Syr boıynda memleket-jekemenshik seriktestigi aıasynda atqarylǵan bastama kóp. Bılik pen bıznes baılanysynyń jańa formatynyń sharapatyn ásirese shalǵaı aýyldaǵylar kórip otyr. El Táýelsizdiginiń 30 jyldyǵy qarsańynda oblysta atalǵan seriktestik aıasynda boı kótergen birqatar áleýmettik nysandar ashyldy.
Osyndaı sharalardyń alǵashqysy oblys ákimi Gúlshara Ábdiqalyqovanyń qatysýymen Jańaqorǵan aýdanyndaǵy Tómenaryq aýyldyq okrýginde ótti. Aýyldaǵy sport keshenin «Aıarý» JK salǵan. On eki adamdy jumyspen qamtyǵan keshende 170-ke jýyq balaǵa erkin kúres, dzıýdo jáne basketbolmen aınalysýǵa múmkindik týyp otyr.
Tómenaryq – aýdandaǵy eń irgeli eldi mekenniń biri. Alty myńǵa jýyq turǵyny bar aýyldaǵy sport mektebi toqsanynshy jyldary jabylyp qalǵan edi. Sol kezeńdegi qıyndyqtan birligin buzbaı aman shyqqan aýylda sheshimin tappaǵan másele joqtyń qasy.
– Aýyldy qaq jaryp temir jol jelisi ótip jatqanyn kórdińizder ǵoı. Bıyl sol joldyń arǵy betinde 9 kóshe asfalttaldy. Kelesi jyly taǵy 11 kóshe josparda tur degendi estip otyrmyz. Sońǵy 5-6 jylda aýyl kóshelerine sport alańdary salynyp, deneshynyqtyrýmen aınalysatyn balalar qatary kóbeıgenine qýanǵanbyz. Endi myna jabyq sport kesheni sol qýanyshymyzdy eselep otyr, – deıdi aýyldyq ardagerler keńesiniń tóraǵasy Temirbek Qutjanov.
Oblys ákimi aýylǵa sport keshenin syılaǵan kásipkermen pikirlesip, jańa ǵımaratta jattyǵyp jatqan jasóspirimdermen sóılesti. Aqsaqaldardyń aýyldy damytý baǵytyndaǵy usynys-tilekterin tyńdady.
Aýdandaǵy eń shalǵaı aýyl Qandózde de bılik pen bıznes áriptestiginiń aıasynda sport kesheni qoldanysqa berilip otyr. Búginde munda 126 bala sporttyń 3 túri boıynsha jattyǵady. Oblys ákimi aýyl turǵyndarymen kezdesýde ınfraqurylym máselelerine qatysty usynys-pikirlerine qulaq túrip, olardyń kezegine qaraı sheshiletinin aıtty.
Gúlshara Naýshaqyzy turǵyndarmen júzdesýde óńirdegi 2 156 balany qamtıtyn memlekettik sporttyq tapsyrysty qarjylandyrýǵa bıyl 212 mln teńge qaralsa, keler jyly qarjyny 638 mln teńgege ulǵaıtý josparda bar ekenin jáne osy arqyly 4 312 balany buqaralyq sportqa tartý kózdelgenin aıtyp ótti. Aýyl sportyn kóterýge atsalysyp, jeke qarajaty esebinen nysan salyp múddelestik tanytqan kásipkerlerge alǵysyn bildirdi.
Aýdandaǵy Jańaryq eldi mekeninde de aýyldyq dárigerlik ambýlatorııa ashyldy. О́ńir basshysy ult densaýlyǵyn nyǵaıtý memlekettik saıasattyń basym baǵyttarynyń biri ekenin, jańa dárigerlik ambýlatorııa aýyl turǵyndaryna medısınalyq kómekti qoljetimdi etýge múmkindik beretinin atap ótti.
– Memleket basshysy ótken jylǵy Joldaýynda densaýlyq saqtaýdyń tıimdi modelin qurý arqyly 3 jyl ishinde barlyq aýyldyq eldi mekendi feldsherlik-akýsherlik pýnkttermen jáne dárigerlik ambýlatorııalarmen qamtamasyz etý qajettigin aıtty. Osy tapsyrmaǵa sáıkes aımaqtyń barlyq aýdandarynda medısınalyq nysandar jańadan salynýda. Byltyr Jalaǵash aýdanynda 100 tósektik zamanaýı ortalyq aýrýhanany paıdalanýǵa bersek, osy jyly tamyz aıynda oblys ortalyǵynan modýldi juqpaly aýrýlar aýrýhanasy ashyldy. Jyl sońyna deıin Qazaly aýdanynan 250 kelýshige arnalǵan emhanany el ıgiligine tabystaıtyn bolamyz,– dedi G.Ábdiqalyqova.
Oblystaǵy isker azamattar arasynda eshkimnen ótinish, tapsyrma kútpeı-aq aýyldastaryna qoldan kelgen kómegin kórsetip otyrǵandar az emes. Solardyń biri – Shıeli aýdanyndaǵy «Aqmaıa» sharýa qojalyǵynyń jetekshisi Dáýlet Jumbekov. Oblys basshysy aýdanǵa saparynda qojalyqta jumys isteıtin kópbalaly 2 otbasyǵa baspana salyp bergen kásipkerdiń jumysyna sáttilik tiledi.
Aýdandaǵy Kerdeli aýyldyq okrýginde Baǵlan Áshirbekov atty isker azamat memleket-jekemenshik áriptestik aıasynda sporttyq saýyqtyrý keshenin salyp bitirdi. Onda kúres, taekvando, basketbol, shahmat jáne aýyr atletıka úıirmeleri bar. Jańa nysannyń 11 turaqty jumyspen qamtyǵanyn jáne qosyńyz.
– Sońǵy 5 jylda memleket-jekemenshik áriptestik sheńberinde Aqmaıa, Alǵabas, Bestam, Turan aýyldyq okrýgterinde sport kesheni paıdalanýǵa berilip, sportshylarymyzdyń jeńisteri eselene tústi, – dedi oblys ákimi. – Búgin taǵy bir keshendi qoldanysqa bergeli turmyz. Bul aýyldy damytýǵa aıryqsha kóńil bólinip otyrǵandyǵynyń dáleli. Osy sport kesheninen shyńdalǵan jastarymyz túrli dodalarda jeńiske jetip, olımpıada shyńdaryn baǵyndyryp, kók Týymyzdy jelbirete bersin.
Shıelidegi el Táýelsizdiginiń 30 jyldyq mereıtoıy aıasyndaǵy sharalardyń birinde Turan eldi mekeni «kógildir otynǵa» qosyldy. Oblys ákimi Gúlshara Ábdiqalyqova turǵyndar qýanyshyna ortaqtasyp, saltanatty sharaǵa qatysty.
Jyl basynan beri Josaly, Jalaǵash, Tereńózek kentteri men osy aýdandaǵy Bekejanov jáne Qodamanov aýyldaryna tabıǵı gaz jetse, az kúnde «kógildir otynǵa» Qazaly qalasyn qosý josparlanýda.
Qyzylorda oblysy