El arasynda dári baǵasy 100 paıyzǵa qymbattaıdy degen qaýeset tarady. Tipti, ınternet saıttarda jarııalanǵan mundaı aqparlarda baǵany ósirýge Densaýlyq saqtaý mınıstrliginiń ózi kelisim bergen dep jazylǵan. Alaıda, bul habar shyndyqqa sáıkes kelmeıdi.
Keshe Densaýlyq saqtaý mınıstrligi Medısınalyq jáne farmasevtıkalyq qyzmetti baqylaý komıtetiniń tóraıymy Laýra Ahmetnııazova bul málimettiń shyndyqqa janaspaıtynyn alǵa tartty. Onyń aıtýynsha, tek Shyǵys Qazaqstan óńirinde ǵana dári baǵasyn negizsiz ósirýdiń eki faktisi tirkelgen. Alaıda, bul oqıǵa boıynsha dereý shara qoldanylyp, baǵa rettelgen.
«Bıylǵy jyldyń 13 aqpanynda Densaýlyq saqtaý mınıstrligi men kásibı assosıasııalar arasynda dári-dármek baǵasyn turaqty ustap turý týraly memorandým jasaldy. Onyń maqsaty – tegin medısınalyq kómekten bólek, halyq kóp paıdalanatyn dárilerdi tirkep, onyń baǵasyn ósirmeý», dedi L. Ahmetnııazova.
Aıdar О́RISBAEV,
«Egemen Qazaqstan».