Tarazdan Sholaqqorǵanǵa shyǵatyn uzyn joldyń boıyndaǵy Qarataý qalasy oblys ortalyǵynan 100, Jańatas 170 shaqyrym qashyqtyqta jatyr. Qatar jatqan qos shaǵyn qalaǵa Bılikól arqyly baratyn jol birshama jaqsy, al Aqkól arqyly barsańyz, ájeptáýir azapqa túsetinińiz anyq. Sarysýdyń sary dalasynda usharyn jel, qonaryn saı bilip, appaq bop qatyp jatqan kádimgi kók tuzdy tonnalap tasıtyn aýyr júk kólikteri bul joldyń kóp jerin ezip, oıdym-oıdym etip tastaǵan. Sondyqtan bul jaqtyń turǵyndary oblys ortalyǵyna bir jaǵy shoıyn jolmen qatynaǵandy qolaıly kóredi. Jol-jónekeı Jambyl, Talas, Sarysý aýdandarynyń birqatar eldi mekenderin basyp ótip, Jańatasqa baryp bir-aq toqtaıtyn bul temirjol ras bolsa, kezinde qasıetti Túrkistanǵa tótesinen tartyp, eki arany jaqyndatpaq josparmen salynǵan kórinedi. Biraq o basta oıǵa alǵan isti qandaı jaǵdaıdyń buzǵanyn qaıdam, ázirge qos rels óndiristi qalamen tuıyqtalyp tur. Áıtse de, osynaý poıyz bul jaqtaǵy eldiń ertteýli aty sııaqty, túsip-minýge de, qalaǵa qatynaýǵa da yńǵaıly. El áıgili «Transsibir ekspresi» fılminiń keıbir sıýjetteri osy joldyń boıynda túsirilgenin jyr qylyp aıtady. Qaıbir jyldary Taraz ben Jańatastyń arasynda qatynaıtyn osynaý poıyzdyń biraz ýaqyt toqtap qalǵan kezderi de boldy. Temirjol basshylary onsyz da alqam-salqamy shyqqan bir vagonnyń ózin kóp kórdi me, qańtaryp qoıyp, jergilikti bılik áreń degende kemshilikti túzegen-di. Mine, ol kúnderdiń qıyndyǵy kelmeske ketkendeı. Qazir oblystyń qorjyny toq, eldiń turmysy túzele bastady. Arnaıy memlekettik baǵdarlamanyń arqasynda shaǵyn qalalar da eńsesin tiktep keledi. Jańa zamanǵa saı el de jańa dúnıeni talap etedi. Osyǵan oraı Taraz shahary men óndiristi kentterdiń arasyna júretin poıyz quramy qosymsha vagondarmen tolyqty. Buǵan deıin eki ortany jol qylyp, ábden tozyǵy jetken jalǵyz vagon sý jańa úsh vagonmen almastyryldy. Jolaýshylarǵa barynsha qolaıly jaǵdaı jasalǵan bul vagondar 165 jolaýshyǵa arnalǵan. Tipti, barlyǵyna teledıdar men salqyndatqysh ornatylypty. Sondaı-aq, jol júrý uzaqtyǵy da aıtarlyqtaı qysqardy. Poıyzdyń ári-beri turaqty qatynaýy úshin oblys qazynasynan 280 mln. teńgedeı qarjy bólindi. – «Gazel», avtobýsqa qaraǵanda poıyz óte tıimdi. Keıbir eldi mekender úlken tas joldan alys, poıyz joldyń boıynda ornalasqan. Ondaı aýyldarǵa avtobýstar kire bermeıdi. Bir jaǵy bul poıyz halyqtyń qaltasyna da tıimdi. Qarataýdan Tarazǵa deıin nebári 155 teńge tóleısiń, – deıdi Qarataý qalasynyń turǵyny Kenjebek Saparov. Jambyl oblysy ákiminiń orynbasary Bekbolat Orynbekov jańa vagonmen saparǵa shyqqan jolaýshylarǵa sát-sapar tilep, Taraz ben Jańatastyń arasyn jaqyndata túsken bul poıyzǵa jergilikti bıýdjetten barlyq jaǵdaıdyń jasalatynyn jetkizdi. Oralhan DÁÝIT, «Egemen Qazaqstan». Jambyl oblysy. Sýretti túsirgen Aqádil RYSMAHAN.