Ulttyq álipbıdiń avtory, aǵartýshy-ǵalym Ahmet Baıtursynulynyń keń kólemde atalyp ótip jatqan mereıtoıynda josparlanǵan aıtýly sharalardyń biri «Ult ustazy» kitabynyń alǵashqy tusaýkeseri Túrkııa tórinde ótip, kópshilikke jol tartty.
400 betten turatyn aýqymdy eńbek Qazaqstan, Ázerbaıjan, Qyrǵyzstan, О́zbekstan, Túrikmenstan jáne Túrkııa elderiniń ǵalymdary qatysqan «Qazaq til ǵylymyna tarıhı sheginis» atty halyqaralyq ǵylymı konferensııa aıasynda tanystyryldy.
«Ult ustazy» atty ahmettanýdaǵy irgeli kitaptyń avtory, fılologııa ǵylymdarynyń kandıdaty, О́.Sultanǵazın atyndaǵy Qostanaı memlekettik pedagogıkalyq ýnıversıtetiniń professory Serikbaı Ospanuly da A.Baıtursynuly dúnıege kelgen aýylda týyp-ósken. Mektep qabyrǵasynda júrip-aq kóp dúnıeni kókeıine túıip ósken ǵalym ult aǵartýshysynyń ómirin zertteı júrip, qalyń oqyrmanǵa arnap buǵan deıin 56 maqala jarııalaǵan bolatyn.
– Ahmet Baıtursynulynyń ómiri men onyń shyǵarmashylyǵy jaıynda halyq áli de tolyq bilmeıdi. Mysaly, ultynyń saýatyn ashý maqsatynda tóte jazýdy tapqan osy kisi. Ahań jaıynda aıtylar sóz kóp. Sondyqtan álemdik deńgeıde atalyp ótip jatqan 150 jyldyq mereıtoıyna oraı, «Ult ustazy» degen kitabymdy daıyndadym. Bul eńbek – meniń ómirlik izdenisimniń jemisi, – deıdi kitap avtory, aqyn, professor Serikbaı Ospanov.
Jınaqta aǵartýshy ǵalymnyń ómiri men shyǵarmashylyǵynan bólek, aqyndyǵy, synshylyǵy jáne ómirine yqpal etken tulǵalar jaıy sóz qozǵalady. Sondaı-aq eki taraýdan turatyn kitapqa Baıtursynuly týraly sheteldik ǵalymdardyń oı-pikiri men ahmettanýshylardyń eńbegi de toptastyrylyp otyr.
Atalǵan kitaptyń jaryqqa shyǵýyna Almaty qalasy ákimdigi men «Túrki mádenıeti» halyqaralyq uıymy tikeleı qoldaý bildirgen.