Ákimderdiń áleýmetpen baılanysy álsiz

Eli­mizdegi turǵyndardyń basym bó­ligi negizinen aýdandar men aýyl­dar­da turyp jatqandyqtan, jer­­gilikti halyq máselesin ákim­der­ge aıtady. Áli kúnge deıin she­shimin tappaǵan kúrdeli máse­leler kezegin kútip tur. Mem­leket basshysy Qasym-Jomart Toqaevtyń «Halyq únine qulaq asatyn memleket» tu­jy­rym­da­masy da túrli deńgeı­de­gi ákim­der­diń áleýmetpen baı­lanysyn nyǵaıtýǵa baǵyttalǵan.

Bul rette Prezıdent barlyq bas­shynyń halyqpen baılanysyn arttyrýdy mindettep otyr. Jyl saıyn ákimder halyq aldynda esep beredi. Suraq qoıylsa, jaýap ta daıyn. Keı­bir kúrdeli máselelerdi sheshýge baılanysty kópshilikke ýáde de berip jatady. Endi túrli deńgeıdegi ákim­der ózderine baǵynysty aýmaqty ara­lap, jurtshylyqpen júzdesedi. Árıne, munyń bári durys. Degenmen ha­lyq­pen keri baılanys munymen ǵana shek­telip qalmasa kerek.

Qazirgi kezde qoǵamda áleýmettik jelilerdiń belsendiligi artýda. Bul da bolsa oı aıtýdyń, másele kóterýdiń zamanaýı alańy deýge bolady. Bir aı buryn ákimniń qabyldaýyna jazylyp qoıyp, kezegin kútip júretin keıbir azamattarda ýaqyt ta bolmaýy múmkin. Eldiń bárin birdeı qabyldaı beretin ákimderde de múmkindik joq. Máselen, Prezıdent Qasym-Jomart Toqaevtan bastap, elimizdegi barlyq laýazymdy tulǵa derlik áleýmettik jelilerde tirkelgen. Prezıdent pármenimen áleýmettik jeli arqyly talaı máseleniń sheshilgeninen kópshilik habardar. Jambyl oblysynda da jergilikti bılik ókilderiniń turǵyndarmen keri baılanysyna tıisti kóńil bólinýde. Degenmen óńirdegi birqatar aýdan ákimderi áleýmettik jelilerdiń áleýetin paıdalana almaı otyr. Aımaqta turǵyndardyń talap-tilegine qulaq asyp, máseleni zerdelep, tıisti sheshim shyǵaryp jatqan ákim az. Sonymen qatar oblystaǵy kóp shendiler áleýmettik jeli arqyly atqarǵan jumystaryn kórsetip, elge bir ýaq esep berýdi de qoıǵan. Máselen, Merki aýdanynyń ákimi Rýslan Nursıpatov jyl basynan beri Facebook áleýmettik jelisine birde-bir jazba jarııalamaǵan. Qaıta áleýmettik jelilerde ákimniń halyqtyń aldynda qyzmetinen óz erkimen ketemin dep alyp, ketpeı qalǵany týraly áńgime qyzý talqylandy. Sondaı-aq jýyrda Merki aýdanynyń Aqermen aýylynda turǵyndardyń arasynda mal jáne egistik jerlerge baılanysty daý týyndaǵan bolatyn. Osy másele týrasynda da aýdan basshysy pikir bildirmegen. Sol sııaqty, Jýaly aýdanynyń ákimi Oljas Qarjaýovtyń da Instagram paraqshasy jabyq, ıaǵnı jalpy jurtqa qoljetimsiz bolyp tur. Ol Facebook áleýmettik jelisinde de eshqandaı jazba jarııalamaǵan. Sondaı-aq Sarysý aýdanynyń ákimi Marat Sultanǵalıevtiń de Instagram, Facebook paraqshalary jyl basynan beri múlde júrgizilmegen. Bul ákimder jyl basynan beri jergilikti halyqqa aýdannyń tynys-tirshiligi, ózderiniń jumysy, jalpy aýdannyń damý barysy týraly eshqandaı da aqparat bermegen. T.Rysqulov aýdanynda da ózekti másele boıynsha keri baılanys ornatylyp, naqty jaýaptar uıymdastyrylmaǵan. Máselen, bıyl túsindirý jumystary durys júrgizil­megendikten, Qoraǵaty aýylynda jer máselesine baılanysty daý týyndaǵan.

Kerisinshe, jambyldyq jurtshylyq áleýmettik jeliler arqyly Moıynqum aýdanynyń ákimi Álıhan Balqybekov, Qordaı aýdanynyń ákimi Máden Musaev, Baızaq aýdanynyń ákimi Baqyt Qazanbasov, Talas aýdanynyń ákimi Qanatbek Mádibek, Shý aýdanynyń ákimi Sáken Arýbaev sııaqty basshylardyń kúndelikti jumysyn kórip otyr. Sol sebepti de búginde áleýmettik jeli degenińiz jumys isteýdiń ońtaıly joly bolyp keledi. Degenmen muny árkim ártúrli maqsatta paıdalanady. Jýyrda ǵana Taraz qalasy ákiminiń orynbasary Ashat Esenálıev týraly bir túsirilim áleýmettik jeli­ler­ge tarap ketip, qoǵamdaǵy biraz piki­r­talasqa sebep bolǵan edi. Al ne­gi­zi­nen kópshilik turǵyn áleýmettik je­li­­lerdi paıdalanatyn bolǵandyqtan túrli máseleni tıisti basshylarǵa osy arqyly jetkizip jatady. Jurttyń janaı­qaıyna ákimder qulaq túrip jatyr ma degenge kelsek, onyń nátıjesi álgin­deı bolyp tur.

Jalpy, oblystaǵy aýdan ákimdik­te­rinde baspasóz hatshysynyń shtaty qarastyrylmaǵan. Sondyqtan da barlyq aýdanda derlik bul mindet aýdan ákimdigine qarasty ishki saıasat bóliminiń bir mamanyna júktelgen. Shynyn aıtsaq, ákimniń paraqshasyn júrgizý de sol adamnyń moınynda. Biraq ári qaraı muny qadaǵalap jatqan eshkim joq. Mundaı másele oblys ákimdiginiń basqarmalarynda da bar. Kóptegen basqarmada baspasóz hatshysynyń shtaty qarastyrylmaǵan. Kez kelgen mekemeniń baspasóz qyzmeti bolmaǵan jerde onyń jumysy kó­rin­beıdi. Al ózderi de mardymsyz jalaqy alyp júrgen mamandar mun­daı jumysty qulshyna júrgizýge qu­lyq­syz. Degenmen búginde oblys ákimi Berdibek Saparbaev jumysy kózge kórinbeı kele jatqan kóptegen ákimdi synǵa alyp, nátıjeli jumys atqarýǵa mindettep otyr.

«Aldaǵy ýaqytta bul baǵyttaǵy tal­daý aı saıyn turaqty túrde júr­­gizilip otyrmaq. Keıbir aýdan ákim­deriniń paraqshasy áleýmettik jeli­lerde tirkelgenimen, júıeli túr­de júrgizilmeıdi, keri baılanys joq deýge bolady. Bul óz kezeginde aýdan­ ­turǵyndarynyń narazylyǵyn týdy­­­ratyny sózsiz», deıdi oblys áki­­miniń baspasóz hatshysy Danııar Asqaruly.

Búginde Memleket basshysy halyq­pen tıimdi keri baılanys ornatýǵa aıryqsha nazar aýdaryp otyr. Qazir halyqtyń basym kópshiligi áleýmettik jelilerde otyratyndyqtan, bul óte mańyzdy. Jergilikti jurtshylyq tıisti aqparatty sol jerden alýy kerek. Al kóterilgen máselege der kezinde jaýap berý de ákimderdiń halyqpen keri baılanysyn kórsetedi. Ol úshin birinshi kezekte aýdan basshylary baspasóz hatshysynyń shtaty máselesin sheshýi kerek-aq. Qazirgideı aqparat jyldamdyǵyna basa mán beriletin kezeńde, bul da ózekti bolýy qajet dep bilemiz. Áıtpese, ákim­derdiń áleýmetpen jyl saıyn esepti kezdesýinde kezdeskeni, atqaryl­ǵan jumystardy baıandaǵany, taǵy da sol sııaqty dúnıeler olardyń tolyqqandy jumysyn kórsete almaıdy.