Keshe Aqordada Memlekettik hatshy Marat Tájın Danııa, Ýrýgvaı, Bosnııa jáne Gersegovına, Chernogorııa, Bangladesh, Fılıppın, Zambııa, Nıgerııa, Fıdjı elderiniń Qazaqstandaǵy Tótenshe jáne ókiletti elshilerinen senim gramotalaryn qabyldady.
Keshe Aqordada Memlekettik hatshy Marat Tájın Danııa, Ýrýgvaı, Bosnııa jáne Gersegovına, Chernogorııa, Bangladesh, Fılıppın, Zambııa, Nıgerııa, Fıdjı elderiniń Qazaqstandaǵy Tótenshe jáne ókiletti elshilerinen senim gramotalaryn qabyldady.
Bul kúngi eki jaqty kezdesýler barysynda memleketaralyq qarym-qatynastardyń jaı-kúıi men damý keleshegi talqylandy. M. Tájın jahandaný jaǵdaıyndaǵy saıası, ekonomıkalyq, saýda, ǵylymı, mádenı jáne basqa da salalardaǵy yntymaqtastyqty damytý memleketterdiń ulttyq múddelerine saı keletinine toqtaldy.
Kezdesýde dıplomatııa salasyndaǵy jetistik ózara yqpaldastyq deńgeıimen anyqtalatyny aıtyldy, sondaı-aq, Qazaqstannyń áleýeti zor aımaqtarǵa jatatyn Afrıka men Latyn Amerıkasymen yntymaqtastyqty jandandyrýǵa baǵyttalǵan dıplomatııalyq bastamalarynyń jańa baǵyty belgilendi.
Sonymen qatar, taraptar keń aýqymdy máseleler boıynsha baılanystar aıasyn keńeıtýge ózara tereń múddeliliktiń baryn da nazardan shyǵarmady. Bul rette, halyqaralyq jáne óńirlik qaýipsizdik, ózara ınvestısııalar jáne saýda, balamaly energııa kózderi men agroónerkásiptik keshen, bilim jáne ǵylym, týrızm sekildi salalar aıryqsha ataldy. Kezdesýler, sondaı-aq, damý áleýeti zor óńirler retinde Afrıkamen jáne Latyn Amerıkasymen yntymaqtastyqty jandandyrýǵa baǵyttalǵan Qazaqstannyń dıplomatııalyq bastamalarynyń jańa baǵytyn belgilep berdi.
Marat Tájınmen ótken kezdesýden keıin elshiler jýrnalısterdiń aldyna shyǵyp, ekijaqty baılanystar týraly aıtyp berdi. Máselen, Danııa Koroldiginiń Qazaqstandaǵy Tótenshe jáne ókiletti elshisi Tomas Vınkler Danııa men Qazaqstan arasyndaǵy dıplomatııalyq baılanystardyń damýyna barlyq jaǵynan múmkindik baryn aıta kele, ózine júktelgen senim údesinen shyǵýǵa kúsh salatynyn atap ótti. «Tıimdi áriptestikti damytýǵa bolatyn salalarǵa kommersııalyq, aýyl sharýashylyǵy men «jasyl energııa» salalaryn jatqyzýǵa bolady. Bul salalar boıynsha eki el yntymaqtastyqqa qol jetkizdi. Men búgingi kúnge deıingi qalyptasqan osy yntymaqtastyqty odan ári damytýǵa kúsh-jigerimdi jumsaıtyn bolamyn. Biz terrorızmmen kúres máselesinde de tıimdi qarym-qatynas ornatamyz dep oılaımyn», dedi ol óz sózinde.
Al Nıgerııanyń Qazaqstandaǵy Tótenshe jáne ókiletti elshisi Alhajı Týkýr Manı: «Men búgin Qazaqstannyń Memlekettik hatshysyna Senim gramotasyn tabys ettim. Biz sizderdiń elderińizben óte tyǵyz qarym-qatynas ornatqanbyz. Qazaqstannyń Ortalyq Azııadaǵy ustanymy Nıgerııanyń Afrıkadaǵy ustanymyna uqsas keledi. Biz Qazaqstannyń Syrtqy ister mınıstrligimen, kommersııalyq palatasymen birlesken mıssııamyzdy júzege asyrsaq deımiz. Bolashaqta Qazaqstan men Nıgerııanyń bıznesmenderi tyǵyz baılanystaǵy birlesken jumystardy júzege asyrady dep oılaımyz. Nıgerııa – tabıǵı resýrstarǵa baı el. Sol sebepti, Qazaqstannyń bıznesmenderi osyndaı múmkindikti paıdalanýy kerek dep sanaımyn», dedi óz sózinde.
Ýrýgvaıdyń elimizdegi Tótenshe jáne ókiletti elshisi Anıbal Kabral Segalebranyń oıy da óz áriptesterinen alshaq ketpedi. Ol da Ýrýgvaıdyń Qazaqstanmen dıplomatııalyq baılanystardy nyǵaıtýǵa múddeli ekendigin bildirdi. «Qazaqstan – Ýrýgvaı úshin mańyzdy el. Sebebi, sizderdiń elderińiz Batys pen Shyǵystyń bel ortasynda ornalasqan. Sol arqyly ol barlyq elder arasyn baılanystyratyn kópirge aınalýda. Biz Qazaqstannyń 22 jyl ishinde qol jetkizgen jetistikterine tántimiz. Qazirgi tańda ol – joǵary ındýstrııalandyrylǵan Ortalyq Azııadaǵy kóshbasshy el. Bıyl Qazaqstan-Ýrýgvaı dıplomatııalyq baılanysynyń ornaǵanyna 20 jyl toldy. Osydan eki jyl buryn biz Astanada ózimizdiń konsýldyǵymyzdy ashtyq. Demek, aldaǵy ýaqytta ekijaqty áriptestigimizdi ilgerilete beretin bolamyz. Qazaqstannyń Memlekettik hatshysymen bolǵan kezdesý kezinde ekonomıkalyq, saıası, mádenı salalar boıynsha yntymaqtastyqty jandandyrýǵa nazar aýdardyq», dedi elshi.
Chernogorııanyń Tótenshe jáne ókiletti elshisi Zoran Iosovıch te jýrnalıstermen júzdesý kezinde eki el dıplomatııasynyń tıimdi tustaryna toqtalyp ótti. Máselen, ol: «Men Chernogorııanyń Qazaqstandaǵy elshisi qyzmetine taǵaıyndalǵanyma qýanyshtymyn. Bizdiń elderimiz arasynda dostyq ráýishke negizdelgen yntymaqtastyq baılanys ornatylǵan. Qazaqstan – úlken, al Chernogorııa – kishkentaı memleket. Alaıda, bizdiń elderimizdiń uqsas tusy kóp», deı kele, bolashaqta bul baılanystar nyǵaıyp, keńeıe túsetinine senim bildirdi.
Fılıppınniń Qazaqstandaǵy Tótenshe jáne ókiletti elshisi Erlında Basılıo ózi tarapynan ekijaqty yntymaqtastyqty damytýǵa kúsh salatynyn jetkize kele, qarjy, ınvestısııa, mádenıet, bilim-ǵylym salalaryn aıryqsha atap ótti. Ol Qazaqstan azamattaryn tabıǵaty ózgeshe Fılıppın jerine saparlap kelýge shaqyrdy. «Fılıppın – 7 myń 107-deı araldarda ornalasqan jyly el. Tabıǵaty da erekshe. Sondyqtan, dostyq nıettegi Qazaqstan azamattaryn bizdiń elimizdi kórip, tamashalaýǵa shaqyramyz», dedi ol.
Bangladesh Respýblıkasynyń Qazaqstandaǵy Tótenshe jáne ókiletti elshisi Mosýd Mannan eki el arasyndaǵy áriptestik baılanys tamyrynyń tereńde jatqanyna toqtala kele, aldaǵy ýaqytta da áriptestik tetigin nyǵaıtý nazarda bolatynyn jetkizse, Fıdjı Respýblıkasynyń elimizdegi Tótenshe jáne ókiletti elshisi Ravındran Robın Naır Qazaqstan men Fıdjı bir-birinen úlken qashyqtyqta ornalasqanymen, bul eki eldi ózara tolyqtyrýǵa tosqaýyl bolmaıtynyn atap ótti.
Bul kúni Bosnııa jáne Gersegovınanyń Tótenshe jáne ókiletti elshisi Ivan Barbalıch pen onyń Zambııadan kelgen áriptesi Frederık Shýmba Hapýnda da sóz alyp, Qazaqstanmen aradaǵy dıplomatııalyq baılanystar jaıly áńgime órbitti.
Láıla EDILQYZY,
«Egemen Qazaqstan».