Memleket basshysy kótergen bastamalardy júzege asyrý barysy boıynsha keshe Din isteri agenttiginiń tóraǵasy Marat Ázilhanovtyń brıfıngi bolyp ótti. Sondaı-aq, «E-Islam» aqparattyq-aǵartýshylyq ǵalamtor-portaly jáne din máseleleri boıynsha keńes berý men shaǵymdardy qabyldaýǵa arnalǵan «Qaýyrt jeli-114» jobasy tanystyryldy.
Memleket basshysy kótergen bastamalardy júzege asyrý barysy boıynsha keshe Din isteri agenttiginiń tóraǵasy Marat Ázilhanovtyń brıfıngi bolyp ótti. Sondaı-aq, «E-Islam» aqparattyq-aǵartýshylyq ǵalamtor-portaly jáne din máseleleri boıynsha keńes berý men shaǵymdardy qabyldaýǵa arnalǵan «Qaýyrt jeli-114» jobasy tanystyryldy.
Ortalyq kommýnıkasııalar qyzmetiniń resmı ókimi Altaı Ábıbýllaev dinı ekstremızm men lańkestiktiń aldyn alý máselesi Qazaqstanda ǵana emes, Ortalyq Azııada jáne búkil álemde ózekti másele ekendigin aıtyp ótti. Sondyqtan da salt-dástúrimizge ábden sińip, ǵasyrdan-ǵasyrǵa jalǵasyp kele jatqan dástúrli Islam dininiń qundylyqtaryn halyqqa durys túsindirip, jetkizý maqsatynda «E-Islam» ınternet-portaly ashylyp otyr, dedi ol.
Atalǵan ınternet-portal týraly Din isteri agenttiginiń Tóraǵasy M.Ázilhanov jan-jaqty áńgimelep berdi. Onyń aıtýynsha, «E-Islam» ǵalamtor-portalyn Din isteri agenttigi Rýhanı birlik qorymen birigip jasaǵan. Negizinen ǵalamtor-portalynyń qyzmeti elimizdegi dástúrli Islamnyń rýhanı qundylyqtaryn, memlekettik qurylymnyń zaıyrly qaǵıdalaryn nasıhattaýǵa, sondaı-aq, dinı ekstremızm men terrorızmniń taralýynyń aldyn alýǵa baǵyttalypty.
Tusaýy aǵymdaǵy jyldyń 13 qarashasynda kesilgen «E-Islam» ınternet-resýrsynyń 7 negizgi aıdary bar eken. Atap aıtqanda, «Islam», «Qazaqstandaǵy Islam», «Islam jáne zaıyrly memleket», «Islam jáne qoǵam», «Islam – izgilik dini», «Dinaralyq únqatysý» jáne «Mýltımedııa» bolyp bólinedi. Sonymen qatar, 12 qosymsha taqyryptyq aıdarlar da bar kórinedi. Kúndelikti jańartylyp otyratyn jańalyqtarda aǵartýshylyq aqparattar, Islam bilimi, ǵylymy, mádenıeti týraly anyqtamalar berilip otyrmaq. Sondaı-aq, Qasıetti Quran kitabynyń tolyq mazmunymen tanysýǵa, namaz oqý, oraza tutý, zeket tóleýdiń erejeleri men erekshelikteri týraly da mol maǵlumat alýǵa bolady.
Budan basqa, oqyrmandar pikirtalas alańynda ózderin qyzyqtyrǵan problemalar boıynsha oılaryn ortaǵa sala da alady. Dintanýshy-ǵalymdardyń jeke blogtary ornalasqan «Sarapshylar baǵany» árbir portalǵa kirýshiniń saýaldaryna jan-jaqty jaýaptar beretinin de aıta ketý kerek. Portalda kitap qory jınaqtalsa, qazirdiń ózinde myńdaǵan kitaptar qotarylyp alynǵany belgili bolyp otyr. «E-Islam» portalynyń basqa dinı saıttardan ereksheligi – «Dinı radıkalızm qaýipteri» men «Zaıyrlylyq pen dindarlyq» atty aıdarlardyń uıymdastyrylýynda», dedi Din isteri agenttiginiń tóraǵasy.
Taǵy bir málim bolǵany, saıttyń alǵashqy kezeńinde kúndelikti qoldanýshylar sany 3 myńǵa jýyq bolsa, qazirgi kezde kún saıyn olardyń sany myńnan kem túspeıdi eken. Atalǵan ǵalamtor-portalynyń bas redaktory Jasulan Ábdiramanov dástúrli Islam dininiń negizgi qaǵıdalary men qazaq jurtynyń salt-dástúrleri arasyndaǵy ózara baılanystar týraly aıta kelip, jas urpaq sanasyna dástúrli Islam qundylyqtaryn sińirý arqyly teris pıǵyldy dinı ıdeologııa keselderinen saqtaý jumystaryn atqaratyn bolamyz degendi erekshe atady. Portalda qazaq jáne orys tilderinde teris pıǵyldy, jat aǵymdardan ári kúmándi ǵalamtor kózderinen saqtandyrýǵa yqpaly tıetin 2 myńnan asa materıaldar qory jınaqtalypty.
«Qaýyrt jeli-114» aqparattyq-konsýltasııalyq ortalyǵynyń jumysy týraly osy ortalyqtyń jetekshisi Iýlııa Denısenko jan-jaqty málimetter bere ketti. «Qaýyrt jeli-114» ortalyǵy azamattardan jáne uıymdardan din salasyna qatysty saýaldar qabyldaý jáne olarǵa keńes berý úshin, sondaı-aq, teris dinı aǵymdardyń qyzmetinen zardap shekkenderge psıhologııalyq kómek kórsetý úshin qurylyp otyr», dedi ol óz sózinde. Iý.Denısenkonyń aıtýynsha, «Qaýyrt jeli» Qazaqstannyń barlyq aýmaǵyna táýlik boıy qyzmet kórsetedi jáne ol tek elimizdegi ǵana emes, búkil Dostastyq keńistigindegi osyndaı alǵashqy ortalyq bolyp tabylady.
Ortalyq keshege deıin qanatqaqty rejimde jumys istep kelgenine qaramastan, oǵan túsip jatqan qońyraýlar men ótinishter mundaı jobalarǵa qajettiliktiń bar ekenin kórsetýde eken. Jáne de «Qaýyrt jeli» teris dinı aǵymdardan zardap shekkenderge járdem kórsetetin ortalyqtarmen, elimizdiń óńirlerindegi basqa da daǵdarys jáne ońaltý ortalyqtarymen baılanys ornatýda, sondyqtan da túrli másele boıynsha elimizdiń kez kelgen óńirindegi mamandarmen jedel baılanysqa shyǵýdyń múmkindigi zor kórinedi.
Asqar TURAPBAIULY,
«Egemen Qazaqstan».