Naýryzdyń shýaqty kúni birqatar óskemendikter úshin qos qýanyshqa ulasty. «Jumyspen qamtýdyń jol kartasy-2020» memlekettik baǵdarlamasynyń úshinshi baǵyty aıasynda oblys ortalyǵynyń 19-móltek aýdanynda shaǵyn otbasylarǵa arnalǵan 70 páterli jataqhana paıdalanýǵa berildi.
Bes qabatty úıdiń 23 páteri bir bólmeli bolsa, qalǵany eki bólmeli páterler. Bul kúni baspanaǵa qol jetkizgen jetpis otbasynyń ishinde 29 jasqa deıingi 37 jas otbasynyń qýanyshy bólek. Olardyń barlyǵy – quqyq qorǵaý, bilim berý, densaýlyq saqtaý, salyq komıteti, mádenıet syndy bıýdjettik sala qyzmetkerleri.
Qonys toıyna oblys ákimi Berdibek Saparbaev ta ortaqtasyp, páter kiltterin saltanatty túrde tabys etti. Elbasy Nursultan Nazarbaevtyń alǵashqy kezekte halyqtyń turmysy men ál-aýqatyn kóterýge kóńil bólip otyrǵanyn jetkizgen aımaq basshysy el ekonomıkasynyń órge basýy turǵyn úı qurylysynyń jandanýynan kórinetinin atap ótti. 2013 jyly О́skemende 98 myń sharshy metr turǵyn úı paıdalanýǵa berildi. Bıýdjet qarajaty arqyly 9 kópqabatty jáne 36 jeke turǵyn úı salyndy. Bıyl óńirde tuńǵysh ret «Jas otbasy» baǵdarlamasynyń qatysýshylary men jetim balalar Á.Moldaǵulova, K.Marks kóshelerinde boı kótergen jańa úılerden páter aldy.
Ulystyń uly kúni baspanaly bolǵan Ana men bala ortalyǵynyń anastezıolog dárigeri Dýman Jaqsylyqov jubaıymen bir mekemede dáriger bolyp qyzmet etedi eken.
– Búgin jańa páter kiltine ıe bolyp otyrmyz. Biz sııaqty jas mamandarǵa jaǵdaı jasap otyrǵan Memleket basshysy Nursultan Nazarbaevqa jáne oblystyq, qalalyq ákimdikke sheksiz rızashylyǵymyzdy bildiremiz, – dedi qýanyshymen bólisken Dýman Sársenuly. Al «Arman» balabaqshasynda tárbıeshi bolyp eńbek etetin Aıjan Qusaıynova jas otbasy retinde kezekte turǵanyna eki jyldan asa ýaqyt bolǵanyn jetkizdi.
– Joldasym júrgizýshi bolyp jumys isteıdi. Eki balamyz bar. Naýryz meıramynda páterli bolyp jatqanymyzǵa erekshe qýanyp turmyz. Barsha halyqty Ulystyń uly kúnimen quttyqtaımyn! – dedi páterli bolǵan jas ana.
Dýman ANASh,
«Egemen Qazaqstan».
О́SKEMEN.