Memleket basshysy Nursultan Nazarbaev Qazaqstan Respýblıkasynyń Tabıǵı monopolııalardy retteý agenttiginiń tóraǵasy Nurlan Aldabergenovti qabyldady, dep habarlady Qazaqstan Respýblıkasy Prezıdentiniń baspasóz qyzmeti.
N.Aldabergenov Prezıdentti elektr stansalary men óńirlik elektr jelilik kompanııalarǵa olardyń óndiristi jańǵyrtý týraly ınvestısııalyq mindettemelerin oryndaýlary boıynsha júrgizilgen tekseristiń qorytyndylary týraly habardar etti. “AES” kompanııasyna qarasty Shúlbi jáne О́skemen GES-teriniń mindettemeleri oryndalmaǵany, sondaı-aq quny 1,5 mıllıard teńgeni quraıtyn birqatar ózge elektr stansalardyń ınvestısııalyq mindettemeleri oryndalmaǵany anyqtaldy.
Áńgimelesý barysynda sondaı-aq, energııamen qamtý máselesi talqylandy. Agenttik tarapynan elektr energııasyna arnalǵan dıfferensıaldy tarıfter engizilgen. Bul zańdy tulǵalardyń energııany tutyný kólemine tikeleı baılanysty bolmaq. Qazirgi ýaqytta tarıfterdiń eki deńgeıli júıesi jumys isteýde, taıaý eki-úsh jylda úsh deńgeıli júıeni engizý josparlanyp otyr.
– Prezıdent dıfferensıaldy tarıfterdi qoldanýdy damytý, sonyń ishinde turǵyndardyń sýdy tutynýdaǵy únemshildigin yntalandyrý úshin ony sýmen qamtýǵa engizý týraly naqty tapsyrma berdi, – dedi N.Aldabergenov.
* * *
Memleket basshysy Nursultan Nazarbaev “Syrbar” syrtqy barlaý qyzmetiniń dırektory Amanjol Janqulıevti qabyldady, dep habarlady Qazaqstan Respýblıkasy Prezıdentiniń baspasóz qyzmeti.
A.Janqulıev vedomstvonyń odan ári qalyptasýyna baǵyttalǵan uıymdastyrý máseleleriniń sheshimi týraly baıandady.
Kezdesý barysynda sondaı-aq Uly Otan soǵysyndaǵy Jeńistiń 65 jyldyǵyn merekeleýdiń aıasynda syrtqy barlaý ardagerlerine qurmet kórsetýdi uıymdastyrý is-sharalary týraly áńgime boldy.