Jaqynda Qaraǵandy oblysynyń Jańaarqa aýdanynda brakonerlikke qatysty qylmystyq is tirkeldi. Osy óńirdiń tabıǵatty qorǵaý polısııa qyzmetkerleri «Qyzyl kitapqa» engen janýarlardyń múıizin satýmen aınalysyp kelgen topty áshkerelegen.
Jedel aldyn alý operasııasy kezinde tártip saqshylary 29 jastaǵy júrgizýshiniń Reseıde esepte turǵan VAZ 2114 avtokóligin toqtatyp, tekserý júrgizedi. Kólikti tintý kezinde ishinen 844 kıiktiń múıizi tabylǵan. Bul degenińiz brakonerler aqsha úshin 422 túz taǵysyn qyryp tastaǵan degen sóz.
Qazirgi tańda kúdikti ýaqytsha ustaý ızolıatoryna qamalyp, onyń eki seriginiń ústinen de qylmystyq is qozǵaldy. Al múıizder arnaıy saraptamaǵa jiberilgen.
Qylmystyq kodekstiń 339-baby 1-tarmaǵyna sáıkes bul qylmys úshin aıyptynyń búkil múlki tárkilenip, ózi úsh jyldan bes jylǵa deıin bas bostandyǵynan aıyrylýy múmkin.
Esterińizge sala keteıik, qaraǵandylyq polısııa qyzmetkerleri ótken jyly osy Jańaarqa aýdanynda kıik múıizderin satýmen aınalysyp kelgen topty ustap, olardan 274 múıizdi tárkilengen. Sot sheshimimen olardyń biri 4,5 jylǵa, úsheýi 3,5 jylǵa shartty túrde bas bostandyǵynan aıyrylǵan edi.
Ishki ister mınıstrligi Ákimshilik polısııa komıteti tabıǵatty qorǵaý polısııa tobynyń ınspektory, polısııa kapıtany Álisher Jarmaǵambetovtiń málimdeýinshe, jyl bastalǵaly beri elimizde tabıǵatty qorǵaý zańnamasyn buzýǵa qatysty 80-nen astam qylmys tirkelgen eken. Onyń ishinde zańsyz ań aýlaý jáne sırek kezdesetin janýarlardyń múıizin satý faktileri kóp.
«Eki aıdyń ishinde Qylmystyq kodekstiń 335-baby – balyq resýrstaryn, basqa da sý janýarlaryn nemese ósimdikterin zańsyz alý boıynsha 19 qylmys anyqtalsa, zańsyz ańshylyq faktisi 26-ǵa jetken. Al «О́simdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý» dep atalatyn 339-bappen 20 derek tirkelip otyr. О́kinishke qaraı, elimizde qara baqyr úshin kıeli ańdarǵa qastandyq jasaıtyndar azaımaı tur. Osyǵan oraı ishki ister organdary brakonerlikke jol bermeý, mundaı zańsyzdyqtardyń aldyn alý maqsatynda udaıy jedel is-sharalardy júzege asyryp keledi», deıdi polısııa kapıtany.
Jalpy, zańsyz aınalymnan 5,8 tonnadan astam balyq, onyń ishinde bekire tuqymdy balyqtyń 320 kılosy, 350,4 tekshe metr zańsyz daıyndalǵan orman aǵashy, 14 sý kóligi, 274 quqyq buzýshylyq quraly, onyń ishinde 114 otatqysh ańshylyq qarý tárkilendi. Al tabıǵatqa keltirilgen shyǵyn kólemi 2,5 mlrd teńgege jetken. Tergeý barysynda onyń tek 13,1 mıllıon teńgesi óndirildi.