Shveısarııada Irannyń ıadrolyq baǵdarlamasyna baılanysty «altylyq» kezdesýi aıaqtaldy. Sóıtip, Tehran ózine Batys sarapshylaryn jiberetin jáne jańa atom qýatyn damytpaıtyn boldy. Sondaı-aq, Iranda jarty jyl boıy ýran 5 paıyzdan astamǵa baıytylmaıdy.
Sharaına
Irannyń jeńisi retinde baǵalanýda
Shveısarııada Irannyń ıadrolyq baǵdarlamasyna baılanysty «altylyq» kezdesýi aıaqtaldy. Sóıtip, Tehran ózine Batys sarapshylaryn jiberetin jáne jańa atom qýatyn damytpaıtyn boldy. Sondaı-aq, Iranda jarty jyl boıy ýran 5 paıyzdan astamǵa baıytylmaıdy.
Esesine Batys Iranǵa qatysty qoldanylyp kele jatqan sanksııalardy aıtarlyqtaı jeńildetedi. Atap aıtqanda, Tehranǵa shekteýler qoıylǵanymen, kómirsýtegin Eýropa Odaǵy elderi men AQSh-qa satýǵa múmkindik berilip otyr. Sonymen qatar, munaı hımııasy men avtomobıl ónerkásibine qatysty sanksııalar álsireıtin bolady. Buǵan qosa, jańa shekteýler qarastyrylmaıdy. Qabyldanǵan sheshimge qazirdiń ózinde «tarıhı» degen aıdar taǵylýda. Irandyqtar bul kelisimdi óz eliniń jeńisi retinde baǵalap otyr.
Ýkraına oppozısııasynyń narazylyǵy
Keshe erteńgisin Kıevtiń Eýropa alańyndaǵy Mınıstrler kabıneti ǵımaratynyń janynda mılısııa men eýroıntegrasııany jaqtaýshylar arasyndaǵy qaqtyǵys qaıta jalǵasty. Quqyq qorǵaý organdarynyń qyzmetkerleri mıtıngke jınalǵandarǵa qarsy rezeńke taıaqshalar men kózden jas aǵyzatyn gaz qoldandy.
«Interfaks» agenttiginiń aıtýynsha, Eýropamen ıntegrasııany jaqtaýshylar Ýkraına Mınıstrler kabınetiniń ǵımaratyna ony qorshaýǵa alý úshin jınalǵan. Topta kem degende 500 adam bolǵan. Al ǵımaratqa kireberisti «Búrkit» arnaıy bólimshesiniń 100-150 jasaǵy qorǵap turǵan. «Eýromaıdanǵa» qatysýshylardyń úkimet úıin shabýyldaýǵa áreket etýine baılanysty Ýkraına ishki ister mınıstrligi qylmystyq is óndirisin bastaǵan. Mıtıngke resmı málimet boıynsha 23 myń adam qatyssa, eýroıntegrasııany jaqtaýshylar 100 myń adam jınaldy dep otyr.
Qarsy, biraq kelisýge májbúr
AQSh, Japonııa jáne Ońtústik Koreıa Qytaıdyń talas týǵyzyp kele jatqan aýmaqta Áýe shabýylynan qorǵanysty birizdendirý aımaǵyn qurǵanyna narazylyqtaryn bildirdi. Endi áýe kompanııalary osy aýmaq ústinen ushyp ótken kezde jergilikti bılikti qulaǵdar etýi tıis.
AQSh qorǵanys mınıstri Chak Heıgel bul jaıt ahýaldy turaqsyzdandyra túsedi dep málimdedi. Onyń sózine qaraǵanda, Qurama Shtattar óńirdegi áskerı operasııalardan bas tartpaq emes. Japonııa premer-mınıstri Sıdzo Abe de jańa aımaqtyń paıda bolýy boljaýǵa bolmaıtyn saldarlarǵa soqtyrýy yqtımal ekenin kóldeneń tartty. Biraq atalǵan memleketter qalyptasqan áýe joldary ońtaıly bolǵandyqtan, ózderiniń ushý marshrýttaryn ózgertpeıtinin, sondyqtan Qytaı basshylyǵyn qulaqtandyryp otyratyndyqtaryn jarııa etti.
Qysqa qaıyryp aıtqanda:
● Vetnamda qatty jaýǵan nóser týyndatqan sý tasqynynan qaza tapqandar sany 41 adamǵa jetti. 80 myń vetnamdyq óz úılerin tastap shyǵýǵa májbúr bolsa, 74 adam túrli jaraqat alǵan. 5 adam joǵalǵandar qatarynda. 4,3 myń gektar egistik alqaby sý astynda qalǵan.
● Aýǵanstannyń Paktıka provınsııasynda jol jıegine jasyrylǵan bomba jarylyp, sonyń saldarynan bir otbasynyń 7 balasy opat boldy. Balalar úı mańynda oınap júrip, bombaǵa kezdeısoq tıip ketken. Sol úıdiń taǵy 3 balasy túrli dene jaraqatyn alǵan.
● Quqyq qorǵaýshylar Zımbabve astanasy – Harare qalasynyń myńdaǵan turǵyny tyrysqaq aýrýyna shaldyǵýy yqtımal ekenin eskertti. Harareni aýyz sýmen qamtamasyz etý – búginde úlken problema. Sondyqtan, osydan 5 jyl buryn atalǵan aýrý 4 myńnan astam adamnyń ómirin qıǵan edi.
● Máskeýde 4-24 qarasha aralyǵynda ótken «Pravoslavıeli Rýs. Romanovtar» kórmesin 300 myńnan astam adam tamashalaǵan. Kórmege kún saıyn ortasha eseppen 13-17 myń aralyǵynda adam kelgen. Ekspozısııalardyń negizgi bóligi Reseıdiń HVII ǵasyrdan bastap búgingi kúnge deıingi tarıhynan syr shertedi.
Qaza taýyp jatqan balalar kóp
Eki jarym jyldan beri azamat soǵysy júrip jatqan Sırııada jýyr mańda tynyshtyq ornaıtyny baıqalmaıdy. Sońǵy málimetterge qaraǵanda, búlikshilerdiń joǵary shendi jetekshileriniń biri, «Lıva ál-Taýhıd» uıymynyń basshysy Abdýl Qadyr as-Salehtyń kózi joıylǵan.
As-Saleh Aleppo provınsııasyndaǵy búlikshiler qolyndaǵy aerodromǵa jasalǵan áýe shabýyly barysynda alǵan jaraqatynan kóz jumǵan sekildi. «Lıva ál-Taýhıd» Aleppodaǵy basty búlikshiler toby bolyp tabylady. Keıbir málimetterge qaraǵanda, onyń sapynda 8 myń men 10 myńnyń aralyǵynda búlikshiler bar kórinedi. Soǵys bastalǵan ýaqyttan beri elde 113 myń adam qaza tapsa, solardyń 11 myńy 17-ge tolmaǵan búldirshinder men jasóspirimder eken.
Berlýskonıdi keshirýge negiz joq
Italııa prezıdenti Djordjo Napolıtanonyń aıtýynsha, eldiń burynǵy premer-mınıstri Sılvıo Berlýskonıdiń isine aralasýǵa eshqandaı negiz joq. Prezıdenttiń sózine qaraǵanda, Berlýskonı naqty aıyptaýlar boıynsha qamaýǵa alynǵan, sondyqtan memlekettik ınstıtýttarǵa qurmetpen qaraýy tıis.
Munyń aldynda Berlýskonı Napolıtano ony «qoǵamdyq jumystar masqarasynan» qutqarý úshin keshirim jasaýy tıis dep málimdegen edi. Biraq prezıdentke resmı ótinish ázirshe joldanbapty. 27 qarashada Italııa Senatynda alaıaqtyq jasady degen aıyp taǵylǵandyqtan, Berlýskonıdi osy palata quramynan shyǵarý týraly másele qaralatyn bolady. Burynǵy premerdiń ózi bolsa, oǵan qarsy is qoldan qurastyrylǵan degendi kóldeneń tartady. Berlýskonı bir jylǵa bas bostandyǵynan aıyrylǵan bolatyn.
AQSh-tyń batysynda – qarly boran
AQSh-tyń batys jaǵalaýlarynda qarly boran oıran salyp tur. Qalyń qar ótken beısenbide Ońtústik Kalıfornııada bastalsa, búginde shyǵys arqyly Tehasqa jaqyndap keledi. Qar, sondaı-aq, Nıý-Meksıko, Soltústik jáne Ońtústik Karolına, Oklahoma jáne Lýızıananyń soltústiginde kútilip otyr.
Sınoptıkterdiń boljaýynsha, qarly boran 27 qarashaǵa qaraı qazirgiden de kúsheıe túspek. О́tken aptanyń sońynan beri qarly boran týyndatqan avtomobıl apattarynan kem degende 13 adam qaza tapqan. Buǵan qosa, 11 myńnan astam adam elektr jaryǵynsyz qalǵan. Dallastyń halyqaralyq áýejaıynda 24 qarashada 300 ushaq ushpaı qalǵan. Mundaı jaǵdaı basqa áýejaılarda da kórinis bergen.
Internet materıaldary negizinde ázirlendi.