QR Parlamenti Senaty Tóraǵasynyń orynbasary Asqar Shákirov Memleket basshysynyń tapsyrmasy boıynsha Iran Islam Respýblıkasynyń Prezıdenti Ibrahım Raısıdi ulyqtaý rásimine qatysty, dep jazady Egemen.kz vedomstvonyń baspasóz qyzmetine silteme jasap.
Iran Islam Respýblıkasy Parlamentiniń ǵımaratynda ótken rásim kezinde Ibrahım Raısı resmı túrde qyzmetke kirisip, eldiń joǵarǵy zań shyǵarýshy organy depýtattarynyń aldynda ant berdi.
Tegeranda bolǵan kezde Iran Májilisiniń Tóraǵasy Mýhammad Galıbafpen kezdesý boldy, onyń aıasynda taraptar Qazaqstan-Iran qatynasynyń jaı-kúıi men keleshegin, sondaı-aq ózara múddelilik turǵysynda halyqaralyq kún tártibiniń máselelerin talqylady.
Iran Islam Respýblıkasy Májilisindegi «Iran-Qazaqstan» dostyq tobynyń jetekshisi Golam Nýrımen kelissóz júrgizilip, ekijaqty sıpattaǵy jáne halyqaralyq uıymdar aıasyndaǵy parlamentaralyq yntymaqtastyq máselesi qaraldy.
Senat Tóraǵasynyń orynbasary Iran Islam Respýblıkasynyń Maqsatty belgileý jónindegi keńesiniń hatshysy Mohsen Rezaımen kezdesti. QR Parlamenti qyzmetiniń negizgi baǵyttary, sondaı-aq qazirgi ýaqytta Qazaqstanda júrgizilip jatqan ózgerister týraly aıtty.
Maqsatty belgileý jónindegi keńes – Irannyń joǵarǵy kóshbasshysy janyndaǵy bıliktiń barlyq tarmaqtaryn qadaǵalaıtyn ókilettikterge ıe ákimshilik qurylym. Keńes quramyna Irannyń burynǵy prezıdentteri men kórnekti qaıratkerleri kiredi.
Asqar Shákirov ınaýgýrasııalyq sharalar aıasynda oǵan qatysqan shetel delegasııa basshylarymen jumys babyndaǵy birqatar kezdesý ótkizdi.
Ibrahım Raısı Iranda 18 maýsymda ótken prezıdenttik saılaýda jalpy daýys sanynyń 61,95%-yn jınap, jeńiske jetken bolatyn.