Fototilshiniń úıin zańdastyryp berdi

Oblys ákimi áriptesimizge páterdiń kiltin tapsyrýyn tap­syrǵanymen, jańa úıdi zańdas­tyryp bere almady. Any­ǵyraq aıtar bolsaq, oblys áki­mi aýysy­p ketti de, páterdiń máse­lesin sheshýge tıis azamat­tar túl­kibulańǵa saldy. Jýr­na­lıster bul máseleni san már­­te kótergenimen Kárim Kó­kirek­baev­tan keıin óńir basshysy bolǵan Berdibek Saparbaev ta, Asqar Myrzahmetov te tórt qyzdy tárbıelep otyrǵan árip­tesimizdiń máselesin birjaqty ete alǵan joq.

«Er kezegi – úshke deıin». Kárim Kókirekbavtan keıin óńir tizginin qolǵa alǵan úshinshi ákim Nurjan Nurjigitov Altynbek Qartabaıdyń alty jyl boıy asyǵa kútken armanyn oryndap, ortalyqtaǵy jańa úıden al­ǵan páterin zańdastyryp be­rip, kópbalaly ákeniń alǵysyn ar­qalady. Osy­laı­sha, 2017 jyl­dyń jańa jy­lynda jańa páterge kirgen áriptesimiz 2023 jyldyń Naý­ryz merekesinde onyń zańdy ıesi atandy.

Oblystyq «Araı» jastar gazeti ashylǵaly beri tynymsyz eńbek etken Altynbektiń eńbegi rasymen de zor. Jastar basylymy jaryq kórmeı turyp, bas redaktor Bolat Bekjanov ortalyq alańda jınalys ótkizip turatyn. Gazetti kóshede josparlaǵan ujym­nyń ishinde Altekeń de bar. Eshkim tapsyrma bermese de, Altekeń gazetke kerekti sý­ret­terdi ózi túsirip keledi eken. Al basylym resmı túrde oqyr­man oljasyna aınalǵannan keıin de Altynbek Qartabaı biraz ýaqyt tegin eńbek etken.

«Sońǵy birneshe jyldyń bederinde bas aýrýyma aınalǵan páter máselesine núkte qoıy­lyp, tóbem kókke jetkendeı kúı­de júrmin. Esterińizde bol­­sa, 2017 jyly, Jańa jyl me­rekesi qarsańynda maǵan úsh ból­meli páterdiń kilti saltanatty jaǵdaıda tapsyrylǵan edi. Baspanaly bolǵanymmen bas­shylar aýysyp ketip, pá­ter tolyq zańdastyrylmaı qaldy. Osy kúnge deıin páter tur­ǵyn­­úıdi salǵan qurylys kom­pa­nııasynyń menshiginde turdy.

«Kúnderdiń kúninde páterdi bosat dese qaıtemin?» degen sary ýaıymmen talaı tańdy atyryp, talaı keshti batyrdym. Osy máselemen qanshama ki­silerden kómek suraǵanymdy sanaı almaspyn. Qaqpaǵan esigim qalmady. Amalym taýsylǵandaı kúıde júrdim. Tipti bul másele jaqyn arada sheshiledi degenge senim de býaldyrlana bastady.

«Biter istiń basyna, jaq­sy keler qasyna» degendeı, Jam­­byl oblysynyń ákimi Nur­­jan Nurjigitovtiń tike­leı tapsyrmasymen bul máse­le ońynan sheshildi. Tıisti qu­jat­ty qolymyzǵa alyp, qýa­nysh­tan kókke ushyp keter­deı kúıde júrmiz. О́ńirdiń aqpa­rat salasyndaǵy azdy-kóp­ti eńbegimizdi baǵalap, aza­mat­tyq tanytqan Nurjan Mol­dııar­ulyna aıtar alǵysym sheksiz», deıdi Altynbek Qartabaı.

О́ńirde birneshe márte fo­tokórmesi uıymdastyrylǵan Altynbek Qartabaı talaı már­­te halyqaralyq baıqaý­lar­da je­ńistiń bıik tuǵyrynan kó­ringen bolatyn. Jıyrma jylǵa jýyq ýaqyt tynymsyz eńbek etip kele jatqan árip­tesimizdiń má­selesin óńir basshysy nazardan tys qaldyrmaı ońynan shesh­keni rasynda da quptarlyq is.

TARAZ