Keshe Úkimet úıinde Qazaqstan Respýblıkasynyń Premer-Mınıstri Kárim Másimov pen Malaızııa Premer-mınıstri Nadjıb Týn Razak bastaǵan eki eldiń úkimetaralyq kelissózderi bolyp ótti, dep habarlady Premer-Mınıstrdiń baspasóz qyzmeti.
Kelissóz barysynda taraptar saýda ekonomıkalyq yntymaqtastyqtyń keń aýqymdaǵy máselelerin talqylady.
Qazaqstan Úkimetiniń basshysy Qazaqstanda memlekettik údemeli ındýstrııalyq-ınnovasııalyq baǵdarlama sátti iske asyrylyp jatqanyn atap kórsetip, malaızııalyq ınvestorlardy osy baǵdarlamaǵa belsendi túrde qatysýǵa shaqyrdy. K.Másimovtiń aıtýynsha, munaı-gaz jáne taý-ken, ındýstrııaly ónerkásip, bilim berý, shaǵyn jáne orta bıznes, týrızm salalary boıynsha ózara is-qımyldy damytýdyń bolashaǵy zor.
«Qazaqstan Úkimeti jasalǵan sharttarǵa 10 jylǵa turaqtylyq berý, salyq jeńildikteri men sheteldik mamandardy tartý sııaqty ınvestorlarǵa jańa múmkindikter berýdi kózdeıtin zań jobasyn daıyndady», dedi Qazaqstan Premer-Mınıstri. Sondaı-aq, K.Másimov malaızııalyq tarapty Astanada ótetin EKSPO-2017 halyqaralyq mamandandyrylǵan kórmesine qatysýǵa shaqyrdy.
О́z kezeginde N.Razak Qazaqstan men Malaızııa arasyndaǵy qarym-qatynas joǵary deńgeıde damyp otyrǵanyn atap ótti. «Qazirgi tańda Qazaqstanda qýatty ekonomıkalyq ósim baıqalyp otyr. Bizde ekijaqty áriptestikti ári qaraı damytýdyń úlken áleýeti bar», dedi, Malaızııa Premer-mınıstri.
Kelissózder qorytyndysy boıynsha birqatar qujattarǵa qol qoıyldy. Atap aıtqanda, Mańǵystaý oblysynyń ákimdigi men «Kazakhstan Methanol Limited» jáne «Kenmakmur Holding Sdn. Bhd.» kompanııalary arasynda osy óńirde metanol jáne suıytylǵan tabıǵı gaz óndiretin zaýyttardyń qurylysy jóninde shekti kelisimge qol qoıyldy.
Jambyl oblysynyń ákimdigi men «Agrostan Farms Sdn. Bhd.» kompanııasy mal sharýashylyq fermalaryn qurý boıynsha yntymaqtastyq týraly memorandýmǵa qol qoıdy.