Talıbtermen jeke qaldyrmaq
AQSh prezıdenti Barak Obama eger Kabýl qaýipsizdik týraly ekijaqty kelisimge qol qoımasa, amerıkalyq áskerıler elden tolyqtaı shyǵarylýy yqtımal ekenin aıtyp, Aýǵanstan prezıdenti Hamıd Karzaıǵa doq kórsetti. Bul eki memleket basshysy telefon arqyly sóılesken kezinde aıtylǵan.
B.Obama Pentagonǵa qazirdiń ózinde Aýǵanstannan áskerlerdi tolyqtaı shyǵarý boıynsha jospar jasaý tapsyrylǵanyn atap kórsetken. Soǵan sáıkes, 2014 jyldan keıin eldegi qaýipsizdikti qamtamasyz etý tutastaı jergilikti qarýly kúshter men quqyq qorǵaý organdaryna kóshýi yqtımal. AQSh prezıdentiniń aıtýyna qaraǵanda, kelisimge neǵurlym kesh qol qoıylsa, Aýǵanstanda qalatyn AQSh áskerıleri de soǵurlym azaıa túsetin bolady.
Jańa premerdi bekitti
Italııa parlamentiniń depýtattar palatasy Matteo Rensıdiń koalısııalyq úkimetine senim kórsetti. Jańa úkimetti qoldap, 378 depýtat daýys berse, qarsylar 220 adamdy qurady. Bul arada parlamentte kópshilik bolyp tabylatyn Demokratııalyq partııa men «Jańa ońshyl ortalyq» jeńisti qamtamasyz etti.
Jańa úkimet te negizinen osy eki partııa ókilderinen quralyp otyr. Buǵan deıin jańa kabınet senattan senim votýmyn alǵan bolatyn. Osylaısha Rensıdiń úkimeti Italııa parlamentiniń qos palatasy tarapynan da qoldaý tapty. Al 39 jastaǵy Matteo Rensı Italııa tarıhyndaǵy eń jas úkimet basshysy sanalady. Jańa úkimettiń jartysyn áıelder quraıdy.
Shabýyl qurbandary – 59 adam
«Boko Haram» tobynyń qarýly jasaqtary Nıgerııadaǵy federaldyq kolledjge shabýyl jasaǵan edi. Osy sodyrlyq áreket saldarynan 59 adam qaza tapty. Oqýshylardyń kópshiligi partalarynda otyrǵan jerde kóz jumsa, birazy alǵan jaraqattaryna qaramastan, órtengen ǵımarattan shyǵyp úlgergenderimen báribir opat bolǵan.
Shabýyldaýshylar tek er balalarǵa ǵana oq atqan. Sondyqtan ajal qushqandar arasynda qyz balalar joq. Al osyndaı oqıǵa ótken jyldyń shilde jáne qyrkúıek aılarynda da oryn alǵan edi. Sol kezderi jataqhanalarǵa jasalǵan shabýyl saldarynan 90-nan astam oqýshy qaza tapqan bolatyn. «Boko Haram» Nıgerııa basshylyǵymen 2009 jyldan beri eldiń soltústik aýmaǵynyń táýelsizdigi úshin kúres júrgizip keledi.
Qos mereke qosylmaq
Qytaı bıligi eki jańa memlekettik mereke engizý nıetinde: alǵashqysy Japonııany jeńgen kún bolsa, ekinshisi Nankın qyrǵynynyń qurbandaryn eske alý kúni bolmaq eken. Sóıtip, qytaılyqtar 3 qyrkúıekte Japonııamen soǵystaǵy jeńisin toılamaq.
Bul soǵys 1937-1945 jyldar aralyǵynda jalǵasqan bolatyn jáne ekinshi dúnıejúzilik soǵystyń bir bóligine aınalǵan edi. Al Nankınde qaza tapqandardy eske alý sharalaryn ótkizý 13 jeltoqsanǵa belgilenip otyr. Bul kúni japon áskerıleri sol kezde Qytaıdyń astanasy bolǵan Nankınge basa-kóktep kirip, 6 apta boıy qalada bilgenderin istegen. Qytaı tarıhshylarynyń baǵalaýynsha, 300 myń qytaılyq qurbandyqqa aınalǵan.
«Maın Kampf» aýksıonǵa qoıyldy
Los-Andjelestegi (AQSh) ınternet-aýksıonǵa Adolf Gıtlerdiń aftografymen «Maın Kampf» kitabynyń eki basylymy shyǵaryldy. Buǵan qosa, satýǵa Gıtlerdiń jeke arhıtektory Albert Shpeerdiń bylǵary paltosy qoıylǵan.
Eki kitaptan turatyn «Maın Kampftiń» qos kitabynyń alǵashqy suranym baǵasy 20 myń dollardy quraıdy. Shpeer paltosy 5 myń dollarǵa baǵalanǵan. Aýksıonǵa shyǵarylǵan kitaptar 1926-1927 jyldary basylypty. Gıtler bul kitaptardy nasıster partııasynyń múshesi Iozef Baýerge Rojdestvo merekesine oraı syıǵa tartsa kerek. Al Shpeer aýksıonǵa qoıylǵan paltosyn 1945 jyldyń 23 sáýirinde Gıtlermen sońǵy kezdesýine kıip kelipti.
Qysqa qaıyryp aıtqanda:
Venesýelada bılikke qarsy jappaı narazylyq aksııalary jalǵasyp jatyr. Olardyń arasynda jastar kóp. Stýdentter ózderiniń bul áreketterin bolashaqtarynyń bulyńǵyr ekendikterimen túsindiredi. Elde bılikti jaqtaýshylar qatary da qalyń. Olar da sherýlerin jalǵastyrýda.
Ýkraınada bıliktiń aıtqanymen narazylyq aksııalaryna qatysýshylarǵa qarsy qarý jumsaǵan «Búrkit» arnaıy toby taratyp jiberildi. Endi onyń quramyndaǵy mılısıonerler Reseıge kózqarasy túzý ońtústik Ýkraına aýmaǵynda qyzmetterin jalǵastyrýlary múmkin.
Grýzııanyń burynǵy prezıdenti Mıhaıl Saakashvılıge jaqynda bılik aýysqan Ýkraınada birneshe joǵary laýazymdy qyzmetter usynylǵan. Biraq ol bul usynystyń kimnen túskenin naqtylamaıdy jáne óziniń AQSh-qa ketýge sheshim qabyldaǵanyn da jasyrmaıdy.
Germanııanyń sporttyq gımnastıkadan 9 dúrkin chempıony Iýrgen Brıýmmer óziniń 15 jasar sal ulyn óltirip, artynan ózine ózi qol salǵan. Saımon Brıýmmer 2009 jyly kólik qaǵyp ketken soń múgedek bolyp qalypty. Sol ýaqyttan beri jasóspirim qozǵala da, sóılese de almaıdy eken.
Internet materıaldary negizinde ázirlendi.