Elde koronavırýs ınfeksısy saıabyrlaǵanymen, qys aılarynda tumaýdyń órshıtini belgili. Sondyqtan dárigerler syrqattyń belgileri baıqalsa, beıqam júrmeı, dárigerge júginip, aýrýdyń aldyn alý asa mańyzdy ekenin eskertedi.
Qazir eldegi barlyq óńir – KVI taralý jıiligi boıynsha «jasyl aımaqta». Naýqastardyń 99%-y saýyǵyp shyqqan. Desek te keıingi 2 aptada aldyńǵy 2 aptamen salystyrǵanda aýrý juqtyrý 1,4 ese kóbeıip, 754-ten 1 075 jaǵdaıǵa deıin jetken. Bul týraly Sanıtarııalyq-epıdemıologııalyq baqylaý komıtetiniń juqpaly aýrýlardy epıdemıologııalyq qadaǵalaý basqarmasynyń basshysy Roza Qojapova tarqatyp aıtyp bergen edi.
«KVI juqtyrǵan pasıentterge stasıonarlyq kómek kórsetý úshin 2 056 tósektik oryn ashylǵan. Onyń ishinde ınfeksııalyq tósektik oryn – 1 747. Qamtylǵany – 104 (6%), bos turǵany – 1 643 (94%). Reanımasııalyq tósektik oryn – 309, qamtylǵany – 8 (3%), bos turǵany – 301 (97%). Vırýs shtamdaryn sáıkestendirý nátıjesi indettiń «Omıkron» nusqasynyń aınalymda júrgenin kórsetip otyr. Respýblıkada jiti respıratorly vırýstyq ınfeksııalary jáne tumaýdyń maýsymdyq ósimi baıqaldy. Epıdemııalyq maýsym bastalǵaly JRVI-diń 3,5 mln jaǵdaıy tirkeldi. Onyń ishinde 14 jasqa deıingi balalar arasynda 2 mln 300 myń jaǵdaı anyqtaldy. О́tken aptamen salystyrǵanda JRVI-men aýyrǵandar 1,5 ese tómendegen. Sonymen qatar tumaýdyń 3 213 jaǵdaıy tirkelse, onyń ishinde 14 jasqa deıingi balalar arasynda 1 299 jaǵdaı anyqtalǵan», dedi R.Qojapova.
Resmı derekke júginsek, el aýmaǵynda qazan aıynan bastap tumaý órshı bastaǵan. Elde onyń H3N2, H1N1 jáne V tobyna jatatyn túrleri kezdesipti. Osyǵan qosa vırýstardyń da bar ekenin qaperden shyǵarmaǵan lázim. Mysaly, mundaı vırýstardyń bokavırýs, paragrıpp, respıratorly-sıntısıaldy vırýs degen túrleri qatar júredi eken.
«Astana medısına ýnıversıtetiniń balalar juqpaly aýrýlary kafedrasynyń meńgerýshisi Dınagúl Baeshevanyń aıtýynsha, jeltoqsan-qańtar aılarynda tumaýmen aýyrǵan balalar kóp.
«Salystyrmaly túrde alyp qarasaq, byltyr koronavırýspen aýyrǵan balalar sany basym bolsa, bıyl tumaýmen aýyrǵan balalar kóp. Al onyń saldaryna toqtalsaq, tumaý buryn koronavırýspen aýyrǵan balalarda aýyr ótti. Tumaý bolsyn, meıli JRVI bolsyn, kishkentaı balalar úshin óte qaýipti. Ásirese eki jasqa tolmaǵandarǵa qıyn. Sondaı-aq bul aýrýlar eresekterge qaraǵanda balalarda jıi kezdesedi. Syrqattanǵan balalardyń ishinde jaǵdaıy aýyrlaǵandar da bar. Sondyqtan tumaýratyp júrgen balalardy mektepke, balabaqshaǵa aparmaýǵa shaqyramyz. Eger naýqastyń dene qyzýy túspese nemese qusý, loqsý, tamaq, sý ishpeý, entikpe sekildi belgiler baıqalsa, mindetti túrde dárigerge barý kerek. Negizi, bul aýrý balalardyń 80%-ynda jeńil túrde, 17%-da ortasha deńgeıde ótedi. Aýyr jaǵdaılar kóp emes», deıdi ol.
Medısına ǵylymdarynyń doktory, Densaýlyq saqtaý mınıstrliginiń shtattan tys ınfeksıonısti Baqyt Kósherova halyqty skrınıngten, medısınalyq tekserýden ýaqtyly ótýge, koronavırýstan keıingi sındrom nátıjesinde týyndaýy múmkin asqynýlardy boldyrmaý úshin profılaktıka úshin ekpe alýǵa shaqyrdy.
«Intoksıkasııanyń aıqyn belgileri – álsizdik, kóp terleý, tez sharshaý. Keıbir naýqastarda pnevmonııa, irińdi sınýsıt, tonzıllıt, otıt syndy qaıtalama bakterııalyq ınfeksııalar bolýy múmkin. Sonymen qatar sozylmaly ınfeksııalyq emes aýrýlary bar naýqastarda jeke kórsetkishterdiń joǵarylaýy baıqalady. Mysaly, qant dıabetimen aýyratyn naýqastarda qandaǵy glıýkoza deńgeıi kóteriledi», deıdi B.Kósherova.
Osylaısha, dárigerler turǵyndardy tumaý, KVI jáne JRVI-diń aldyn alý úshin profılaktıkalyq sharalar qabyldap, dárigerlerge ýaqtyly qaralýǵa shaqyrdy.