Aqtóbe – ekonomıkalyq áleýeti myqty óńir. Sondyqtan munda sońǵy jyldary ónerkásip qarqyndy damyp keledi. Elbasy Nursultan Nazarbaevtyń “Jańa onjyldyq – jańa ekonomıkalyq órleý – Qazaqstannyń jańa múmkindikteri” atty Joldaýynda atap kórsetilgenindeı, elimizdi ındýstrııalyq-ınnovasııalyq damytý kartasyna kiretin jobalardy júzege asyrý bastalyp ta ketti. Munyń ózi taıaý onjyldyqqa belgilengen ekonomıkalyq damýdyń kókjıekterin erkin baǵyndyratynymyzǵa senim uıalatady.
Qazirdiń ózinde oblysta ınvestısııalyq baǵdarlama aıasynda quny 9,0 mlrd. AQSh dollarynan artyq qarjyny quraıtyn 100-den astam jobany júzege asyryp, 22,6 myń jańa jumys ornyn ashý kózdelýde. Ústimizdegi jyly ǵana jalpy quny 92 mlrd. teńgeden astam qarjy quraıtyn toqsan eki joba paıdalanýǵa berilmek. Bul jobalar halyq sharýashylyǵynyń barlyq salalaryn qamtıdy. Sonyń ishinde óńdeý kásiporyndaryna aıryqsha basymdyq berilip otyrǵany baıqalady. Munyń ózi daıyn ónimder óndirýdi jolǵa qoıady dep kútilýde. Ústimizdegi jyldyń alǵashqy jartyjyldyǵynda jalpy quny 30,4 mlrd. teńgeni quraıtyn 10 joba iske qosylatyn bolady. Al jyldyń ekinshi jartyjyldyǵynda 62,4 mlrd. teńge bolatyn 16 joba aıaqtalyp, paıdalanýǵa beriledi. Bul ınvestısııalyq jobalar júzege asyrylǵanda 2,5 myńnan astam jańa jumys oryndary ashylady. Bul derekter oblys ákimdiginde ótken memlekettik organdar men ınvestısııalyq jobalardy júzege asyratyn kásiporyndar basshylary qatysqan otyrys barysynda belgili boldy. Ústimizdegi jyly júzege asyrylatyn ınvestısııalyq jobalar basshylarynyń esebi tyńdalyp, olardyń qanshalyqty dárejede oryndalyp jatqany tanystyryldy.
Kezinde óz ónimderimen Odaqqa, qala berdi dúnıe júzine tanymal bolǵan “Aqtóberentgen” aksıonerlik qoǵamy dırektorlar keńesiniń tóraǵasy Rahymjan Ismaǵambetov kompıýterlik tomografqa negizdelgen rentgen qondyrǵysy jobasynyń óndirisi jaıynda aıtyp berdi. Qazir munda medısınalyq zamanaýı quraldar shyǵaratyn óndiristik júıe qurý aıaqtalyp keledi. Onyń aıtýynsha, kásiporyn bıylǵy jyldyń 1 shildesinde óziniń alǵashqy ónimin beredi. Iаǵnı, birinshi tájirıbelik otandyq tomograftyń ıgiligin kóretin kún de qashyq emes.
“Voshod Orıel” jaýapkershiligi shekteýli seriktestiginiń bas dırektory Borıs Agýdalın “Voshod” ken ornyndaǵy jerasty kenishi shahtasy qurylysy týraly baıandady. Ol bul jobanyń 98 paıyzǵa júzege asyrylǵanyn jetkizdi. “Aqtóbestroımontaj” kásipornynyń basshysy Bısembaı Nazarbaev keramıkalyq kirpish zaýytynyń qurylysy da osy merzimde aıaqtalatynyna sendirdi. Al “AIS” jaýapkershiligi shekteýli seriktestigi dırektorynyń orynbasary Smaǵul Beısenbaev Mártók aýdanynda salynyp jatqan 1100 iri qaraǵa arnalǵan sút ónimderin óndiretin ferma jobasynyń qurylysymen tanystyrdy, qurylys barysynda týyndaǵan keıbir máselelerge toqtaldy, ony oń sheshýge oblys basshysynyń yqpal etýin surady. Bestamaq aýylynda salynyp jatqan shoshqa keshenindegi jumys barysy týraly “Parıjskaıa kommýna HHI” jaýapkershiligi shekteýli seriktestiginiń bas dırektory Gaık Terterıan málimdedi. Munda qazirdiń ózinde shoshqalar ákelinip, toraılap jatqan kórinedi. Qala mańynda paıdalanýǵa berilýi tıis jylyjaı, Jańajoldaǵy gaz-týrbınaly stansa qurylysy sııaqty ındýstrııalyq jobalar keńinen sóz bolyp, qajetti málimetter alyndy. Osy sııaqty basqa da ınvestısııalyq jobalardyń basshylary esep berdi. Jobalardy júzege asyrý barysyndaǵy týyndaǵan keıbir máselelerdi ortaq oılasyp sheshý joldary qarastyryldy. Jobalardy júzege asyrýshylardyń kóńil-kúıinen, jumys barysynan bul nysandardy merziminde paıdalanýǵa beretindeı senimdilik ańǵaryldy.
Satybaldy SÁÝIRBAI, Aqtóbe oblysy.