Qurlyqtyq hokkeı lıgasynyń (QHL) turaqty birinshiligindegi eń sońǵy oıynda da «Barys» sátsizdikke ushyrady. Bul joly olar Iаroslavldiń «Lokomotıvine» ese jiberdi.
Astanada ótken báseke birden óte ekpindi bastaldy. 2 mınýtta Maksım Osıpov qonaqtardy alǵa shyǵardy. Arada úsh mınýt ótken soń Samat Danııar tarazy basyn teńestirdi. Biraq sol keshte Iаroslavlden kelgen jigitterdiń qarqyny kúshti boldy. Olar shabýyl ótinde shıraq qımyldap, aıdyn ıeleriniń qaqpasyn taǵy tórt márte dál kózdedi. Bul goldardyń avtorlary – Pavel Kraskovskıı (8 mınýt), Maksım Osıpov (27 mınýt), Sergeı Andronov (28 mınýt) jáne Stepan Nıkýlın (45 mınýt). Jerlesterimizdiń eki shaıbamen ǵana jaýap qaıyrýǵa shamalary jetti. 35 mınýtta Dmıtrıı Shevchenko óz múmkindigin utymdy paıdalansa, 48 mınýtta Mıhaıl Rahmanov mergendik tanytty. Nátıjesinde bul báseke 5:3 esebimen «Lokomotıvtiń» paıdasyna sheshildi.
Sóıtip, bıylǵy maýsym «Barys» úshin sátsiz aıaqtaldy. Olar osy birinshilik barysynda nebári 61 upaı jıyp, Shyǵys konferensııasyndaǵy komandalar arasynda sońǵy orynda qalyp qoıdy.