Sońǵy on jyldyń ishinde Ásııa Imantaeva basshylyq etken orta mektepten 300-den astam grant ıegeri shyqsa, olardyń 13-i «Altyn belgi», al 15-i «Úzdik attestat» ıesi
Sońǵy on jyldyń ishinde Ásııa Imantaeva basshylyq etken orta mektepten 300-den astam grant ıegeri shyqsa, olardyń 13-i «Altyn belgi», al 15-i «Úzdik attestat» ıesi
Ustaz degen uly uǵymǵa sıpattama bergen ulylarymyzdyń ulaǵatyna kóz júgirtken saıyn álem jurtshylyǵynyń ekinshi ustazy atanǵan Ál-Farabı babamyzdyń myna bir túıini oıyma orala beredi. Dara tulǵamyz «Ustaz jaratylysynan ózine aıtylǵannyń bárin jete túsingen, kórgen, estigen jáne ańǵarǵan nárselerdiń bárin jadynda jaqsy saqtaıtyn, eshnárseni umytpaıtyn alǵyr da ańǵarympaz aqyl ıesi. Meılinshe sheshen, óner-bilimge qushtar, asa qanaǵatshyl, jany asqaq jáne ar-namysyn ardaqtaıtyn, jaqyndaryna da, jat adamdaryna da ádil, jurttyń bárine jaqsylyq pen izgilik kórsetip, qorqynysh pen jasqaný degendi bilmeıtin batyl, erjúrek bolýy kerek» degen eken. Minekı, ustaz bolýdyń jaýapkershiligi óte joǵary ekenin osydan-aq ańǵara berińiz.
Dana babamyz dálme-dál sıpattap bergen ustaz bolmysyna laıyqty bolý kez kelgenniń qolynan kele bermeıdi. Sebebi, ol úshin joǵaryda aıtylǵan qasıetter tula-boıynda tunyp turýy kerek. Bizdiń búgingi keıipkerimiz osyndaı jan desek qatelespeımiz. Búkil sanaly ǵumyryn bilim berý salasyna arnaǵan, sol jolda jemisti eńbek ete bilgen, boıyndaǵy bilimi men biliktiligin naqty isterimen dáleldep, el-jurttyń erekshe yqylasyna bólengen Ásııa Imantaeva ustazdyq jolǵa túskeli 35 jyl ótipti. Jýyrda ǵana qurmetti demalysqa shyqqan ol 1954 jyly Ońtústik Qazaqstan oblysynyń sol kezdegi Kırov aýdanynda pedagog otbasynda dúnıege kelgen. Atalmysh aýdandaǵy orta mektepti «Altyn medalmen» támamdaǵan soń, Shymkent pedagogıkalyq ınstıtýtyna oqýǵa túsip, ony 1974 jyly «Fızıka pániniń muǵalimi» mamandyǵy boıynsha qyzyl dıplommen bitirip shyqqan. Alǵashqy eńbek jolyn osy jyly bastaǵan Ásııa Perdebaıqyzy áke jolyna túsip, mektep basshysy qyzmetine deıin kóterildi. 1994 jyly №31 Iаbek Esenbekov atyndaǵy orta mekteptiń dırektory bolyp taǵaıyndalǵan.
Bilikti maman basshylyq qyzmette birtalaı belesterdi baǵyndyra bildi. Ásirese, oqý oshaǵynyń kórsetkishi Ulttyq biryńǵaı testileýdiń nátıjesimen ólshenip kele jatqan sońǵy on jyldyń ishinde aýyz toltyryp aıtarlyqtaı jetistikterge qol jetkizdi. Máselen, atalǵan ýaqyt aralyǵynda 800-ge jeter-jetpes oqýshysy bar bul mektepten 300-den astam túlek grant ıegeri atansa, olardyń 13-i «Altyn belgi», al 15-i «Úzdik attestat» aldy. Mundaı kórsetkishke elimizdegi bilim berý bazasy eń úzdik sanalatyn bilim oshaqtarynyń ózderi qol jetkize almaı kele jatqany aıdan-anyq.
Elimizge Ulttyq biryńǵaı testileý júıesi alǵash engizilgen jyly Ásııa Imantaeva mektep muǵalimderine óz pánderi boıynsha oqýshylardyń bilimin sabaqtan tys ýaqytta qosymsha jetildirý kerektigin aıtady. Osydan keıin ustazdar qaýymy ata-analarmen kelise otyryp, ár balamen jeke-jeke jumys isteýdi qolǵa alady. Olardyń bul umtylysy alǵashqy jyly-aq óz nátıjesin berdi. Sóıtip, mektep bitirgen túlekterdiń 20-dan astamy grant ıegeri atandy. Al, keıingi jyldary kórsetkish tipti jaqsarǵan. Jyl saıyn grant ıegerleri 30-dan kem bolmaıtyndaı deńgeıge jetken. Árıne, álgindeı ádisti qoldanǵan muǵalimderdiń barlyǵynyń «aıy ońynan týdy» dep aıta almaımyz. Bala boıyna bilim nárin shynaıy sińire bilgen bilikti ustazdardyń ǵana shoqtyǵy bıik bolǵan. Bir qyzyǵy, bul mekteptiń UBT-daǵy jetistigin estip-bilip júrgen ata-analar óz balalaryn osynda oqytýǵa yqylas tanyta bastaǵan. Osylaısha, Maqtaaral aýdanyndaǵy kip-kishkentaı mektep pen ondaǵy ustazdar qaýymynyń abyroıy asqaqtap shyǵa kelipti. Etken eńbek pen tógilgen mańdaı terdiń jemisi degen osy shyǵar.
Ásııa Perdebaıqyzy orta mektepte basshylyq jasap júrgen kezinde bilim berý júıesine «Jedeldetip oqytý» ádisin de engizdi. Bul ádis boıynsha 9-synypty aıaqtaǵan oqýshy keıingi eki synypty bir jylda támamdap shyǵady. Búgingi tańǵa deıin osy júıemen 24 oqýshy mektepti bitirgen eken. Olardyń UBT-daǵy kórsetkishteri de kóńil kónshiterlikteı. Osy oraıda aıta keter jaıt, biz sóz etken bilim oshaǵy bıylǵy Ulttyq biryńǵaı testileý júıesiniń nátıjesinde de joǵary kórsetkishti baǵyndyryp otyr. Dálirek aıtsaq, grant ıegerleriniń, onyń ishinde «Altyn belgi» men «Úzdik attestatqa» qol jetkizgenderdiń sany jaǵynan aýdandaǵy 122 mekteptiń arasynda aldyńǵy úshtikke engen.
Ulaǵatty ustazdyń bilim berý salasynda sińirgen eńbegi memleketimiz tarapynan eleýsiz qalǵan joq. Atap aıtar bolsaq, basshylyq jasaý jáne bilim berýde jetken jetistikteri úshin 1999 jyly «Bilim berý isiniń úzdigi» tósbelgisimen, al 2006 jyly Y.Altynsarın atyndaǵy tósbelgimen, sondaı-aq, 2010 jyly «Qazaqstan Respýblıkasynyń Táýelsizdigine 10 jyl tolýyna oraı» merekelik medalimen marapattalǵan.
Erlibaı О́ZBEKBAIULY.
Ońtústik Qazaqstan oblysy.
Sýrette: Ásııa IMANTAEVA (ortada) ujymymen birge.