ASTANA. 26 sáýir. Parlament Májilisiniń depýtattary túrmede jazasyn óteýshilerdiń sálem-saýqat alyp turýlaryna túsinistikpen qarady. Bul týraly «Ekspress K» habarlady.
Parlament Májilisi Qylmystyq atqarý kodeksiniń jobasyn talqylaýdy aıaqtap, ózderiniń sońǵy núktesin qoıdy. Bul jobany qaraýdyń endigi kezegi Parlament Senatynda.
Atalǵan qujat Májilistiń qaraýyna 2013 jyldyń qyrkúıeginde túsken bolatyn. Sodan beri osy zań jobasyn talqylaý barysynda depýtattar belsendilik tanytty. О́ıtkeni, bul qujattyń túrmelerdegi 40 myńdaı jazasyn óteýshi men olardyń týǵan-týystaryna tikeleı qatysty ekeni oılantsa kerek.
Qylmystyq atqarý júıesi komıtetiniń ókili Dınara Ábdirahmanova: «Qylmystyq atqarý kodeksiniń jobasynda kóptegen jańa erejeler bar. Máselen, bas bostandyǵynan aırylǵan adam ózin jaqsy jaǵynan kórsete bilse, onyń jazasy birshama jeńildeýi múmkin», – deıdi.
Sondaı-aq, bul Kodekste sottalǵandardyń mindetteri men quqyqtary birshama keńeıtildi.
Taǵy bir aıta keter jáıt, Kodeks jobasyn usynýshylar túrmelerdegi jaǵdaı jaqsara túskenin eskere kele, jazasyn óteýshilerge otbasy, jora-joldastary, aǵaıyn-týystary tarapynan jetkizilip turatyn as-aýqattyń berilýin qajet dep tappaǵan bolatyn. Biraq depýtattar túrmede otyrǵandardyń sálem-saýqat alyp turý quqyǵyna shekteý qoımady. Tek mundaı sálemdemeler arnaıy kezdesý ornynda ǵana berilý kerektigi maquldandy.
Sonymen qatar, Kodeks jobasyna sottalýshylarǵa jaǵymsyzdaý bolýy múmkin ózgeris te engizilip otyr. Naqtylap aıtsaq, bul endirilgen túzetý boıynsha, sottalýshynyń ózin izdep kelýshimen kezdesý ýaqyty burynǵydan 2 táýlikke qysqartyldy.
Kodekstiń jańa jobasynda bas bostandyǵynan aıyrylǵandardyń árqaısysyn jeke kamerada otyrǵyzý máselesi de qamtyldy.
Dınara Ábdirahmanova: «Qazaqstan boıynsha jazasyn óteýshilerdiń árqaısysyn óz aldyna jeke kameramen qamtamasyz etetin 7 túrme bar. Aldaǵy ýaqytta mundaı jaǵdaıǵa tolyqtaı kóshý josparlanýda», – deıdi.
Joldybaı Bazar.
Derekkóz: «Ekspress K».
Foto: RG.ru.