«Damý» kásipkerlikti damytý qory» AQ óńdeýshi ónerkásiptegi shaǵyn jáne orta bıznes sýbektilerin qarjylandyrý úshin 100 mıllıard teńgeni ornalastyrý týraly ekinshi deńgeıli banktermen nesıe kelisimine qol qoıdy. Bul jaıynda Prezıdent janyndaǵy Ortalyq kommýnıkasııalar qyzmetinde ótken kezekti brıfıngte «Damý» kásipkerlikti damytý qory» AQ basqarma tóraıymy Lázzat Ibragımova áńgimeledi.
Nesıe kelisimi «Damý» kásipkerlikti damytý qory» AQ pen 13 otandyq ekinshi deńgeıli bankter arasynda 2 paıyz mólsherlememen 20 jyl merzimge deıin jasalǵan. Qujatqa sáıkes atalǵan qarjyny ekinshi deńgeıli bankter óńdeýshi ónerkásip jobalaryn iske asyratyn shaǵyn jáne orta bıznes kásipkerlerine alty aı ishinde berýleri tıis.
Bankter shaǵyn jáne orta bıznes kásiporyndaryn ónerkásipti damytý baǵdarlamasy boıynsha nesıelendiredi. «Bankterge osy baǵdarlama aıasynda qandaı da bir komıssııa, aıyppul, ósimpul túrlerin alýǵa tyıym salynady jáne bul qarjy Ulttyq qordyń resýrstary bolǵandyqtan, olar otandyq tamaq, toqyma, metallýrgııa jáne mashına jasaý ónerkásipterine beriledi. «Damý» qory shaǵyn jáne orta bıznes ókilderi nesıeni qarastyrýǵa artyq komıssııa tólemes úshin barlyq prosedýralardy egjeı-tegjeıli baqylaıdy. Sonymen qatar, biz bankterdi yntalandyramyz. Olarǵa ortaq qarjylandyrý kórsetiledi jáne jobalarǵa basqa da qosymsha resýrstar tartatyn bolamyz», deıdi «Damý» kásipkerlikti damytý qory» AQ basqarma tóraıymy Lázzat Ibragımova.
Bul ıgi shara Memleket basshysynyń ekonomıkaǵa qoldaý kórsetý men onyń ósimin 6-7 paıyz deńgeıinde qamtamasyz etý týraly tapsyrmasyn iske asyrýdyń alǵashqy qadamy. Osy qarajatty bólý shaǵyn jáne orta bıznestiń jańa jobalary boıynsha ınvestısııalyq qyzmetterin yntalandyrady. Sondaı-aq, kásipkerlerge nesıelerin asa tıimdi sharttarmen qaıta qarjylandyryp, turaqty jumysyn jalǵastyrýǵa jáne óndiristik qyzmetin iske asyrýǵa múmkindik týǵyzady.
Ábdirahman QYDYRBEK,
«Egemen Qazaqstan».