Qazaqstandyq belgili kásipker, tanymal mesenat, saıahatshy-jıhankez Sapar Ysqaqov «Astana EKSPO-2017» halyqaralyq mamandandyrylǵan kórmesiniń jalaýyn jelbiretip, kememen Jer sharyn aınalyp shyqpaq. Keshe «Qobyz saraıy» konsert zalynda osy máselege arnalǵan baspasóz máslıhaty bolyp ótti.
Qazaqstandyq belgili kásipker, tanymal mesenat, saıahatshy-jıhankez Sapar Ysqaqov «Astana EKSPO-2017» halyqaralyq mamandandyrylǵan kórmesiniń jalaýyn jelbiretip, kememen Jer sharyn aınalyp shyqpaq. Keshe «Qobyz saraıy» konsert zalynda osy máselege arnalǵan baspasóz máslıhaty bolyp ótti.
Jınalǵan jýrnalıster aldynda saıahatshy-jıhankez Sapar Ysqaqov, L.N.Gýmılev atyndaǵy Eýrazııa ulttyq ýnıversıtetiniń kafedra meńgerýshisi Ǵadilbek Shaıahmetov, «Astana EKSPO-2017» UK» AQ-tyń Kommýnıkasııa jáne marketıng departamentiniń dırektory Ásel Qojaqova jáne basqalar 2014 jyldyń 10 qańtarynda Anglııanyń Saýtgempton aılaǵynan bastaý alatyn osy sapar týraly tilge tıek etti. Bul sharaǵa qatysatyn saıahatshylar 20-dan astam elge barady. Jer sharyn aınalyp ótý sapary barysynda Sapar Ysqaqov halyqaralyq uıymdardyń ókilderimen kezdesip, qazaq elin sheteldikterge tanystyryp, Astana qalasynda 2017 jyly Búkilálemdik mamandandyrylǵan kórme ótetindigi týraly jarnama jasaıdy. Sapar Ysqaqov bastaǵan ekspedısııa quramynda 4 adam, onyń ishinde jýrnalıst pen operator bar. Olar teńiz joly arqyly «Queen Elizabeth-6» laınerimen Jer sharyn aınalyp shyqpaq.
Belgili kásipker Sapar Ysqaqovtyń negizgi mamandyǵy – qurylysshy. Ol negizin qalaǵan jekemenshik «Tilep» qurylys kompanııasy Astana qalasyndaǵy birqatar qurylys nysandaryn salýda aıshyqty qoltańbasyn qaldyrǵan. Sońǵy jyldary Sapar Ysqaqovtyń mesenat retinde ataǵy shyqqan. 2013 jyly ol «Tilep» atty qaıyrymdylyq qoryn quryp, múgedek jáne áleýmettik jaǵynan az qamtamasyz etilgen azamattarǵa qamqorlyq jasap keledi. Osyndaı ıgi isteriniń nátıjesinde ol 3 jyl qatarynan elimizdiń «Jyl adamy» atandy.
Sonymen birge, Sapar Ysqaqov kópshilikke keńinen belgili saıahatshy bolyp sanalady. Álemniń 6 qurlyǵyn baǵyndyrǵan jıhankez Sapar Ysqaqov 2007 jyly Ońtústik polıýsten shamamen 100 shaqyrym jerde ornalasqan «Amýndsen-Skott» amerıkalyq stansasynda bolyp, onda Qazaqstan men «Nur Otan» partııasynyń týlaryn ornatqan bolatyn. Ol Jer sharynyń 6 qurlyǵynyń 100-den astam elin aralap, Antarktıda men Arktıkaǵa tabany tıgen alǵashqy qazaqtyń biri.
Jylqybaı JAǴYPARULY,
«Egemen Qazaqstan».