Tóńkeris jasamaq áreketi úshin

Sharaına

Ońtústikkoreıalyq depýtat Lı Sok Kı memlekettik tóńkeris jasaýǵa daıyndalǵany úshin 12 jyl túrmede otyrý jazasyna kesildi. Sondaı-aq, 52 jastaǵy saıasatker bostandyqqa shyqqannan keıin 10 jyl boıy saılaýlarda daýys berý quqyǵynan aıyryldy. Sot Lı Sok Kıdi Soltústik Koreıamen soǵys bola qalǵan jaǵdaıda, KHDR-ǵa kómek retinde jasyryn uıymdarmen baılanys jasaǵan dep tanyǵan. Prokýratýra sottan ony 20 jylǵa túrmede otyrǵyzý jazasyn suraǵan eken. Memlekettik aıyptaýshynyń málimetteri boıynsha, depýtat shamamen 130 adamnan turatyn tóńkerisshil uıymǵa jetekshilik etken. Bul uıymnyń el aýmaǵynda terrorlyq áreketter jasamaq bolǵandary da dáleldengen. Ekinshi ushqyshtyń ózi eken «Franspress» aqparat agenttiginiń habarlaýynsha, Ethiopian AirLines avıakompanııasynyń ushaǵyn aıdap áketken basqa emes, ekinshi ushqyshtyń ózi bolyp shyqty. Shveısarııa polıseıleriniń aıtýyna qaraǵanda, negizgi ushqysh ájethanaǵa ketken kezde ol laınerdi basqarýdy basyp alǵan kórinedi. Bir jaqsysy, ol ushaqty Jeneva áýejaıyna aman-esen qondyrypty. Al ózi arqan arqyly ushaq terezesinen syrtqa túsip úlgergen. Aıdap áketýshi qarýsyz bolǵandyqtan, jolaýshylar men ekıpaj músheleriniń ómirine qaýip tónbegen. Bul ushaq Efıopııa astanasy – Addıs-Abebadan Rım qalasyna kelýi tıis eken. Ushaq bortynda 200-ge jýyq jolaýshy bolǵan. Premer-mınıstr laýazymyna usynyldy Florensııa qalasynyń meri Matteo Rensı keshe Italııanyń premer-mınıstri laýazymyna usynyldy. El prezıdenti oǵan úkimettiń jańa quramyn jasaqtaýdy tapsyrdy. Italııa parlamenti endi bir aptadan soń jańa úkimetke senim bildirý jóninde daýys berýleri tıis. Eldiń buǵan deıingi premer-mınıstri Enrıko Letta 14 aqpanda otstavkaǵa ketken bolatyn. Ony otstavkaǵa ketirýge osy M.Rensı bastamashy bolǵan edi. Rensı – Demokratııalyq partııanyń jetekshisi. Eger Rensıdiń qurǵan jańa úkimetine parlament senim bildiretin bolsa, 39 jastaǵy ol Italııa tarıhynda eń jas premer-mınıstr bolyp sanalady. Qysqa qaıyryp aıtqanda:  Nıgerııadaǵy bir derevnıaǵa sodyrlar tarapynan jasalǵan shabýyldan 106 beıbit turǵyn ajal qushty. Sodyrlar eldi mekenge alty júk mashınasymen jáne onshaqty motosıklmen kelipti.  Kemerov oblysynyń gýbernatory Aman Tóleev dzıýdo boıynsha qara belbeý ataǵyn aldy. Gýbernatorǵa ony Býdo halyqaralyq ýnıversıtetiniń professory, japondyq delegasııanyń jetekshisi Ishı Kensýke tapsyrdy.  Tájikstannyń Kýlıab eldi mekenindegi tergeý ızolıatorynda shashtaraz bolyp isteıtin jazasyn óteýshi osy mekeme bastyǵynyń shashyn qıyp jatyp, ony baýyzdap tastady.  «Hızballa» radıkaldy toptarynyń jetekshisi Hasan Nasralla arab álemin Sırııadaǵy soǵysty toqtatýǵa shaqyrdy. Onyń aıtýynsha, eger arabtyq kúshter soǵysty toqtatatyn bolsa, «Hızballa» da janjaldarǵa qatysýdan bas tartady. Eks-premer bes jylǵa sottaldy Grýzııanyń burynǵy premer-mınıstri Vano Merabıshvılı bes jyl merzimge bas bostandyǵynan aıyryldy. «Interfaks» agenttiginiń habarlaýynsha, bul sheshimdi Kýtaısı soty qabyldaǵan. Buǵan deıin V.Merabıshvılı qyzmet ókilettiligin asyra paıdalandy, saılaýshylardy satyp aldy jáne memleket qarajatyn maqsatsyz jumsady dep aıyptalǵan bolatyn. Eks-premerge, sondaı-aq, Kvarıatı selosyndaǵy saıajaıdy zańsyz jekeshelendirdi dep te aıyp taǵylǵan edi. Biraq, sotta ol ózine taǵylǵan aıyptardy moıyndamady. Merabıshvılı osy jyldyń mamyrynda atalǵan aıyptaýlarǵa baılanysty ustalǵan-dy. Ol kezinde eldiń ishki ister mınıstrligin basqarǵan ári M.Saakashvılıdiń senimdi adamdarynyń biri bolǵan. Túrmedegiler de dıplomǵa ıe bolady Nıý-Iork shtatyndaǵy túrmelerde jazasyn óteýshilerge kolledj deńgeıinde oqytý júıesi engizilýi múmkin. Bul jóninde shtattyń gýbernatory Endrıý Kýomo málimdedi. Jergilikti BAQ-tardyń jazýynsha, baǵdarlama shtattaǵy on túrmede júzege asyrylatyn bolady. Jazasyn óteýshiler baǵdarlama boıynsha orta bilim men bakalavrıat dıplomy aralyǵyndaǵy basqysh týraly bilim alyp shyǵady. Nemese bakalavrıat dıplomyna ıe bolady. Oqý-oqytý merzimi – 2,5 jyldan 3 jylǵa deıin. Baǵdarlamanyń jalpy quny qansha ekeni aıtylmaǵan. Derek kózderine qaraǵanda, jazasyn óteýshilerdi oqytý olardyń árbiri úshin memleketke 5 myń dollarǵa túspek. Stıýardessa ushaq bortynan qulap tústi Dýbaıdyń halyqaralyq áýejaıynda «Ýral avıalınııasy» avıakompanııasynyń stıýardessasy ushý-qoný jolaǵynda ushaqtan jerge qulap túsken. Oqıǵa keshe reseılik ushaqtyń Perm qalasyna ushar kezde bolǵan. «Interfaks» agenttiginiń aqparatyna qaraǵanda, ushaq bortynda Dýbaı áýejaıyna qyzmet kórsetetin avtomobıl soǵylǵan sııaqty. Qulaǵan stıýardessa alǵan jaraqatyna baılanysty aýrýhanaǵa jetkizilgen. Al ushaq jeńil dárejede búlingen. Áýejaı basshylyǵy onyń ornyna jolaýshylarǵa rezervte turǵan A320 ushaǵyn usynýǵa májbúr boldy. Internet materıaldary negizinde ázirlendi.