Qyzylorda oblysy Jalaǵash aýdanynyń aýrýhanasynyń qyzmetkerleri qarsylyq aksııasyna shyqty. Olar mekemeden aılyq jalaqy jónindegi qaryzdaryn tolyq tóleýdi talap etýde.
Qyzylorda oblysy Jalaǵash aýdanynyń aýrýhanasynyń qyzmetkerleri qarsylyq aksııasyna shyqty. Olar mekemeden aılyq jalaqy jónindegi qaryzdaryn tolyq tóleýdi talap etýde.
«Dárigerler aqshanyń ózderi men aıajandarǵa ǵana emes, sonymen qatar bularǵa keletin pasıentterde de jetispeıtinin aıtady. Sondyqtan, olar tıisti dári-dármekterin de satyp ala almaı otyr», dep málimdedi «Jetinshi arna».
Ereýilge shyqqan aýrýhana qyzmetkerleri bas dárigerdiń ýádesine ábden toıǵandaryn jetkizdi. Olar eki aıdan beri jalaqylaryn ala almaı otyr. Al zeınetaqy qoryna aqsha túspegenine odan da kóp bolǵan. Osyny aıtqan medıkter men sanıtarlar barlyq páleniń aýrýhana basshylyǵynan bolyp otyrǵanyna da senimdi.
«Biz mekemeniń qaryzy 92 mln. teńge bolǵanyn da estip otyrmyz. Aýrýhanany benzınmen, azyq-túlikpen jáne dári-dármektermen qamtamasyz etip otyrǵan kásipkerler qaryzdary úshin esepshotty japtyryp tastady. Osy esepshot qalaı ashylady, olar solaı ondaǵy aqshalardyń bárin sypyryp alady, biz taǵy da jalaqysyz qalamyz», – dedi Gúlmıra Mádelhanova.
Aýdandyq ortalyq aýrýhanada qalyptasyp otyrǵan ahýalǵa ondaǵy qyzmetkerler ǵana emes, sonymen qatar, pasıentter de ashý bildirip jatyr. Olar palatanyń ishinde tońǵannan qata bastaǵandaryn aıtyp shaǵynady.
«Palatalarda júrýdiń ózi múmkin emes, sýyqtan aıaǵyń qatyp qalady. Jylyný úshin ylǵı jamylǵy jamylyp otyramyz. Endi mundaı jaǵdaıda qandaı em bolsyn!», – deıdi emdelýshilerdiń biri Qaldygúl Dúısebaeva.
Osy shaǵymnan keıin aýrýhanaǵa prokýratýra qyzmetkerleri keldi. Olar medıkter sózderiniń rasqa shyqqanyn málimdedi.
«Tekserý barysynda aýrýhananyń debıtorlyq jáne kredıtorlyq qaryzdary kórsetilgen akt toltyryldy. Býhgalterııanyń jumysynda da kemshilikter bar ekeni anyqtaldy. Bul aktini biz oblystyq qarjy polısııasyna tapsyrdyq, endi sol jaq prosessýaldy sheshim shyǵarady», – dedi Jalaǵash aýdanynyń prokýrory Hadısha Jumaǵulova.
Aýdandyq aýrýhanadaǵy jaǵdaıdy oblystyq densaýlyq saqtaý basqarmasyndaǵylar da biledi. Mundaǵy jaǵdaıdy qazir olar da baqylaýda ustap otyr. «Al dárigerlerdiń jalaqylary erteń berile bastaıdy», – dep sendirdi basqarma bastyǵynyń orynbasary Sáken Serǵazıev. Sońǵy sátte oblystyq ishki saıasat basqarmasy bastyǵynyń mindetin atqarýshy Álimjan Jarylqaǵanov aýrýhanaǵa 33 mln. teńge aqshanyń jiberilgenin jetkizdi. Osy aqsha jalaqy retinde beriledi. Al qaryzdar kelesi aptada tolyq jabylady.
Qurysh NURYMBET.