Keshe Parlament Senatynyń Tóraǵasy Qasym-Jomart Toqaev Grýzııanyń Qazaqstandaǵy Tótenshe jáne ókiletti elshisi Paata Kalandadzeni onyń ótinishi boıynsha qabyldady, dep habarlady osy palatanyń baspasóz qyzmeti.
Kezdesý barysynda Qazaqstan men Grýzııa arasyndaǵy yntymaqtastyqty odan ári nyǵaıtý máseleleri talqylandy.
P.Kalandadze Qazaqstan-Grýzııa qatynastary, “tutastaı alǵanda úılesimdi jáne qarqyndy” ekenin aıta kelip, parlamentaralyq únqatysýdy belsendilendirý týraly oılarymen bólisti.
Q.Toqaev ózara ekijaqty is-qımyldy nyǵaıtýǵa Qazaqstannyń múddeliligin atap ótip, parlamentaralyq baılanystardy damytýdyń mańyzdylyǵyna toqtaldy.
Dıplomat “EQYU-nyń Eýrazııalyq ólshemi” Transazııalyq parlamenttik forýmynyń jumysyna grýzın parlamentshileriniń qatysatynyn naqtylady.
Forým ústimizdegi jylǵy 14-16 mamyrda Almatyda ótedi. Bul shara aıasynda aımaqtyq qaýipsizdik, ekonomıkalyq damý, EQYU-nyń adam ólshemi máselelerine arnalǵan úsh sessııasyn ótkizý josparlanyp otyr.