Velosporttan Qaraǵandynyń tas jolynda bastalǵan Azııa chempıonatynyń alǵashqy kúnderi qazaqstandyq sportshylar úsh altyn júldeni jeńip aldy.
Birinshi bolyp altyn medalǵa Ekaterına Iýraıtıs 15 km qashyqtyqta jekelegen jarysta ıe boldy. Ol japon Iýmı Kaıharany bir mınýttan asa qashyqtyqqa qaldyryp, márege birinshi jetti. Sóıtip, Ekaterına Astanada trekte ótken jarysty qosqanda úshinshi ret Azııa chempıony ataǵyn jeńip aldy. Astanadaǵy synda ol eki altyn medalǵa ıe bolǵan edi. Al chempıon qyzymyzdyń ózi jarystan soń jankúıerlerdiń qoldaýyna rıza bolǵanyn aıtyp, endi kelesi báıgege de jaqsy daıyndalýǵa tyrysatyndaryn atap ótti.
– Qaraǵandynyń salqyn aýa raıyna qaramastan tas jolda ystyq boldy. Jankúıerler óte jaqsy qoldaý kórsetti. Kóp rahmet, osyndaı ystyq yqylas únemi kóp kómek kórsetedi. Endi, qyzdarmen toptyq jarysqa daıyndalamyz. Jeńiske jetýge bar kúshimizdi salyp, júldeli orynǵa tyrysamyz, – dedi ol.
Keshe bizdiń taǵy bir sportshymyz Dmıtrıı Grýzdev aýa raıynyń qolaısyzdyǵyna qaramastan 45 km shaqyrymǵa arnalǵan synda máre syzyǵyn birinshi kesip, elimiz quramasyna ekinshi altyn júldeni syıǵa tartty. Ol jekelegen jarysta qarsylastarynyń bárin shań qaptyryp, eshkimge márege birinshi jetýge eshqandaı múmkindik bermedi. Ol qyrǵyzstandyq sportshy Vaker Iýgendi 1.19.20 sekýndtqa ozyp shyqty.
Bul Azııa chempıonatynda Dmıtrııdiń alǵashqy altyn medali. 2011-2012 jyldary ol kúmis júldeger bolǵan. Osy kúni 30 km qashyqtyqta jekelegen jarysta altyn medaldi Vıktor OKIShEV aldy.
Qazir Qazaqstan quramasy Astanada ótken jarysty sanaǵanda Azııa dodasynda barlyǵy 12 medalǵa ıe bolyp otyr. Sonyń ishinde otandastarymyz 7 altyn, 4 kúmis jáne 1 qola júldeni ıelenýde. Bizdiń elden basqa Ońtústik Koreıa, Japonııa jáne Mońǵolııa quramalary da jaqsy óner kórsetýde. Máselen, seısenbi kúni Álisher Jumaqan kúmis júlde alǵan jasóspirimder arasynda 30 km-ge arnalǵan jarysta koreılik Kım Djıhýn altyn medaldi, japon Kýsaba Keıgo qola júldeni ıelendi. Áıelder arasynda 30 km qashyqtyqqa arnalǵan synda taǵy bir koreı sportshysy Na Aeým chempıon atansa, japon qyzy Ionamıne Erı kúmis júldeni, mońǵol Tývshınjargal Engjargal qola medaldi enshiledi. Al Ekaterına Iýraıtıs jeńip alǵan 15 km qashyqtyqta taǵy bir japonııalyq Kaıhara Iýmı márege ekinshi bolyp kelse, ózbekstandyq Ekaterına Knebeleva úshinshi oryndy qanaǵat tutty.
Qaraǵandy tas jolyndaǵy jarystar ári qaraı jalǵasýda.
Dastan KENJALIN,
«Egemen Qazaqstan».