Nur-Sultan qalasyndaǵy Halyqaralyq mekteptiń oqýshysy Darıa Petına maldyń jappaı qyrylý jaǵdaıyna baılanysty óz sheshimin usyndy. Oqýshy hlorella baldyrlarynan qurǵaq jemshóp qospasyn daıyndady, dep habarlaıdy Egemen.kz.
Hlorella - tiri organızmderdiń tolyq ósýine qajetti folıı qyshqyly, kalsıı, fosfor, kobalt, magnıı, myrysh sııaqty organıkalyq jáne beıorganıkalyq zattardyń keń spektrine ıe baldyrlar ókili.
NIS oqýshylary arasynda ótken ǵylymı jobalardyń jelilik baıqaýynda Darıa hlorellany ósirýdiń neǵurlym tıimdi ádisin anyqtaý maqsatyndaǵy jumysyn usyndy. Ol úshin oqýshy hlorellany tórt bólek bes lıtrlik ydysta túrli jaǵdaıdarda ósirip kórgen.
«Hlorella ósirýdiń eń jyldam jáne tıimdi ádisin tabý jáne ony azyqqa qoldaný - ózekti másele. Hlorella sýspenzııasy ári joǵary kalorııaly azyq qospasy, ári qoljetimdi. Kez kelgen fermer hlorellany salystyrmaly túrde tómen baǵamen ósirip, ony tyńaıtqysh retinde qoldana alady», dedi jas ǵalym.
Aıta keteıik, 2021 jyldyń kóktem-jazy Mańǵystaý jáne Qyzylorda oblystarynyń sharýalary úshin ońaı tıgen joq. Kóktemgi jaýyn-shashynnyń azdyǵy men azyq tapshylyǵynan óńirlerdegi mal sharýashylyǵy salasy zardap shekti. Budan bólek, eldiń shyǵys, batys jáne soltústik bólikterinde maldyń jappaı qyrylýynyń jekelegen jaǵdaılary tirkelgen bolatyn.