Premer-Mınıstr Álıhan Smaıylov Ekonomıkany demonopolızasııalaý jónindegi komıssııanyń kezekti otyrysyn ótkizdi, onda «Atameken» UKP-nyń munaı óńdeý salasyn reformalaý jónindegi usynystary qaraldy, dep habarlady Úkimet basshysynyń baspasóz qyzmeti.
Energetıka mınıstri Bolat Aqsholaqov shaǵyn munaı óńdeý zaýyttary shyǵaratyn ónimniń sapasyn arttyrý úshin olardy tehnıkalyq retteý talaptaryn kúsheıtýdi usyndy.
Sondaı-aq EAEO tehnıkalyq reglamentine sáıkes kelmeıtin munaı ónimderin shyǵaratyn shaǵyn MО́Z-derge salyqtyq jáne kedendik jeńildikterdi alyp tastaý usynyldy.
Munaı óńdeý zaýyttarynan JJM jóneltý kezinde temirjol qyzmetterin kórsetý turǵysynan baǵanyń negizsiz ósýin jáne jekelegen kompanııalardyń básekesiz qyzmetin boldyrmaý úshin tarıfterdi tómendetý usynyldy.
Sonymen qatar Premer-Mınıstr Energetıka mınıstrligine sýbektilerdiń shekteýli tobyna jeńildikter usynbaý (tegin saqtaý) úshin naryqtyń barlyq qatysýshysyna MО́Z-de munaı ónimderin saqtaýdyń biryńǵaı reglamentin ázirleýdi tapsyrdy.
Munaı óńdeý zaýyttarynda negizsiz óndiristik shyǵyndardy boldyrmaý maqsatynda olardyń baqylaý jáne qaýipsizdik júıelerine aýdıt júrgizý tapsyryldy. «Bul baǵytta búkil tehnologııalyq prosesti qamtı otyryp, baqylaýdyń sıfrlyq tehnologııalaryn engizý qajet», dedi Á.Smaıylov.
Jalpy Úkimet basshysy aıtylǵan usynystardy qoldap, keıbireýine túzetýler engizýdi jáne olardy iske asyrý máselelerin pysyqtaýdy tapsyrdy.
Sondaı-aq suıytylǵan gaz naryǵyn, atap aıtqanda, onyń ónimin ónerkásiptik qaıta óńdeýshilerge satý, tasymaldaý jáne saqtaý boıynsha demonopolızasııalaý sharalary qaraldy.
Premer-Mınıstr ýákiletti memlekettik organdarǵa baǵalyq sóz baılasýǵa ákeletin jaǵdaılardy anyqtaý jumystaryn júrgizýdi jáne osy salaǵa qajetti naryq tetikteri boıynsha usynystar engizýdi tapsyrdy.