Kásibinen násibin taýyp júrgen sharýalar aýyldy jerlerde jetkilikti. Merki aýdanyndaǵy Oıtal aýylynyń azamaty Maqsat Álimseıitov tirliktiń kózin taýyp, tórt birdeı otbasyny jumyspen qamtyp otyr. Onyń aıtýynsha, qyzmetkerleri 270-300 myń teńgeniń kóleminde jalaqy alady. Aýyl turǵyndary úshin budan artyq qandaı jalaqy kerek?!
Maqsattyń bar maqsaty – ulttyq sýsynmyz sanalatyn qymyzdy brendke aınaldyrý. Búginde ol qymyzdy zamanaýı tehnologııamen óndirý jumystaryn qolǵa alǵan. Qysqasy, plastık ydysqa quıylǵan qymyz uzaq ýaqyt boıy saqtalady. Osyny eskergen ol qymyz óndirisin modernızasııalap, sýsyndy bir lıtrlik plastık ydysqa toltyrý úshin arnaıy seh ashqan.
«Áýelde tórt bas saýyn bıe alyp, jelige baılaǵan bolatynmyn. Taǵat tappaı eńbektenýdiń nátıjesinde óńir turǵyndaryn ekologııalyq turǵydan taza ári ulttyq sýsynymyzben qamtýdyń jolyn taptyq. Qasymdaǵy azamattardyń qoldaýynyń arqasynda bıe sanyn on ekige jetkizgen edik. Osylaısha, ónim kólemin ulǵaıttyq. Tıisinshe tabysymyz da arta tústi.
Álbette, bastaǵan isti sońyna deıin jetkizý qajet ekenin sezinemiz. Sol úshin de aýylymyzdaǵy Jaýǵash batyr kóshesinde ornalasqan jer telimimizge qorajaı saldyq. Basqa da jumystardy atqardyq. Ala tańnan mal jaıǵaýdyń, táýligine áldeneshe ret bıe saýýdyń mashaqatyn dál osy ispen aınalysyp júrgen azamattar bes saýsaǵyndaı jaqsy biledi. Biz beınettiń zeınetin kórip otyrǵanymyzǵa qýanyshtymyz. Ár adam óz isine muqııat bolsa, tabysty bolatynyna eshqandaı kúmánimiz joq», dedi Maqsat Álimseıitov.
Bal qymyzyn óńir kóleminde ǵana emes, almatylyqtarǵa da ótkerip júrgen Maqsat Álimseıitov ulttyq sýsynnyń syrtyndaǵy japsyrmaǵa úlken uly Aqnurdyń esimin jazyp, «Aqnur» degen ataý qoıyp úlgeripti. Munysyn ol bıznesiniń damýyna bar yntasymen kómektesip júrgen úlken ulyna degen qurmeti dep esepteıdi.
Bir qýantatyny, ulttyq sýsyn arqyly tabys taýyp otyrǵan azamattyń taýary Almaty qalasyndaǵy dúkenderde de satylymǵa shyqqany. Aldaǵy ýaqytta ózge qalalarǵa da jóneltilýi yqtımal. Jumysyn jańadan bastaǵan Maqsat bolashaqta óniminiń el boıynsha ótkiziletinine senedi.
M.Álimseıitovtiń aıtýynsha, bıe sanyn 150-ge jetkizý arqyly jaz mezgilinde táýligine – 400, qys kezinde 300 lıtr qymyzdy naryqqa shyǵarýǵa nıetti. Árıne, munyń bári az ǵana jyldyń ishinde atqarylǵan jumystyń nátıjesi ekeni daýsyz. Osylaısha, 4 bıemen bastaǵan kásibiniń órisi jyl ótken saıyn keńeıip keledi.
«Mal sharýashylyǵyn damytyp, ulttyq sýsynymyzdy brendke aınaldyrý jolynda aıanyp qalmaımyn. Osylaısha, eldiń órkendeýine tamshydaı bolsyn úles qossam deımin. Eń bastysy, tabıǵı ónim arqyly jurttyń alǵysyn alǵym keledi», dedi ol óz oıymen bólisip.
Jambyl oblysy,
Merki aýdany