Jańadan salynǵan Naýryzbaı aýdany ákimdiginiń ǵımaratyna ornalasqan otbasylyq oqý-kitaphanasynyń dırektory Baqyt Saýrambaeva munda eldegi pandemııaǵa qatysty karantındik talaptardyń ár kez saqtalyp otyrǵanyn, sol arqyly aýdanda ótetin kezektegi ulaǵatty sharalardyń da esh úzilmegenin alǵa tartty.
– Naýryzbaı aýdany ákimdiginiń qoldaýymen kitaphana oqyrmandarymen uly Abaı, ál-Farabı jylyna oraı onlaın-oflaın on-san kezdesý ótkizdik, – dedi Baqyt Demekjanqyzy. – Al búgingi zalǵa jınalǵan shaǵyn ári oqshaý toptaǵy oqyrman men qonaqtar júzdesýiniń óz ereksheligi bar.
Mádenı is-sharanyń moderatory, kitaphana qyzmetkeri Lázzat Isabaeva jyr alyby Jambylǵa arnalǵan «Jambyl meniń jáı atym, Halyq meniń shyn atym» atty ádebı-kórkem mazmundaǵy basqosýda aqynnyń qysqasha ómirbaıandyq derekterin vıdeolyq kórsetilimmen demep, shyraılandyryp jiberdi. Arnaıy shaqyrylǵan qonaqtardyń kóshbasshysy – jazýshy, Halyqaralyq Jambyl qorynyń dırektory Manarbek Izbasar respýblıkamyzdyń túkpir-túkpirinde uıymdastyrylyp jatqan is-sharalardyń, ıaǵnı uly aqynnyń murasyn zertteý, zerdeleý baǵytyndaǵy túrli keshter men ǵylymı konferensııalardyń, sımpozıýmdar men jyr alyby keshteriniń baǵdarlamasy týraly túıindi áńgime aıtty.
– Qazaq poezııasy men aqyndyq-jyr óneriniń qos alyby ózinen keıingi urpaqqa óshpes mura qaldyrdy. Kúni keshe uly Abaıdyń mereıtoıyn ýaqyt kezeńiniń aıaqtan shalǵan «COVID-19» qıyndyqtaryna qaramastan laıyqty merekelep, shyǵaryp saldyq. Elimizde pandemııa derti áli de tolyǵymen joıylǵan joq, sol sebepti shekteý talaptaryna moıynsuna otyryp, uly Jambyl babamyzdyń 175 jyldyq mereıli merekesin atap ótý is-sharalaryn jalǵastyra bermekpiz. Búgingi kezdesýimizdiń kelbetin ashý úshin men elden uly aqynnyń shóberesi, jyrshy Bekmurat Álimqululy Jambylovty, shópshegi Álıhandy ádeıi shaqyrtyp alyp keldim, – dedi M.Izbasar.
Aqyn shóberesiniń dombyranyń qońyr únimen kemel daýysqa salyp áýeletken erekshe ekpindi jyr-termeleri shyn máninde tosynsyıǵa aınaldy. Ol oqyrmandar zalyndaǵy qaıtalaı kórsetilip turǵan vıdeodaǵy naǵyz Jambyl beınesimen úılesip, barshaǵa ortaq ǵajaıyp kórinis ákelgendeı áser etti. Uly Jambyldyń ózin kórgendeı kúı keshken kópshilik Bekmurat Jambylovqa dý qol shapalaqtap, qurmet kórsetti.
Belgili jazýshy, fılologııa ǵylymdarynyń doktory, professor Nurdáýlet Aqysh Jambyldyń ádebı-ǵumyrnamalyq ómir jolyna qysqasha sholý jasap, jalyn júrek jas jigit Jambyldyń Burym sulýǵa ǵashyqtyǵy hıkaıalaryn ortaǵa saldy, aqynnyń mahabbat sezimderine tunǵan sırek jyr joldarynan úzindi oqydy.
Maıtóbeniń kókmaısaly baýraıynda jyr alybynyń tizesine otyryp batasyn alǵan qazirgi qazaq jýrnalıstıkasynyń aqsaqaly, Qazaqstan fotoóneriniń qaıratkeri Nurmanbet Qızatulynyń qyzyqty etip babymen aıtqan aqyn baba týraly el arasyndaǵy aqıqat ta ańyz áńgimeleri de tyńdaýshylaryn uıytty.
Kitaphana oqyrmandary da kezdesýge quralaqan kelmepti, kezek-kezek Jambyl óleńderinen úzindi oqyp, jyrdan shashý shashty.
«Jambyl esimi – eshqandaı da tanystyrýdy qajet etpeıtin búkilálemdik erekshe qubylys», dep ádebı-kórkem basqosýdy qorytyndylaǵan sóz zergeri M.Izbasar ózi qyzmet etetin Abaı atyndaǵy Qazaq ulttyq pedagogıkadyq ýnıversıtetiniń «Ulaǵat» baspasynan shyqqan jyr alybynyń shyǵarmalar jınaǵy men úlken portretin Naýryzbaı aýdandyq otbasylyq oqý-kitaphanasyna syıǵa tartty.
ALMATY
SÝRETTE: (soldan ońǵa qaraı) uly Jambyldyń shóberesi Bekmurat Jambylov, Halyqaralyq Jambyl qorynyń dırektory, jazýshy Manarbek Izbasar jáne otbasylyq oqý-kitaphanasynyń dırektory Baqyt Saýrambaeva.