Meniń kindik kesip, týǵan jerim – Ázerbaıjan. Altyn besik aýylym Taýly Qarabaqtyń qaqtyǵys alańynda ornalasqandyqtan, balalyq, bozbala shaǵymnyń alańdaýshylyqpen ótkenin jasyra almaımyn. Qazir onda ata-anam, baýyrlarym turady. Al, meniń Qazaqstandy meken etip jatqanyma otyz jyldan asyp barady. Taǵdyrymnyń dili de, dini de bir, tili uqsas, jany jaısań qazaq aǵaıyndarmen toǵysqanyna esh ókinbeımin. О́zim de, otbasym da Qazaqstannyń tolyqqandy azamattary retinde bar maqsat-múddemizdi, kúsh-jigerimizdi Otanymyzdyń gúldenýine arnap kelemiz.
Meniń kindik kesip, týǵan jerim – Ázerbaıjan. Altyn besik aýylym Taýly Qarabaqtyń qaqtyǵys alańynda ornalasqandyqtan, balalyq, bozbala shaǵymnyń alańdaýshylyqpen ótkenin jasyra almaımyn. Qazir onda ata-anam, baýyrlarym turady. Al, meniń Qazaqstandy meken etip jatqanyma otyz jyldan asyp barady. Taǵdyrymnyń dili de, dini de bir, tili uqsas, jany jaısań qazaq aǵaıyndarmen toǵysqanyna esh ókinbeımin. О́zim de, otbasym da Qazaqstannyń tolyqqandy azamattary retinde bar maqsat-múddemizdi, kúsh-jigerimizdi Otanymyzdyń gúldenýine arnap kelemiz.
Men – Qazaqstandy júregimmen qalaǵan jandardyń birimin. Mektep qabyrǵasynda júrgende bul el týraly kóp estigenmin. 1984-1986 jyldary kútpegen jerden azamattyq boryshymdy óteýge Qazaqstanǵa attanǵanda keýdemdi shattyq kernep sala berdi. Sóıtip, tyń ıgerý jyldary boı kótergen Tımırıazev aýdany Aqsýat aýylynda áskerı boryshymdy óteý baqyty buıyrdy. Ushqan qustyń qanaty, júgirgen ańnyń tuıaǵy talatyn qazaqtyń aqseleýli saıyn dalasy men adamdardyń meıirim shýaǵy tógilgen jyly júzderiniń jaqyn tartqany sonshalyq, qalaı turaqtap qalǵanymdy da bilmeı qaldym. Sodan bergi ǵumyrymnyń Qyzyljar óńirinde jalǵasyp kele jatqanyn Alla taǵalanyń mańdaıyma jazǵan úlken syıyna balaımyn.
Qarapaıym shahter men baspahana terýshisiniń otbasynda tálim-tárbıe alǵan maǵan qıyndyqqa moıymaý, qoǵamdyq paıdaly eńbekten qashpaý úırenshikti ádet bolatyn. Onyń ústine áskerge deıin eńbektiń dámin biraz tatqanym bar. Paıdasy molynan tıdi. Jergilikti turǵyndar arasynan nebir jaqsy adamdardy kezdestirip, sharapatty shapaǵatyn, qaıyrymdy qamqorlyǵyn kórdim. Birin aǵa, birin ini tuttym. Soltústik Qazaqstan oblysynyń qurmetti azamaty, qoǵam qaıratkeri Jaqsylyq Ysqaqov, Qazaqstannyń Eńbek Eri, ataqty dıqan Gennadıı Zenchenko sekildi bedeldi basshylardyń tálim-tárbıesi, bergen aqyly, kórsetken ulaǵaty sheksiz boldy. Osylaısha Táýelsizdiktiń araıly tańyn birge qarsy aldyq.
Keıbireýler turmystyń jeńil jaǵyn izdep, ózge jaqqa kóship jatty. Men ondaı oıdan boıymdy aýlaq saldym. Eńbek ete júrip, qysylǵanda qolushyn beretin dostar taptym. Qandaı qıyndyqty bastan ótkersek te, dostyǵymyzǵa, birligimizge esh syzat túsire almady. Kerisinshe, quryshtaı birligimiz qalyptasty. Árli-berli ótkende Qyzyljar aýdanyna qarasty Iаkor aýylyna soqpaı ketpeımin. Qurylys brıgadasy quramyndaǵy ár ult ókilderinen quralǵan óndirdeı jastar osyndaǵy klýbty bezendirýge bar ónerimizdi salyp edik. Áli kúnge deıin sol qalpynda tur. Beıne bir el Táýelsizdiginiń alǵashqy jyldarynan qalǵan turaqtylyqtyń bir belgisindeı janyma erekshe ystyq kórinedi.
Qap taýyna bir barǵanymda týǵan-týystarym týǵan jerge oralýyma asa yqylasty bolyp, qalýǵa úgittegeni bar. Bul kezde Qazaqstanǵa ábden baýyr basyp qalǵan edim. Úgitterine kónbesimdi bilse kerek, áke-sheshem aq batalaryn berip, shyǵaryp saldy. Kele sala Petropavl qalasynda alǵashqy kooperatıvti uıymdastyrýshylardyń biri retinde óz úlesimdi qosýǵa umtyldym. Iesiz qalǵan jylyjaı kombınaty men 200 mıllıon teńgege jýyq shyǵynǵa batqan «Vesna» AQ-ty alǵanymda «basyńa masyl tilep aldyń ǵoı» degen músirkeý sózderdi kóp estidim. Sol kezderi Qazaqstannyń bolashaǵyna sengennen keıin osyndaı nartáýekel iske bel býdym desem, bireý sener, bireý senbes edi. Eń bastysy, otandyq bıznes damýynyń bastapqy kezeńinde jaýynnan keıingi báısheshekteı jappaı búrshik jaryp, órken jaıa bastaǵan tyń bastamalar Elbasy tarapynan qoldaý taýyp otyrsa, jaýapkershilikpen jumys istemeýge esh qaqymyz joq edi.
Búginde kásipkerliktiń órkendeýine naqty qamqorlyq jasalyp keledi. Kóptegen ákimshilik kedergiler joıyldy. Munyń ózi Prezıdenttiń kásipkerlerdi ulttyq ekonomıkanyń turaqty ósimin qamtamasyz etýge shaqyrýyna qosylǵan naqty qadamǵa aınaldy. Búginde ózim jetekshilik etetin «Naýryz-2030» JShS jylyna 3 myń tonnadaı kókónis ósirýmen aınalysady. Jylyjaı sharýashylyǵy men «Túrkistan» oıyn-saýyq kesheninde 250-deı adam turaqty jumys isteıdi. Maýsymdyq naýqan kezderinde olardyń sany 300-den asady. Kókónistiń onnan astam túrin qoljetimdi baǵamen satý erte kóktemnen qońyr kúzge deıin jalǵasady.
Osyndaıda Memleket basshysynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» baǵdarlamalyq maqalasyndaǵy «jańǵyrtýdyń tabystylyǵy úshin árbir azamattyń óz Otanyna paıdaly bolýy óte mańyzdy» degen sózderi oıǵa oralady.
О́mirde óz ornyńdy tapqannan, ózińdi elge, jerge, qoǵamǵa paıdaly tulǵa retinde sezinýden asqan baqyt joq-aý, sirá! Anam qonaqqa kelip, jer shoqtyǵy – Kókshetaý aımaǵyna aparyp, armansyz qydyrttym. Qashan ketkenshe qazaqstandyqtardyń bir-birine degen syılasymdylyǵyn, tatý-tátti birligi men tirligin aýzynan tastamady. «Syrt kóz – synshy» degen. Táýelsizdiktiń qadir-qasıetin, dostyqtyń uly kúshin, el halqynyń yntymaq-birligin osyndaıda uǵynady ekensiń.
Elbasymyzdyń syndarly ult saıasatynyń uly jemisin Qazaqstandy meken etken ulttar men ulystardyń, konfessııalardyń qaı-qaısysy bolsyn maqtan etedi. Qazaqstan halqy Assambleıasy men onyń oblystardaǵy fılıaldarynyń basty maqsaty qoǵamdyq kelisimdi baıandy etýge jumyldyrylǵan. Tek bizdiń óńirde júzden astam etnomádenı birlestik jumys isteıdi. Onyń biri ózim kóp jyl jetekshilik etken ázerbaıjan etnomádenı birlestigi qazaq halqynyń tilin, salt-dástúrin, ádet-ǵurpyn nasıhattaýda kóp eńbek sińirdi. Petropavl qalasyndaǵy №17 ulttyq órkendeý mektebindegi 11 bólimde túrli ult ókilderi ózderiniń jáne turǵylyqty halyqtyń tarıhymen, mádenıetimen, ónerimen jan-jaqty tanysady.
Meniń ul-qyzdarymnyń bári Qazaqstanda týyp-ósti, osynda erjetip, bilim aldy. Shetinen qazaq tiline jetik. Ulym Babek Qurmanǵazy atyndaǵy ulttyq konservatorııanyń qobyz synybynda bilim alady. Ol da, ekinshi ulym Tabrız da halyqaralyq baıqaýlardyń jeńimpazy. Olardyń Qazaqstannyń maqtan tutar azamattary bolyp ósip kele jatqany qýantady. О́zim oblystyq máslıhattyń depýtattyǵyna úsh ret saılanyp, saılaýshylardyń senimin aqtaýǵa bar kúsh-jigerimdi arnap kelemin.
Taǵdyrdyń tálkegimen emes, ózimniń júrek qalaýymmen osynda qalyp, tańdaýdan adaspaǵanyma rızamyn. Meniń, otbasymnyń qorǵany – Elbasymyz jáne týǵan úıimizge aınalǵan Qazaqstanym!
Gıýlaga ILDYRYMOV,
oblystyq máslıhattyń depýtaty, ázerbaıjan etnomádenı birlestiginiń múshesi, «Qurmet» ordeniniń ıegeri.
Soltústik Qazaqstan oblysy.