» baǵdarlamasy aıasynda aýyldyq jerlerge sapaly ınternet júrgizý jumysyn 2018 jyly bastaǵan bolatyn. Qashyq eldi mekenderge talshyqty-optıkalyq baılanys jelisin tartý bıyl tolyq aıaqtalýǵa tıis. 2021 jyly júrgizilgen jeliler boıynsha qyzmet kórsetý kezeńi bastalady.
«Qazaqtelekom» AQ Batys aımaqtyq telekommýnıkasııalyq dıreksııasynyń bas dırektory Abaı Qadyrálıevtiń aıtýynsha, jalpy joba bastalǵaly beri Batys Qazaqstan oblysynda barlyǵy 81 aýylǵa jeli tartylyp, 287 memlekettik mekemege sapaly ınternet qosylǵan.
– Joba bastalǵan 2018 jyly oblystaǵy 3 aýylǵa ınternet tartyldy. 2019 jyly 60 eldi mekendi qamtydyq. Bıyl Bazarsholan, Bazartóbe, Esensaı, Qaraýyltóbe sekildi barlyǵy 18 eldi mekenge joǵary jyldamdyqty ınternet tartylyp boldy. Árıne, jumys tolyqtaı bitti deýge erterek. Degenmen transheıalar qazyp, qubyrlar júrgizip, sonyń ishimen kabel tartý jumystaryn tolyq bitirdik. Endi osy tartylǵan jelini ákimdik, emhana, mektepterge kirgizemiz. Bar-joǵy jeti-aq mekeme qaldy. Solarǵa tartylǵan soń, Batys Qazaqstan oblysy boıynsha jospar túgel oryndaldy deı alamyz,– dep ótti A.Qadyrálıev. Oblysta úsh jylda barlyǵy 2255 shaqyrym talshyqty-optıkalyq baılanys jelisi tóselipti.
Maýsymnyń basynda Qostanaı oblysynyń ortalyǵynan 560 shaqyrym shalǵaıda jatqan Jangeldi aýdanyndaǵy 7 aýyl talshyqty-optıkalyq baılanys jelisine tolyqtaı qosyldy. Sonyń nátıjesinde aýyldyq mektepter, aýrýhanalar men ákimdikter qashyqtan oqytý, telemedısınany qoldaný jáne azamattarǵa jedel qyzmet kórsetýdiń jańa múmkindikterin alady.
Kompanııanyń Soltústik aımaqtyq telekommýnıkasııa dıreksııasynyń bas dırektory Ersaıyn Dúısemálıevtiń aıtýynsha, Jankeldi aýdanyndaǵy Qalamqarasý, Sýjarǵan, Aqshyǵanaq, Kókalat, Aralbaı, Torǵaı, Taýysh eldi mekenderine deıin 240 shaqyrymnan asatyn optıkalyq jeli salyndy.
– Mobıldi baılanys operatorlarymen birlesken joba aıasynda halqy 250-den asatyn aýyldardy uıaly baılanyspen qamtamasyz etý jelisin qurý úshin Aqkól, Aqshyǵanaq, Kókalat, Aralbaı, Taýysh, Saǵa, Shıli jáne Ahmet Baıtursynov aýyldarynda bazalyq stansalar salý josparlanyp otyr, – deıdi E.Dúısemálıev.
Aımaqtarǵa tartylǵan TOBJ ózge de uıaly baılanys operatorlaryna osy jeliniń negizinde óz stansalaryn ornalastyrýǵa múmkindik beredi. Bul radıosıgnal arqyly talshyqty optıkalyq baılanys jelisi jetpegen aýyldarǵa ınternet tartýǵa jol ashady.
Bıyl búkil Qazaqstan boıynsha, TOBJ tartý jumystary aıaqtalyp, barlyǵy 14 514 shaqyrym jeli 828 aýyldy qamtýǵa tıis. 2496 memlekettik mekeme talshyqty-optıkalyq baılanys jelisine qosylady. Nátıjesinde halyqtyń 99,3 paıyzy keń jolaqty ınternetke qol jetkizedi. «Qazaqtelekomnyń» habarlaýynsha, tótenshe jaǵdaı engizilip, karantın tártibi kúsheıtilgen kezde de jumys tolastaǵan joq.