Túrkistan oblysy Saıram aýdanynyń 25 jastaǵy turǵyny koronavırýs ınfeksııasynyń sımptomsyz túrimen dárigerler baqylaýynda bolǵan. Saıram aýdandyq ortalyq aýrýhanasyna júktiligine baılanysty jetkizilgen. Dárigerler ana men bala ómirine tóngen qaýipke baılanysty, kesar tiligimen bosandyrýǵa bel býady, dep habarlaıdy Egemen.kz oblys ákiminiń baspasóz qyzmetine silteme jasap.
Der kezinde jasalǵan shuǵyl medısınalyq kómektiń arqasynda júkti áıel deni saý qyz balany dúnıege ákeldi. Qazirgi tańda bosanǵan áıeldiń jaǵdaıy qanaǵattanarlyq, perzethanada dárigerlerdiń baqylaýynda. Náresteniń de jaǵdaıy jaqsy.Jalpy, Saıram aýdanynda bul pandemııa bastalǵaly koronavırýs ınfeksııasynyń sımptomsyz túri anyqtalǵan 6-shy júkti áıeldiń bosanýy. Bosanǵan áıelder dertti jeńip, dıspanserlik esepten alynǵan.
Álemdik deńgeıde qaýip tóndirip, adamzat balasynyń aldyn oraǵan aýrýǵa baılanysty jarııalanǵan karantındik rejımge qaramastan dárigerlerdiń kásibıliginiń nátıjesinde jyl basynan beri Saıram aýdandyq perzenthanasynda jalpy 3795 sábı dúnıege kelgen. Olardyń 500-den astamy ota arqyly týylǵan. Aýdan halyq tyǵyz ornalasqan aımaqtar qataryna jatqandyqtan jyl saıyn 4000-ǵa jýyq sábı dúnıege keledi.