Manash Qozybaev atyndaǵy Soltústik Qazaqstan ýnıversıtetinde «Ulttyń abyroıyn ulyqtaǵan» degen taqyrypta ǵylymı-tájirıbelik konferensııa ótti.
Alqaly basqosý jerlesimiz, jazýshy-jýrnalıst, Jazýshylar odaǵynyń múshesi, Prezıdent grantynyń ıegeri, Jýrnalıster odaǵy syılyǵynyń laýreaty, basqa da marapattardyń ıegeri Jaqsybaı Samrattyń 60 jyldyq mereıtoıyna arnalyp, qýanyshqa zııaly qaýym, qoǵamdyq uıym ókilderi, qalamdas áriptesteri ortaqtasty.
Jıynǵa moderatorlyq etken eńseli oqý ordasynyń prorektory, tarıh ǵylymdarynyń doktory Aqmaral Ybyraeva alǵashqy sózdi oblys ákiminiń orynbasary Ǵanı Nyǵymetovke berdi. Ǵanı Saqtaǵanuly aımaq basshysy Qumar Aqsaqalovtyń atynan mereıtoı ıesin quttyqtap, ıyǵyna shapan japty. «Shyǵarmashylyq talantyńyzben kórinip, qıyndyǵy da, qyzyǵy da mol jýrnalıstıka salasynda tynymsyz eńbek etip kelesiz. Qalamy júırik qarymdy qalamger retinde tanyldyńyz. Abylaıdyń aq úıin qaıtadan qalpyna keltirýge zor úles qostyńyz», dedi óńir basshysynyń orynbasary.
Ýnıversıtet professory, fılologııa ǵylymdarynyń kandıdaty Janar Talaspaeva Esil óńiriniń ardaqty azamaty jaıly baıandama jasap, shyǵarmashylyq, azamattyq qyrlary jaıly áńgimeledi. Respýblıkalyq «Egemen Qazaqstan» gazetinde 16 jyl boıy eńbek etip kele jatqan onyń azamattyq ustanymy aıqyn. Qaı shyǵarmasyn alsaq ta, bir demmen oqylyp, oqyrmandy qyzyqtyryp, jetelep otyrady. Munyń ózi jazý mánerin sheberlikpen meńgergenin ańǵartady. Ulttyń abyroıyn, eldiń namysyn bárinen bıik qoıatyn qajyrly qaıratker ártúrli qoǵamdyq qubylystar, tolǵaqty problemalar jaıly oıyn ashyq aıtatyn, shynshyldyqpen jazatyn, ótkir máseleler kótere biletin pýblısıst retinde de tanymal. О́tken ǵasyrdyń 90-shy jyldary qurylǵan «Qazaq tili» qoǵamynyń beldi múshesi retinde qoǵamdyq-saıası oqıǵalarǵa aralasa júrip, shekaranyń shetinde, ókpek jeldiń ótinde turǵan Petropavl qalasynyń baıyrǵy ataýy Qyzyljar ekenin, osynda «Abylaıdyń aq úıi» ornalasqanyn bultartpas arhıv materıaldarymen dáleldeı bilgen azamattardyń biri. Baıandamashy jazýshynyń ákimshil-ámirshil júıege qarsy joıqyn bulqynyspen qarsy shyǵyp, eldikke, órlikke umtylǵan qazaqtyń sanaly jastarynyń beınesin somdaǵan «Biteý jara», Qazaqstannyń táýelsiz el bolyp beký, damý shyrǵalańdaryn, ótpeli ótkelderin baıandaıtyn «О́zgelendi bul ǵalam», «Buralań zaman» romandaryna taldaý jasap, sol kezeńderdiń oqıǵalaryn sheber tilmen shynaıy túrde jetkize bilgenin tilge tıek etti.
Moderator ara-arasynda mereıtoı ıesiniń atyna kelgen quttyqtaý hattarmen de tanystyryp otyrdy. Parlament Senatynyń spıkeri Máýlen Áshimbaevtyń, Parlament Májilisiniń depýtaty Abaı Tasbolatovtyń ystyq lebizge toly júrekjardy tilekterin oqyp berdi. Qazaqstan joǵary mektebi Ulttyq ǵylym akademııasynyń akademıgi, respýblıkanyń eńbek sińirgen qaıratkeri Zarqyn Taıshybaı, oblystyq kásipodaqtar ortalyǵynyń tóraǵasy Erik Nuraqaev, oblystyq «Soltústik Qazaqstan» gazetiniń bas redaktory Erbaqyt Amantaı, polısııa departamenti bastyǵynyń orynbasary Qapez Dáýletbaev, taǵy basqalary jerlesimizdiń shalqar shyǵarmashylyq shabytynan týǵan týyndylaryna degen oqyrmandardyń súıispenshiligin jetkizdi. Onlaın arqyly habarlasqan belgili kompozıtor Jolaman Tursynbaev, balalar jazýshysy Tolymbek Ábdiraıym, bıologııa ǵylymdarynyń doktory Áıip Ysqaqov shyǵarmashylyq tabys tiledi.
Minbege kóterilgen respýblıkalyq «Egemen Qazaqstan» gazetiniń jaýapty hatshysy Samat Musa basqarma tóraǵasy Darhan Qydyráliniń quttyqtaý hatyn oqyp berip, syı-sııapat jasady. «Jákeń ekeýmiz qurdaspyz, bir jylǵy tólmiz. 2002 jyldan beri qoıan-qoltyq jumys istep kelemiz. Ujymda úlken bedelge ıe. Eńbekqor, ultynyń patrıoty. 30-ǵa jýyq alys-jaqyn shetelderde bolyp, Elbasynyń jumys saparlary jaıly joljazbalar sıklin jarııalady»,– dedi ol.
Konferensııaǵa qatysýshylar tanymal qoǵam qaıratkeri, «Qaharmandar» respýblıkalyq uıymynyń tóraǵasy, saıası qýǵyn-súrgin taqyrybyn indete zertteýshi-ǵalym Sabyr Qasymovtyń sózin úlken tebirenispen tyńdady. «Mundaı taǵylymdy ǵylymı-praktıkalyq jıyndardyń uıymdastyrylýy teriskeı óńirler úshin mańyzy aıryqsha. Bul – Maǵjan Jumabaev, Smaǵul Sádýaqov, Jumaǵalı Tileýlın sııaqty Alash arystary ósip-óngen óńirde týǵan Jaqsybaı baýyrymnyń ómir jolyn nasıhattaý, el men jerge degen perzenttik mahabbatyn tanytý ǵana emes, uǵa bilgen adamǵa onyń shyǵarmalary arqyly otarshyldyq, keńestik bılik attaryn tarıhtan óshirýge tyrysyp, esimderin ataýǵa tyıym salǵan, qazaq halqynyń bostandyǵy, táýelsizdigi jolynda ómirin qıǵan qaharmandarymyzdy ulyqtaýdyń bir úlgisi bolsa kerek. Ulttyq ustanymdar tóńireginde ólketanýshylar, jýrnalıster, ǵalymdar qoǵamdyq oı-pikirler qozǵaǵanymen, odan ári jalǵasyn tappaı, túrli sebeptermen sozylyp ketetini bar. Bul ásirese soltústik aımaqtarǵa tán. Qazaq halqynyń qanshama birtýar azamattary keńestik-totalıtarlyq zamanda repressııaǵa ushyrasa da, olardyń máńgi ólmes rýhy urpaqtaryn jelep-jebep keledi. Sol kezdegi qaharman tulǵalardyń erligi men órligi bizderge qaldyrylǵan amanat ispettes. Qazaq eliniń azattyǵy jolynda jan tásilim etken, sheıit ketken arystardy baǵalaı bilsek, tarıhı turǵydan ádilettik qalpyna keltiriler edi», dedi belgili zańger jınalǵandarǵa úlken oı tastap.
Konferensııa sońynda mereıtoı ıesi jýrnalıstıka salasyndaǵy kópjyldyq eńbegin baǵalap, qurmettegen jerlesterine rızashylyq sezimin bildirip, alǵysyn aıtty.
Soltústik Qazaqstan oblysy