Memleket qaıratkeri Turar Rysqulovtyń kúreske toly ómir jolyn sýrettegen «Qyzyl jebe» romanyn súısinip oqymaǵan qazaq kemde-kem shyǵar. Bes tomnan turatyn týyndy jıyrma jylǵa jete-ǵabyl ýaqyt jazylǵan. Muny izdenis demeı ne deısiń?!
Sherhan Murtazanyń áıgili romanynyń qoljazbasy qaıda saqtalǵan? Osy saýal kimdi de bolsyn tolǵandyrmaı qoımasy anyq. Búginde qoljazba qalamger atyndaǵy Rýhanııat jáne tarıhtaný ortalyǵynda tur.
«Sheraǵanyń «Qyzyl jebesine» qatysty derekter az emes. Qalamger romandy jazý barysynda Dinmuhamed Qonaevqa kirip, tarıhı arhıvterdiń asa qupııa málimet saqtalǵan bólimderinen málimetter izdeýge ruqsat alǵan. Qazirgi tańda atalǵan roman týraly Sherhan Murtazaulynyń óz qolymen jazǵan eki qalyń qyzyl dápter tabylyp otyr. Onyń biri 1974 jyly, ekinshisi 1978 jyly jazylyp saqtalǵan eken. Qalamgerdiń óz qolymen jazǵan dúnıesi qolymyzǵa túskenine bek qýanyshtymyz», deıdi Sh.Murtaza atyndaǵy Rýhanııat jáne tarıhtaný ortalyǵynyń bólim basshysy Nazym Qojamarova óz oıymen bólisip.
Jalpy, qalamger atyndaǵy ortalyqta Sheraǵaǵa qatysty qyzyqty dúnıeler az emes. Munda keletin jurtshylyq Sherhan Murtazanyń qoljazbasyn da, basqa da derekterdi qyzyǵa tamashalaıdy eken. Qýanyshtysy da sol.
Taraz