Keshe Prezıdent Ákimshiliginiń Basshysy Nurlan Nyǵmatýlın jumys saparymen Qyzyljar óńirinde bolyp, Qazaqstan Prezıdenti Nursultan Nazarbaevtyń Jarlyǵymen Erik Sultanovtyń Soltústik Qazaqstan oblysynyń ákimi bolyp taǵaıyndalǵanyn jetkizdi.
Oblystyń kezekten tys HHV sessııasyna qatysqan N.Nyǵmatýlın Prezıdenttiń óńir basshysy laýazymyna Erik Hamzauly Sultanovtyń kandıdatýrasyn usyný týraly hatyn oqyp berdi. Halyq qalaýlylary Elbasy usynysyn biraýyzdan qoldap, daýys berdi.
Sessııadan keıin oblys aktıvi ótti. Oǵan qatysqan Prezıdent Ákimshiliginiń Basshysy jınalǵandardy Prezıdent Jarlyǵymen taǵaıyndalǵan oblystyń jańa ákimimen tanystyrdy. «Sizder Erik Hamzaulyn jaqsy bilesizder dep oılaımyn. Ol osy óńirdiń týmasy, 1956 jyly týǵan. Birqatar laýazymdy qyzmetter atqarǵan. Tájirıbesi mol. О́zine de, ózgege de qatań talap qoıa biledi», dedi N.Nyǵmatýlın.
N. Nyǵmatýlın oblystyń burynǵy ákimi Samat Eskendirovtiń qyzmetke 2013 jyldyń qańtarynda taǵaıyndalyp, birshama jumystar atqarǵanyn, alaıda qyzmet ádebi men memlekettik tártipti bosańsytyp, sybaılas jemqorlyqqa jol bergeni úshin otstavkaǵa ketý jónindegi ótinishin Prezıdenttiń qabyl alǵanyn, qurylys basqarmasy basshysynyń mindetin atqarýshynyń paramen ustalyp, oblys ákiminiń orynbasaryna qatysty qylmystyq is qozǵalǵanyn jetkizdi.
Aktıv jıynynda sóz alǵan Soltústik Qazaqstan oblysynyń jańa ákimi E. Sultanov Elbasynyń ózine zor senim kórsetkeni úshin alǵys aıtyp, el ekonomıkasyn damytýǵa qabilet-qarymy men kúsh-jigerin aıamaıtynyna sendirdi.
О́mir ESQALI,
«Egemen Qazaqstan».
Soltústik Qazaqstan oblysy.