Joǵary Eýrazııalyq ekonomıkalyq keńes qorytyndysyna arnalǵan paneldi sessııa dóńgelek ústel otyrysymen jalǵasty. Oǵan M.V.Lomonosov atyndaǵy MMÝ-diń Postkeńestik keńistikte qoǵamdyq-saıası úderisterdi zertteý ortalyǵynyń dırektory Sergeı Rakeda men «Halyqaralyq energııa saıasaty» ortalyǵynyń jetekshisi Iýrıı Solozobov qatysty.
Bul kúnderi álemniń áıgili BAQ-tary Astanaǵa kózin qadap, qol qoıylǵan tarıhı qujattyń mán-maǵynasyn taldaý ústinde. Sonyń aıǵaǵyndaı, Astanaǵa atbasyn ádeıi tirep, osynda bolyp jatqan aıtýly oqıǵadan reportajdar ázirleýge jan-jaqtan jýrnalıster aǵyldy. Joǵary Eýrazııalyq ekonomıkalyq keńes qorytyndysyna arnalǵan paneldi sessııa da jýrnalıster nazarynan tys qalmady.
EAEO týraly shartqa qol qoıylǵannan keıingi qazaqstandyq jáne sheteldik sarapshylardyń qatysýymen ótken paneldi pikirtalas barysynda M.V.Lomonosov atyndaǵy MMÝ-diń Postkeńestik keńistikte qoǵamdyq-saıası úrdisterdi zertteý jónindegi aqparattyq-taldaý ortalyǵynyń dırektory Sergeı Rakeda óz pikirimen bólisti. Ol shartqa qol qoıylǵannan keıingi alda turǵan mindet EAEO ımıdjin qalyptastyrý men atqaratyn mindetin túsindirýde jatqandyǵyn aıtyp ótti. «Meniń kózqarasym boıynsha, búgingi shart belgili bir kezeńniń aıaqtalýy ǵana emes, jańa uzaq joldyń bastalýy da. Osyǵan oraı, alǵashqy qadam jasaldy. Endigi jerde bizdi jańa istermen qatar, ortaq sheshetin máseleler de kútedi», dedi ol.
Onyń aıtýynsha, eýrazııalyq ıntegrasııanyń damýyn baǵalaý ishki ilgerileýdiń kórsetkishimen ǵana ólshenbeıdi, syrttan berilgen baǵa da osy jaýapkershilikti arqalaıdy. «Bul jerde aıta keter basty másele, búgingi eýrazııalyq ıntegrasııanyń qandaı sıpatta ekendigin túsinbeýshilik pen aqparattyń jetispeýshiligi oryn alýda. Bul, ásirese, Batys, Eýropa elderine, sondaı-aq, saıası-saraptamalyq qaýymdastyqtarǵa tán. Sondyqtan bizge Eýrazııalyq ekonomıkalyq odaqtyń qandaı sıpatta ekendigin túsindiretin ımıdj qalyptastyryp, túsindirý jumystaryn júrgizýimiz qajet dep oılaımyn», dedi S.Rakeda.
Dóńgelek ústel basynda óz oıyn ortaǵa salǵan «Halyqaralyq energııa saıasaty» ortalyǵynyń jetekshisi Iýrıı Solozobov: «Shartqa qol qoıý – barlyǵymyzdyń úlken jeńisimiz, bul – naqty salystyra tekserilgen ıntegrasııalyq qadam ekendigin aıtqym keledi. Biz kópten kútken Odaqqa biriktik. Esterińizge sala keteıin, Eýropalyq odaq buǵan 40 jyldyń ishinde jetti, al biz birneshe ese jyldam ýaqytta qol jetkizdik», dedi. Sarapshy, sondaı-aq, qurylyp otyrǵan Odaqtyń Eýroodaq pen Qytaı syndy alyptar arasyndaǵy iri qurylym bolyp otyrǵanyna toqtala kelip, alyp qurlyqta endeı jatqan EAEO-nyń Eýropa men Shyǵystyń arasyn jalǵastyrýdaǵy tranzıttik múmkindikterin joǵary baǵalady.
Sonymen qatar, ol jańa qurylymda ony qoldaný úshin barlyq jaǵdaı jasalǵanyn atap kórsetti. «EAEO-nyń taǵy bir artyqshylyǵy – shıkizatqa táýeldilikten arylý, shıkizattyq emes ındýstrııaly jáne ekonomıkanyń jańa sektorlaryn qurý», dedi Iý.Solozobov. Ol sarapshylar tobynyń úsh eldiń basshylarymen Táýelsizdik saraıy jıynynyń syrtynda sóılese alǵanyn da aıtyp ótti. «Jıyn syrtynda biz úsh eldiń prezıdentterimen sóılestik. Úsheýi de rıza. Prezıdentter paryzdaryn oryndap, maqtanysh sezimde shyqty. Olardyń saıası kóregendiligi, tabandylyǵy men salmaqty aqylynsyz búgingi mereke bolmas edi. Prezıdentter bizdiń Odaq tek ekonomıkalyq ekendigin atap ótti. Ekonomıkalyq shekaramen shektelý qadamy óte durys. Áıtpese, biz ózimizdiń ekonomıkalyq problemalarymyzǵa «tunshyǵar» edik», dep oı túıindedi sarapshy.
Anar TО́LEÝHANQYZY,
«Egemen Qazaqstan».