Kelisimshart jobasy tal­qylanýda

Astanada ótip jatqan Eýrazııalyq ekonomıkalyq komıssııa keńesi otyrysynyń búgin sońǵy kúni. Keńes jumysy burnaǵy kúni bastalǵan bolatyn. Oǵan Qazaqstan tarapynan Premer-Mınıstrdiń birinshi orynbasary Baqytjan Saǵyntaev qatysýda. «Keńesip pishken ton kelte bolmas» degendeı, úsh kúnge ulasqan keńes otyrysynda negizinen Eý­ra­zııa ekonomıkalyq odaǵyn qu­rý týraly kelisimshart jobasy tal­qylanýda. Bul jóninde keshe jýrnalıstermen ótkizgen brıfıngte Baqytjan Saǵyntaev málimdedi. «Búgingi tańda biz Eýrazııa eko­nomıkalyq odaǵy týraly kelisim­sharttyń negizgi baǵyttary boıyn­sha kezeńdik jáne ózara tıimdi ekonomıkalyq yntymaqtastyq negizinde ıntegrasııalyq pro­sesterdi damytý qajettigi týraly jalpy túsinik bar dep aıta alamyz», dedi B.Saǵyntaev. Premer-Mınıstrdiń birinshi oryn­basary sondaı-aq, munda jalpy al­ǵanda ınstıtýttyq jáne fýnksııalyq baǵyttar qaralyp jatqanyna toq­taldy. Negizgi kóp usynys aıtylyp, kóp talqylaýǵa túskeni qazirgi fýnk­sııalyq jaǵdaı bolyp otyr, deı kele, otyrystyń qatysýshylary keli­sim­sharttyń fýnksııalyq bóligi, ıaǵnı saýda saıasaty týraly ereje, salyq saıasaty, qarjy sektory, agroónerkásiptik keshen, ónerkásiptik saıasat týraly máseleler jan-jaqty talqylaǵanyn atap ótti. «Sarapshylar arasynda kelispeý­shilik týdyrǵan saýaldardy keńes deń­geıinde talqylaı bastadyq», dep tolyqtyrdy B.Saǵyntaev. Keńeste qamtylǵan taǵy bir má­se­le – Armenııanyń Keden odaǵy men Eýrazııalyq ekonomıkalyq keńis­tik­ke kirý jónindegi jeltoqsan aıyn­da jasalǵan jol kartasy bolyp otyr­ǵanyn da aıtyp ótti. Búgingi kúni sol jol kartasynyń elý paıyzy Armenııa tarapynan oryndalǵan. Al olar ózderine alǵan mindetterin bıylǵy jyldyń mamyr aıyna deıin oryndaı­myz degen usynys aıtyp otyr, deıdi B.Saǵyntaev. Aıtyp ótsek, bul keńeske Keden odaǵyndaǵy úshtik elmen qatar Armenııa ókilderi de qatysyp jatqan bolatyn. Dınara BITIKOVA, «Egemen Qazaqstan».