Qazaq balasy Nuráli Álip «Zenıt» komandasynda dop tebetin boldy. Taıaýda «Mıdtıýllandpen» (Danııa) ótken joldastyq kezdesýde jalǵyz goldyń avtory atanǵannan keıin Reseıdiń birqatar sport saıty Sankt-Peterbýrgtiń komandasy otandasymyzdy fýtbol maýsymynyń sońyna deıin «Qaırattan» jalǵa alady degen aqparat taratty. Al burnaǵy kúni championat.com-ǵa suhbat bergen komandanyń bas bapkeri Sergeı Semak Nurálini satyp alý quqyǵymen jalǵa alatynyn rastady. Eger de transfer júzege asqan jaǵdaıda otandasymyz «Zenıt» jeıdesin kıedi.
«Jattyqtyrýshylaryma qaryzdarmyn»
Jalpy, Nuráli Álip Almatynyń «Qaırat» akademııasynan tálim alǵanymen, shyn máninde ol Aqtaýda dúnıege kelgen. 2015 jyly «Qaırattyń» «skaýttary» jas fýtbolshynyń oıynyn joǵary baǵalap Almatyǵa shaqyrdy.
– Men 1999 jyly Aqtaýda dúnıege keldim. 2008 jyldan bastap «Kaspııdiń» jasóspirimder fýtbol klýbynda oınaı bastadym. Meniń alǵashqy jattyqtyrýshym – Erjan Maqsatuly Jambyrov. Ol qatal jáne talapshyl tálimger boldy. Jattyqtyrýshym maǵan sendi jáne qıyn ýaqytta qoldaý kórsetti. Men bul kisige qaryzdarmyn, – degen ol «Qaırat» akademııasyna qalaı qabyldanǵanyn aıtty. – 2015 jyldyń shilde aıynyń ortasy bolatyn. 1999 jylǵy týǵan jastardyń arasynda jarys ótti. Sol kezde biz Almatynyń «Qaıratyn» 2:0 esebimen uttyq. Bir aptadan keıin meni «Qaırat» akademııasyna shaqyrdy. Synaqtan sátti ótip, úsh jyl akademııa qabyrǵasynda oqydym. Almaty klýbynyń jasóspirimder komandasynda, odan keıin onyń qosalqy quramynda óner kórsettim. Tájirıbeli oıynshylardyń qoldaýynyń arqasynda «Qaırattyń» negizgi quramyna da tez beıimdeldim.
Nuráli «Kaspıı» klýbynda shabýylshy boldy. Al qorǵanys shebinde oınaýdy tek «Qaıratqa» kelgennen keıin úırene bastady. Munyń sebebin sol kezdegi «Qaırat» akademııasynyń jastar jáne jasóspirimder fýtbolyn damytý baǵdarlamasynyń jetekshisi (2016-2018 j.j.) Dmıtrıı Galıamın bylaı túsindiredi: «Nelikten biz ony qorǵaýshy ettik? О́ıtkeni N.Álip baspen táýir oınaıdy, tehnıkasy da bar. Alańda árbir dopqa sońyna deıin talas júrgizedi. Úlken fýtbolda ortalyq jartylaı qorǵaýshy bolyp oınaý – qıynnyń qıyny. Sondyqtan fızıkalyq kórsetkishterine qarap, qorǵanysqa aýystyrdyq. Biz qatelespedik. Búginde ol Qazaqstandaǵy eń myqty qorǵaýshylardyń birine aınaldy».
Qazaq fýtbolynyń bolashaǵy
Nuráli Álip «Qaırat» sapynda 2018 jyly Qazaqstan premer-lıgasynyń alǵashqy týrynda alańǵa shyqty. Ortalyq qorǵaýshy eki aptadan keıin ulttyq quramaǵa shaqyrylyp, alǵash ret Bolgarııamen oıynda alańǵa shyqty.
– «Qaırat» pen «Qyzyljar» arasyndaǵy oıynnan keıin ulttyq quramanyń jattyqtyrýshylarynyń biri maǵan qońyraý shalyp, quramaǵa shaqyrǵanda tolqyǵanym sonshalyq, maǵan habarlasqan adamnyń atyn suraýdy da umytyp ketippin. Sodan keıin ulttyq quramanyń oıynshylar tiziminde ózimdi kórgende, qatty qýandym, – deıdi N.Álip.
Sol kezde ulttyq quramanyń bas bapkeri bolǵan Stanımır Stoılov munyń fýtbolshyǵa berilgen «avans» ekenin aıtqan bolatyn.
– Men Nuráli Áliptiń bir ǵana oıynyn kórdim. Birden shaqyrtý jiberdim. Bul – oǵan berilgen «avans». Onyń boıynda negizgi quramnyń fýtbolshysy atanýǵa qajetti qabilettiń bári bar. Jalpy Nuráli – Qazaq fýtbolynyń bolashaǵy, – degen edi bolgarııalyq bapker.
22 jastaǵy qorǵaýshy – tórt jyldan beri «Qaırat» pen Qazaqstan quramasynyń negizgi oıynshysy. El birinshiliginde top jaryp, eýrokýbokta tájirıbe jınaqtaǵan. Endi óz kúshin Reseı chempıonatynda baıqap kórýge jaqyn tur.
Reseılik fýtbol sarapshysy Denıs Safronov buqaralyq aqparat quraldaryna bergen suhbatynda Nuráli Álip týraly jyly pikir bildirdi.
– Nuráli Áliptiń oıynyna baǵa berýge áli erterek. Onyń ústine Reseı chempıonatynyń Qazaqstanǵa qaraǵanda deńgeıi joǵary. Sondyqtan qandaı qorǵaýshyǵa da Reseı premer-lıgasynda oınaý qıynǵa túsedi. Tájirıbesi mol Rakıskıı, Lovren, jastardyń arasynda Chıstıakov jáne Krýgovoımen básekelesý kerek. Degenmen Nuráli óte salqynqandy. Jyldamdyǵy da bar. Alǵy shepke pas shyǵaryp, shabýylshylardy qamshylaı biledi. Baspen de jaqsy oınaıdy, – dedi fýtbol mamany.
Al fýtboldan Qazaqstan quramasynyń burynǵy oıynshysy Andreı Karpovıchtiń aıtýynsha, qazaqstandyq qorǵaýshy qazirgi kezde deńgeıi jaǵynan Lovren men Rakıskııden joǵary turǵanyn aıtady.
– «Zenıttiń» Nurálini oqý-jattyǵý jıynyna shaqyrýy men úshin tosyn syı bolǵan joq. Ol – dál qazirgi tańda elimizdiń eń úzdik qorǵaýshylarynyń biri jáne óte jyldam ári bolashaǵynan zor úmit kúttiretin jas fýtbolshy. Biraq «Zenıttegi» tájirıbeli oıynshylarmen básekelesý qıyndaý bolýy múmkin. Soǵan qaramastan, men oǵan senemin, – deıdi A.Karpovıch.
Onyń quny – 5 mln dollar
– Myqty komandalardyń maǵan qyzyǵýshylyq tanytyp otyrǵany qýantady. Eger men sheteldik chempıonattarda synǵa túsetin klýbtardyń nazarynda bolsam, onda men durys baǵytta kele jatyrmyn. Eń bastysy, qol jetken jetistiktermen toqtap qalmaı, ári qaraı jumysty jalǵastyra berýim kerek, – degen Álip TOP chempıonattarda oınaǵysy keletinin de jasyrǵan joq. – Barlyq fýtbolshy sekildi men de reıtıngi joǵary TOP-5 chempıonatta oınaǵym keledi. Reseıde jaqsy óner kórsetsem, Eýropanyń TOP klýbtaryna jol ashylatynyn bilemin. Sol úshin eńbektene beremin.
Jalpy, «Qaırattyń» basshysy Qaırat Boranbaevtyń aıtýynsha, Nurálige «Zenıt» 2020 jyldan beri qyzyǵýshylyq tanyta bastaǵan. Biraq búginde onyń «Qaıratpen» úsh jylǵa kelisimsharty bar. Sondyqtan ol 5 mln AQSh dollaryna baǵalanyp otyr.
«Qaırat» pen «Zenıt» arasyndaǵy transfer týraly aıtý áli erte bolsa da, D.Galıamın eki komanda Nurálini satyp alýda ymyraǵa kelýi kerek dep esepteıdi.
– «Qaırat» basshysy – jaqsy bıznesmen. Nuráli Álip úshin basqa TOP-klýbtardyń qyzyǵýshylyq tanytyp jatqanyn jaqsy biledi. N.Álipte qorǵaýshyǵa tán qasıettiń barlyǵy bar. Sondyqtan oǵan deńgeıi Qazaqstannan joǵary chempıonatqa aýysý kerek. Eger de eki komandanyń arasynda transfer bola qalǵan jaǵdaıda, olar bir mámilege keledi dep oılaımyn, – dedi maman.
Nuráliniń 10 jasynda ákesinen, 12 jasynda anasynan aıyrylǵanyn kóp oqyrman bile bermeıdi. Al ol óziniń eńbekqorlyǵy men maqsatkerliginiń arqasynda osyndaı deńgeıge kóterilip otyr. N.Áliptiń alar asýy áli alda ekenine de úlken úmitpen kóz tigemiz.