Qyrǵyz Respýblıkasynyń Prezıdenti Almazbek Atambaev «Ázerbaıjan Respýblıkasy Úkimeti, Qazaqstan Respýblıkasy Úkimeti, Qyrǵyzstan Respýblıkasy Úkimeti men Túrik Respýblıkasy Úkimeti arasyndaǵy Túrki akademııasyn qurý týraly kelisimdi ratıfıkasııalaý týraly» Qyrǵyz Respýblıkasynyń Zańyna qol qoıdy.
Atalǵan zańdy Qyrǵyz Respýblıkasynyń Jogorký Keneshi osy jyldyń maýsym aıynyń 25-i kúni maquldaǵan bolatyn. Zań resmı jarııalanǵan kúnnen bastap kúshine enedi.
Esterińizge sala keteıik, Elbasy Nursultan Nazarbaevtyń bastamasymen dúnıege kelgen Túrki akademııasyna qatysty atalǵan kelisimge 2012 jyldyń 23 tamyzynda Bishkek qalasynda qol qoıylǵan bolatyn.
Kelisimde «qurýshy tórt memlekettiń úsheýi qujatqa qol qoıyp maquldasa, Túrki akademııasy uıymy halyqaralyq mártebe alady» delingen. Buǵan deıin atalǵan zańdy Ázerbaıjan men Túrkııa parlamentteri maquldap, prezıdentteri qol qoıǵan bolatyn. Osylaısha zańdy ratıfıkasııalaǵan elderdiń sany úshke jetti.
2010 jyly Astanada ashylyp, Qazaqstannyń qoldaýymen jumys istep kelgen Túrki akademııasy aldaǵy bir aıdyń ishinde túgel túrki halqyna ortaq halyqaralyq uıym retinde jumysyn bastaıdy, dep habarlady Túrki akademııasynyń baspasóz qyzmeti.