Úkimet basshysy osy máselege baılanysty tıisti oryndar jumysyn synǵa aldy
Úkimet úıinde Premer-Mınıstr Serik Ahmetov azyq-túliktiń jáne janar-jaǵarmaıdyń negizgi túrleriniń baǵalary jóninde selektorlyq keńes ótkizdi, dep habarlady Premer-Mınıstrdiń baspasóz qyzmeti.
Úkimet basshysy osy máselege baılanysty tıisti oryndar jumysyn synǵa aldy
Úkimet úıinde Premer-Mınıstr Serik Ahmetov azyq-túliktiń jáne janar-jaǵarmaıdyń negizgi túrleriniń baǵalary jóninde selektorlyq keńes ótkizdi, dep habarlady Premer-Mınıstrdiń baspasóz qyzmeti.
Keńesti ashqan Premer-Mınıstr 11 qazandaǵy Úkimettiń keńeıtilgen otyrysynda Memleket basshysynyń turaqtandyrý qorlarynyń qyzmetine qaramastan birqatar áleýmettik mańyzdaǵy ónimder baǵalarynyń aıtarlyqtaı óskenine nazar aýdarǵanyn basyp aıtty.
Statıstıka agenttiginiń tóraǵasy Álıhan Smaıylov habarlaǵandaı, aǵymdaǵy jyldyń 10 aıynda eldegi ınflıasııa 3,6 paıyz deńgeıinde qalyptasty. Jyldyń qorytyndysy boıynsha ınflıasııa 5,5 paıyzdan aspaıdy dep kútilýde.
«Jalpy alǵanda, ótken 10 aıdaǵy ınflıasııa kólemi joǵary emes jáne jyldyń qorytyndysy boıynsha boljanǵan mánnen aspaıdy. Degenmen, eldegi ınflıasııanyń osyndaı tómen deńgeıine qaramastan, birqatar óńirlerde áleýmettik mańyzy bar jekelegen azyq-túlik baǵalary ósip otyr. Máselen, jyl basynan beri sút taýarlary jáne jarma ónimderi baǵalarynyń eleýli ósýi baıqalýda», – dedi Á.Smaıylov.
Pasterlengen sút baǵasy Aqmola, Batys Qazaqstan oblystarynda jáne Almaty qalasynda 6-9 paıyzǵa, aıran baǵasy Aqtóbe, Qaraǵandy, Ońtústik Qazaqstan oblystarynda jáne Astana qalasynda 6-11 paıyzǵa ósken. Taýyq jumyrtqasy Jambyl, Qaraǵandy, Mańǵystaý oblystarynda 7-den 23 paıyzǵa deıin qymbattaǵan. Sondaı-aq, birqatar óńirlerde sarymaı, jarmalar, súzbe jáne nan qymbattaǵan.
Á.Smaıylovtyń aıtýynsha, baǵalardyń ósýine azyq-túlik taýarlarynyń ımporty sebep bolǵan, onyń ústine ımport kólemderi ósý ústinde.
Básekelestikti qorǵaý jónindegi agenttiktiń tóraǵasy Bolatbek Qýandyqov áleýmettik azyq-túlik taýarlarynyń baǵalaryn taldaý nátıjelerimen tanystyrdy, onda jarma men makaron ónimderine baǵalar óskeni kórsetilgen.
«Jumyrtqa baǵalarynyń ósý faktileri boıynsha Pavlodar jáne Soltústik Qazaqstan oblystarynyń naryq sýbektilerine qatysty básekege qarsy jasyryn kelisilgen is-qımyl áreketteriniń bolǵan nemese bolmaǵandyǵyn tekserýdi bastadyq. Tamyzdan bastap qazanǵa deıingi aralyqta kóterme saýda baǵasy bul óńirlerde 60 paıyzdan astamǵa artty. Aldyn ala taldaý kórsetkendeı, baǵalardyń kenetten artýyna sebep joq. Demek, jumyrtqa baǵasy alypsatarlyq túrdegi kelisim sheńberinde arttyryldy degen boljam bar», – dep habarlady B.Qýandyqov.
2013 jyly ol basqaratyn agenttik azyq-túlik naryǵy sýbektilerine qatysty 7 tekserý júrgizipti. Sonyń nátıjesinde 10 naryq sýbektisiniń antımonopolııalyq zańnamany buzýy faktileri anyqtalǵan. Basqa da birqatar tekserýler júrgizilýde.
«Baǵanyń artýyna ne sebep? Domınanttardyń kelisimi qaı jerde júrgiziledi? Dálelder men naqty sebeptersiz baǵa nege ósedi? Osyǵan turaqty túrde taldaý júrgizýlerińiz kerek», – dep talap etti Úkimet basshysy B.Qýandyqovtan.
«Áleýmettik nanǵa qatysty. Oblys ákimi birinshi suryptaǵy nanǵa baǵanyń turaqtylyǵyn qamtamasyz ete almaı ma? Aýyl sharýashylyǵy mınıstrligi óńirlerdi unmen qamtamasyz etý máselesin nege sheshpeıdi? Kez kelgen óńir Turaqtandyrý qorlarynan un ala alady. Nanǵa qatysty osy máselelerdi sheshýimiz kerek. Jer-jerlerdegi ákimder osymen aınalysýy tıis», – dep tapsyrdy S.Ahmetov budan keıingi sózinde.
Keńes barysynda TMRA basshysy Murat Ospanov aǵymdaǵy jyldyń sońyna deıin AI-92/93 markaly benzınniń baǵasy shekti mólsherden artpaıtynyn málimdedi.
«Qazir monıtorıng júrgizilip jatyr jáne Munaı jáne gaz mınıstrliginiń málimetinshe, barrel quny tómendeýde. Eger 30 kún boıy tómendeý mólsheri 5 AQSh dollary kóleminde saqtalsa, naqty alǵanda 92/93 benzınge baǵa 5 teńgege tómendeıdi», – dep sendirdi ol.
Munaı jáne gaz mınıstri Uzaqbaı Qarabalın de jyldyń sońyna deıin AI-92/93 markaly benzın baǵalarynyń artýyna sebep joqtyǵyn alǵa tartty.
«Janar-jaǵarmaı baǵasynyń turaqtylyǵy óte mańyzdy másele. Sizder jańa aǵymdaǵy jyldyń sońyna deıin AI 92/93 markaly benzınge baǵa óspeıtindigin aıttyńyzdar. Sonymen birge, kelesi, 2014 jyly janar-jaǵarmaı baǵasy qandaı bolatynyn naqty boljaýymyz kerek», – dep basyp aıtty S.Ahmetov.
Kún tártibindegi másele boıynsha Aqtóbe, Qostanaı, Almaty, Qaraǵandy, Aqmola oblystarynyń ákimderi sóz sóıledi.
Úkimet basshysy baǵalardyń ózgerýine «jasyryn kelisý» sekildi áreketterdiń áser etetindigin atap ótti. Osyǵan baılanysty, Ekonomıka mınıstrligine Aýyl sharýashylyǵy mınıstrligi jáne Básekelestikti qorǵaý jónindegi agenttikpen birlese otyryp óńirlerge qatysty azyq-túliktiń negizgi túrlerine baǵalardy boljaý ádistemesin jasaýdy tapsyrdy.
«Áleýmettik mańyzy zor bolǵandyqtan baǵalardyń turaqtylyq máselesi mınıstrlerdiń de, ákimderdiń de erekshe baqylaýynda bolýy tıis. Ákimderge naryqty azyq-túlik taýarlarymen molyqtyrý boıynsha qosymsha sharalar qoldanýdy jáne baǵalardy baqylaýdy kúsheıtýdi tapsyramyn», – dep qorytyndylady otyrysty Serik Ahmetov.