Álemdegi eń iri saýda baǵyttarynyń biri Sıngapýr buǵazynda qańtar aıynan maýsym aıyna deıin 16 qaraqshylyq oqıǵasy tirkelgen. Byltyrǵymen salystyrǵanda ashyq teńizde jasalǵan shabýyldar sany eki esege artqan. Bıylǵy jartyjyldyq boıynsha jasalǵan baıandamada bul jaǵdaıdy pandemııamen baılanystyrǵan eken.
Shabýyldar kóbeıgen aımaqtar qatarynda Bangladesh, Úndistan, Indonezııa, Fılıppın, Vetnam jáne Ońtústik-Qytaı teńizi bar. Noksvılldegi Tennessı ýnıversıtetiniń Teńiz qaraqshylyǵyn zertteýshisi Brendon Prınstiń pikirinshe, Azııadaǵy qaraqshylyq pen qarýly shabýyldardyń basym bóligi múmkindikti paıdalanýshylyq sıpatqa ıe. Keıde jergilikti balyq aýlaýshylar qosymsha tabys kózi dep osyndaı zańsyz áreketke barady. Odan bólek jumyssyz qalǵan jastar da qaraqshylyqqa bet buryp jatady. Shaǵyn toptan quralǵan qaraqshylar úlkenirek kemelerge basa kóktep kirip, metall synyǵy, qozǵaltqysh bólshekteri, kemedegi baılanys quraldary men ekıpaj músheleriniń jeke zattaryn qara naryqta qaıta satý úshin tonaıdy. Sarapshylar ǵalamdyq pandemııa kesirinen jumyssyz qalǵandar esebinen qaraqshylyq áreketke baratyndar sany artýy múmkin ekenin aıtyp, alańdaýshylyq bildirip otyr.