Kitap týraly ǵulamalardan qalǵan ushqyr sóz az emes. Zańǵar jazýshy Muhtar Áýezov: «Árbir adamnyń eń jaqsy dosy kitap bolýy tıis» dese, ǵulama qalamger Ábish Kekilbaev: «Kitap – kitaphana – máńgilik parasattyń eń kıeli ǵımaraty», deıdi.
Elordadaǵy Ulttyq akademııalyq kitaphana osy bir qanatty tirkesterdi tumardaı taǵynyp, elimiz kóleminde «Bir el – bir kitap» aksııasyn osymen segizinshi ret uıymdastyryp otyr. Bıylǵy sheshim boıynsha jalpyhalyqtyq oqýǵa kórnekti qazaq jazýshysy, Memlekettik syılyqtyń laýreaty Saıyn Muratbekovtiń «Jýsan ıisi» men «Basynda Úshqaranyń...» atty povesteri usynylypty.
Ádebıetke ótken ǵasyrdyń alpysynshy jyldary aralasqan qarymdy qalamger Saıyn Muratbekov «Meniń qaryndasym», «Aýyl oty», «Kókoraı», «Otaý úı», «Jabaıy alma», «Dos izdep júrmin», «Qalyń qar», «О́liara» shyǵarmalarymen qalyń kópshilikke tanylyp, proza salasynda ózindik qoltańbasyn qaldyrdy. Shetel jazýshylarynyń shyǵarmalaryn aýdarýǵa da óz úlesin qosqan. Qarapaıym adamdardyń bolmysyn ádemi sýrettegen týyndylary – orys, ózbek, tatar, ýkraın, belorýs, grýzın, ázerbaıjan, lıtvan, arab tilderinde tárjimalandy. Onyń shyǵarmashylyǵy týraly bilimdar synshy Saǵat Áshimbaev: «Basynda Úshqaranyń...» – Saıyn shyǵarmashylyǵyndaǵy adam janynyń dıalektıkasyn ishki sezim dramatızmi arqyly ashýdaǵy erekshe dúnıesi. Bul áńgime arada uzaq jyldardan soń keshegi ózi ósken, balalyq shaǵy ótken týǵan aýylyna saǵynyshpen oralǵandardyń basyndaǵy qaıtalanbas kóńil-kúıi týraly elegııa der edik», dep tolyqqandy baǵasyn bergen bolatyn.
Qazaq ádebıetin nasıhattaý, oqyrmandardy kitap oqýǵa tartýdy maqsat etken Ulttyq akademııalyq kitaphanada ótken «Bir el – bir kitap» atty baspasóz konferensııasynda aksııanyń uıymdastyrý komıtetiniń tóraǵasy Ǵarıfolla Esim, belgili jazýshylar Ákim Tarazı, Adam Mekebaev pen Álibek Asqar bıylǵy qalyń oqyrmanǵa qos týyndysy usynylyp otyrǵan kórnekti jazýshy Saıyn Muratbekov jóninde estelikter aıtyp, jazýshynyń shyǵarmashylyǵy jóninde oı-pikirlerin ortaǵa saldy.
Berik SADYR,
«Egemen Qazaqstan».